លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) បានបញ្ជាក់ថា ការសម្រេចចិត្តរបស់កម្ពុជាក្នុងការផ្ដល់វគ្គបណ្ដុះបណ្ដាលជំនាញដោះមីនដល់ភាគីអ៊ុយក្រែន នាពេលថ្មីៗនេះ គឺកើតចេញពីកិច្ចសហប្រតិបត្តិការដ៏ជិតស្និទ្ធិរវាងរដ្ឋាភិបាលកម្ពុជា និងជប៉ុន។ លោក ហេង រតនា បញ្ជាក់បែបនេះក្នុងជំនួបជាមួយអ្នកវិនិយោគិនជប៉ុន នៅថ្ងៃទី៨ ខែកុម្ភៈនេះ។

មជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) បានបើកវគ្គហ្វឹកហ្វឺនបច្ចេកវិទ្យាឧបករណ៍បោសសម្អាតមីនដល់មន្ត្រីជំនាញដោះមីនអ៊ុយក្រែន កាលពីថ្ងៃទី១៦ ខែមករា ឆ្នាំ២០២៣ កន្លងទៅថ្មីៗនេះ ក្រោមកិច្ចសហការជាមួយអង្គការចៃការបស់ជប៉ុន។

ពាក់ព័ន្ធនឹងការងារនេះ លោក ហេង រតនា បានប្រាប់អ្នកវិនិយោគិនជប៉ុន ថា «ការសម្រេចចិត្តក្នុងការផ្ដល់វគ្គហ្វឹកហ្វឺនដល់អ្នកជំនាញដោះមីនអ៊ុយក្រែន គឺជាកិច្ចសហប្រតិបត្តិការល្អប្រកបដោយភាពជិតស្និទ្ធិរវាងរាជរដ្ឋាភិបាលកម្ពុជា និងរដ្ឋាភិបាលជប៉ុន តាមរយៈគំនិតផ្ដួចផ្ដើមរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងលោកនាយករដ្ឋមន្ត្រីជប៉ុន»។

បើតាមលោក ហេង រតនា ក្រោយទទួលបានការប្រគល់ភារកិច្ចពីប្រមុខរាជរដ្ឋាភិបាល អង្គភាពស៊ីម៉ាក់ក៏បានបើកវគ្គបណ្ដុះបណ្ដាលនៃការប្រើប្រាស់សម្ភារៈបច្ចេកទេសបោសសម្អាតមីនដល់អ្នកជំនាញដោះមីនមកពីអ៊ុយក្រែន។ លោក បានលើកឡើងថា អង្គភាពស៊ីម៉ាក់បានជ្រើសរើសការប្រើប្រាស់ឧបករណ៍រាវមីន ប្រភេទអាលីស (ALIS) ដែលជាឧបករណ៍ផលិតនៅជប៉ុន ហើយជាឧបករណ៍រាវមីនមួយប្រភេទដែលបានស្រាវជ្រាវរួមគ្នារវាងភាគីកម្ពុជា-ជប៉ុន។

ទន្ទឹមនេះ លោកអគ្គនាយកស៊ីម៉ាក់រូបនេះបានប្ដេជ្ញាបង្កើនល្បឿនទ្វេដងបន្ថែមទៀតសម្រាប់សកម្មភាពបោសសម្អាតមីន និងកាកសំណង់ក្រោយសង្គ្រាមឲ្យអស់ទាំងនៅកម្ពុជា និងនៅតាមបណ្ដាប្រទេសនៅលើពិភពលោក ខណៈកម្ពុជាដែលមានអង្គភាពស៊ីម៉ាក់ ជាប្រតិបត្តិករបាននឹងកំពុងសហការជាមួយរោងចក្ររបស់ជប៉ុន ដើម្បីផលិតគ្រឿងចក្រកំទេចមីនខ្នាតធំ ដែលស្របតាមស្ដង់ដារអន្តរជាតិ ជាពិសេសដូចករណីនៅអ៊ុយក្រែន ជាដើម៕

ដោយ៖ ធឿន វ៉ាន់សុង