អគ្គនាយកស៊ីម៉ាក់ថាការជួយបណ្ដុះបណ្ដាលអ្នកដោះមីនអ៊ុយក្រែនគឺនៅតែបន្ត

អគ្គនាយកស៊ីម៉ាក់លោក ហេង រតនា បានលើកឡើងថាការងារជួយបណ្ដុះបណ្ដាលអ្នកដោះមីនអ៊ុយក្រែននេះគឺនៅតែបន្តរហូតមកដល់ពេលនេះដែលជាកិច្ចការមនុស្សធម៌សុទ្ធសាធ មិនប៉ះពាល់ដល់កិច្ចសហប្រតិបត្តិការរបស់កម្ពុជាជាមួយដៃគូដទៃទៀតទេ។

ថ្លែងក្នុងវីដេអូបទសម្ភាសន៍ពីវឌ្ឍនភាពរបស់ស៊ីម៉ាក់នឹងត្រូវបានផ្សព្វផ្សាយនៅថ្ងៃទី៤ ខែមករា ឆ្នាំ២០២៥ លោក ហេង រតនា បានលើកឡើងថា រដ្ឋាភិបាលអាណិត្តទី៧គឺនៅតែបន្តសកម្មភាពនៃរដ្ឋាភិបាលអាណត្តិមុនដោយបន្តជួយលើអ្នកដោះមីនអ៊ុយក្រែនដដែលក្នុងសកម្មភាពនៃការពង្រឹងកិច្ចសហប្រតិបត្តិការអន្តរជាតិ។

លោកបន្ថែមថា៖ «សម្ដេចធិបតីលោកកបន្តខិតខំជំរុញឱ្យបន្តលើកិច្ចការមនុស្សធម៌នេះដែលជាភារកិច្ចមួយសំខាន់ដែលយើងបន្តកិច្ចសហប្រតិបត្តិការ។  ជៀសវាងការយល់ច្រលំការធ្វើកិច្ចសហប្រតិបត្តិការជាមួយអ៊ុយក្រែន ជាកងទ័ព ជាកម្លាំងប្រដាប់អាវុធអីយើងអត់ទេ! យើងធ្វើតែមនុស្សធម៌សុទ្ធសាធ»។

បើតាមលោក ហេង រតនា កិច្ចការមនុស្សធម៌នេះកម្ពុជាធ្វើជាមួយគ្រប់បណ្ដាប្រទេសដែលអាចជួយបាន។ លោកបន្ថែមថានៅឆ្នាំនេះកម្ពុជានឹងពង្រីកការបណ្ដុះបណ្ដាលទៅកាន់ប្រទេសនៅតំបន់អាហ្វ្រិកថែមទៀតផងដែរ។

កន្លងទៅកម្ពុជាបានបញ្ជូនអ្នកដោះមីនទៅក្រៅប្រទេសក្រោមឆ័ត្ររបស់អង្គការសហប្រជាជាតិ ទោះជាយ៉ាងណាក្រោយផ្ទុះសង្គ្រាមរុស្ស៊ី-អ៊ុយក្រែន និងតាមរយៈគំនិតផ្ដួចផ្ដើមនិងសម្របសម្រួលពីប្រទេសជប៉ុន កម្ពុជាក៏បានបញ្ជូនទៅជួយបណ្ដុះបណ្ដាលអ្នកដោះមីនអ៊ុយក្រែននៅប្រទេសអ៊ុយក្រែនផងដែរនៅឆ្នាំ២០២២។

ក្នុងជំនួបមួយរវាងឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រីលោក វង្សី វិស្សុត រដ្ឋមន្ត្រីទីស្តីការគណៈរដ្ឋមន្ត្រីជប៉ុនលោក HAYASHI Yoshimasa នៅប្រទេសជប៉ុនកាលពីល្ងាចថ្ងៃទី៤ ខែមករា ឆ្នាំ២០២៥ ភាគីទាំងពីរបានពិភាក្សាគ្នាកិច្ចសហប្រតិបត្តិការទ្វេភាគីនៃប្រទេសទាំងពីរក្នុងនោះក៏មានពាក់ព័ន្ធការជួយដោះមីននៅប្រទេសទី៣ផងដែរ។

អ្នកវិភាគសង្គមសេដ្ឋកិច្ចលោកបណ្ឌិត ជ័យ តិច មានប្រសាសន៍ថាការបន្តផ្ដល់ជំនួយបច្ចេកទេសលើវិស័យមីននេះបានបង្ហាញពីសកម្មភាពរបស់កម្ពុជាក្នុងការគាំទ្រដល់កិច្ចការមនុស្សធម៌លើពិភពលោក។ លោកយល់ថាកម្ពុជាទទួលបានផលចំណេញច្រើនលើទំនាក់ទំនងការបរទេសដោយសារការជួយនេះ។  

លោកបណ្ឌិត ជ័យ តិច៖ «ជាផលប្រយោជន៍ដែលអន្តរជាតិ​នឹង​មើលមកកម្ពុជាក្នុងផ្លូវល្អ ក្នុងការងារមនុស្សធម៌ បង្កើននួវទំនាក់ទំនងអន្តរជាតិ គោលនយោបាយការបរទេស​កម្ពុជា បង្កើនភាពស្និតស្នាលជាមួយបណ្ដាប្រទេសផ្សេងៗដែលអាច​ផ្សាភ្ជាប់ទៅនឹងវប្បធម៌សេដ្ឋកិច្ច និងកិច្ចការងារទំនាក់ទំនងអន្តរជាតិ ហើយកម្ពុជាក៏អាចផ្លាស់ប្ដូរបច្ចេកទេសបទពិសោធន៍ថ្មីៗផ្សេងៗទៀតផងដែរទាក់ទងនឹងវិស័យមីននេះ»។

បន្ទាប់ពីមានសង្គ្រាមជាមួយរុស្ស៊ី ប្រទេសអ៊ុយក្រែនបានក្លាយជាប្រទេសមួយដែលមានមីនច្រើនជាងគេ។ តាមរយបាយការណ៍ប្រទេសនេះមានចំការមីនប្រមាណ២លានចំការមីន ដែលគ្របដណ្ដប់លើផ្ទៃដីជាង៤០%នៃផ្ទៃប្រទេសគំរាមកំហែងដល់ជនស៊ីវិលជាខ្លាំង៕

អត្ថបទដោយ ហ៊ុន សិរីវឌ្ឍន៍