អភិបាលខេត្តព្រៃវែង លើកទឹកចិត្ត​សិស្សជាប់និទ្ទេសA បន្តរៀនជំនាញឯកទេស​ដើម្បីយកចំណេះអភិវឌ្ឍ​ប្រទេសជាតិ

ព្រៃវែង៖ លោក ជា សុមេធី អភិបាលខេត្តព្រៃវែង បានលើកឡើងថា សិស្សានុសិស្សដែលបានប្រឡងជាប់និទ្ទេស A ទាំងអស់គ្នា គឺជាធនធានមួយដ៏សំខាន់ក្នុងការជួយពង្រឹងវិស័យអប់រំក្នុងប្រទេសកម្ពុជា និងជាសសរទ្រូង​សម្រាប់ប្រទេសផងដែរ។ លោកអភិបាលខេត្ត បានលើកទឹកចិត្ត ដល់សិស្សានុសិស្ស ត្រូវខិតខំសិក្សារៀន​សូត្រជំនាញឯកទេសដែលខ្លួនចង់បន្តសិក្សាឲ្យកាន់តែខ្លាំងឡើងបន្ថែមទៀត ដើម្បីធ្វើយ៉ាងណា យកចំណេះ​ដឹងជួយអភិវឌ្ឍប្រទេសជាតិ និងក្រុមគ្រួសាររបស់ខ្លួនឲ្យកាន់តែរីកចម្រើនទៅមុខជាលំដាប់។ លោកអភិបាល​ខេត្តលើកឡើងបែបនេះ នាឱកាសអញ្ជើញជួបសំណេះសំណាលជាមួយសិស្សនិទ្ទេស (A) ឆ្នាំសិក្សា ២០២១–២០២២ ចំនួន ៦៤ នាក់ រួមទាំងឪពុក-ម្តាយ អ្នកអាណាព្យាបាល និងនាយកសាលាកាលពីថ្ងៃទី១ ខែកុម្ភៈ ឆ្មាំ២០២៣ នៅសង្កាត់ស្រះចក ខណ្ឌដូនពេញ រាជធានីភ្នំពេញ។

លោក ជា សុមេធី បានលើកឡើងថា រាជរដ្ឋាភិបាលកម្ពុជា ក្រោមការដឹកនាំប្រកបដោយភាពវៃឆ្លាត និងចក្ខុវិស័យរបស់​សម្តេចតេជោ ហ៊ុន សែន បាននិងកំពុងយកចិត្តទុកដាក់យ៉ាងខ្លាំងទៅលើវិស័យអប់រំ។  ជាក់ស្ដែង សម្ដេចបានណែនាំ​ឱ្យក្រសួងក្រសួងអប់រំ យុវជន និងកីឡា ត្រូវខិតខំកែលម្អសេវាអប់រំ និងកម្មវិធីអប់រំ ដើម្បីកសាងធនធាន​មនុស្សឱ្យឆ្លើយ​តបទៅនឹងតម្រូវការទីផ្សារការងារក្នុងយុគសម័យឌីជីថល និងសេដ្ឋកិច្ចឌីជីថល ប្រកបដោយជំនាញ ក្នុងសតវត្សទី២១ ជាពិសេសការអប់រំ វិទ្យាសាស្រ្ត បច្ចេកវិទ្យា វិស្វកម្ម និងគណិតវិទ្យា។

ឆ្លងកាត់កំណែទម្រង់ជាបន្តបន្ទាប់ លទ្ធផលដែលយើងទទួលបាន គឺគុណភាពនៃវិស័យអប់រំនៅកម្ពុជា មានការផ្លាស់ប្តូរ​ជាវិជ្ជមានគួរឲ្យមោទកៈ។ ជាក់ស្តែងសមត្ថភាពរបស់សិស្សនិស្សិតកម្ពុជា មានការកើនឡើងកាន់តែខ្ពស់ អាចប្រកួត​ប្រជែងរហូតដល់អាចដណ្តើមបានពានរង្វាន់លំដាប់ថ្នាក់ពិភពលោកបានថែមទៀត។ នេះជាការបន្ថែមរបស់លោក ជា សុមេធី។

លោកបានសង្កត់ធ្ងន់ថា កំណែទម្រង់វិស័យអប់រំនៅកម្ពុជា បាននិងកំពុងតែដើរនៅលើផ្លូវត្រូវ បើទោះជារយៈពេល​ចុងក្រោយនេះ យើងបានរងផលប៉ះពាល់ដែលបង្កឡើងដោយសារវិបត្តិជំងឺរាតត្បាតសកលកូវីដ-១៩ យ៉ាងណាក្តី ។

នាឱកាសនេះដែរ លោកអភិបាលខេត្ត ក៏បានផ្ដាំផ្ញើដល់សិស្សានុសិស្សបន្តវេន ទាំងអស់ត្រូវមើលគំរូ សិស្សច្បងដោយ​ត្រូវខិតខំសិក្សារៀនសូត្រឲ្យបានពូកែ ធ្វើជាកូនល្អ សិស្សល្អ ពលរដ្ឋល្អ ត្រូវនៅឲ្យឆ្ងាយពីគ្រឿងញៀន ធ្វើយ៉ាងណា​ដើម្បីឲ្យការសិក្សារបស់ខ្លួនទទួលបានលទ្ធផលល្អ។

ជាមួយគ្នានេះ លោក ប៉ាវ សុធី ប្រធានមន្ទីរអប់រំ យុវជន និងកីឡា ខេត្តព្រៃវែង បានឲ្យដឹងថា លទ្ធផលប្រឡង​មធ្យមសិក្សា​ទុតិយភូមិសម័យប្រឡងថ្ងៃទី៥ ខែធ្នូ ឆ្នាំ២០២២ សិស្សទទូលនិទ្ទេស A ចំនួន ៦៤ នាក់ ក្នុងនោះស្រី ៤០ នាក់ និទ្ទេស B ចំនួន ៥៧៧ នាក់ ក្នុងនោះស្រី ៣៧១ នាក់ និទ្ទេស C ចំនួន ១៤១១ នាក់ ក្នុងនោះសី ៩៣១ នាក់ និទ្ទេស D ចំនួន ១៩២០ នាក់ ក្នុងនោះស្រី ១១៤២ នាក់ និទ្ទេស E ចំនួន ១៨៣០ នាក់ ក្នុងនោះស្រី ១ ០០៣ នាក់។

អភិបាលខេត្តព្រៃវែង ក៏បានឧប្ថម្ភដល់សិស្សានុសិស្សចំនួន ៦៤ នាក់ ក្នុងម្នាក់ៗ ទឹកប្រាក់ចំនួន ៤០ ម៉ឺនរៀលផងដែ៕ សៅគ្រី