លោកស្រី ជា សិរី៖ សេដ្ឋកិច្ចកម្ពុជា រំពឹងងើបឡើង តែស្ថិតក្នុងភាព​មិនច្បាស់លាស់ច្រើន

លោកស្រីបណ្ឌិត ជា សិរី ឧបការីទេសាភិបាល និងជាអគ្គនាយកបច្ចេកទេស ធនាគារជាតិ​នៃកម្ពុជា បានលើក​ឡើងថា នៅឆ្នាំ២០២៣នេះ សេដ្ឋកិច្ចកម្ពុជា ត្រូវបានរំពឹងថា នឹងបន្តងើបឡើងថែមទៀត ប៉ុន្តែក៏ប្រឈម​នឹងភាព​មិនច្បាស់លាស់ច្រើនដែរ ដោយសារភាពមិនប្រាកដប្រជានៃសេដ្ឋកិច្ចពិភពលោក ជាពិសេសការថយ​ចុះកំណើន​នៅក្នុងប្រទេសអភិវឌ្ឍន៍ដែលកម្ពុជា នាំទំនិញចេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងរបស់លោកស្រីបណ្ឌិត ជា សិរី កាលពីថ្ងៃទី៧ ខែកម្ភៈឆ្នាំ២០២៣ ក្នុងជំនួបពិភាក្សាការងារជាមួយលោក Dominic Williams ឯកអគ្គរាជទូតចក្រភពអង់គ្លេសប្រចាំនៅកម្ពុជា។

នៅក្នុងជំនួបនេះ លោកស្រីបណ្ឌិត ជា សិរី បានលើកឡើងថា សេដ្ឋកិច្ចកម្ពុជា បានទទួលផលប៉ះពាល់ពីវិបត្តិកូវីដ-១៩ ជាពិសេស នៅឆ្នាំ២០២០ ហើយបានងើបឡើងវិញជាបន្តបន្ទាប់ ដែលគាំទ្រដោយប្រសិទ្ធភាព​នៃការគ្រប់គ្រងការរាល​ដាលជំងឺកូវីដ-១៩ និងការចាក់វ៉ាក់សាំងការពារបានគ្រប់គ្រាន់យ៉ាងឆាប់រហ័ស ដោយរដ្ឋាភិបាល បានបើកប្រទេស​ឡើងវិញនៅឆ្នាំ២០២១ ដែលធ្វើឱ្យសកម្មភាពសេដ្ឋកិច្ចក្នុងស្រុកត្រឡប់មកប្រក្រតីភាពវិញ។

លោកស្រីបណ្ឌិតបានបន្តទៀតថា នៅឆ្នាំ២០២២ កម្ពុជា បានទទួលរងផលប៉ះពាល់ពីការកើនឡើងនៃអតិផរណា ដែលបណ្តាលមកពីការកើនឡើងថ្លៃប្រេង និងម្ហូបអាហារ ក្រោមឥទ្ធិពលនៃសង្គ្រាមរុស្សី អ៊ុយក្រែន ប៉ុន្តែកម្រិត​អតិផរណា​បានធ្លាក់ចុះមកវិញជាបន្តបន្ទាប់រហូតដល់កម្រិតប្រមាណ ៣% នៅចុងឆ្នាំ២០២២។

ដោយឡែក លោកស្រី មើលឃើញថា វិស័យទេសចរណ៍ក្នុងស្រុកបានវិលរកភាពប្រក្រតីវិញនៅឆ្នាំ២០២២ ហើយ​ភ្ញៀវទេសចរអន្តរជាតិបានកើនឡើងខ្ពស់ជាងការរំពឹងទុក ថ្វីបើនៅមានកម្រិតទាបជាងគ្រាមុនវិបត្តិក៏ដោយ។

ក្រោយស្តាប់ការលើកឡើងរបស់លោកស្រី ជា សិរី លោក Dominic Williams បានអបអរសាទរចំពោះ​ការគ្រប់​គ្រងសេដ្ឋកិច្ចរបស់កម្ពុជា ដែលក្នុងនោះកំណើនបន្តងើបឡើងជាលំដាប់ អតិផរណាកើនឡើងក្នុងកម្រិតមធ្យម​ហើយ​ថយចុះយ៉ាងឆាប់រហ័ស រក្សាបានទុនបម្រុងអន្តរជាតិខ្ពស់គ្រប់គ្រាន់ ដោយប្រព័ន្ធធនាគារមានភាពធន់ និងរួម​ចំណែក​ក្នុងការគាំទ្រកំណើន និងកាត់បន្ថយផលប៉ះពាល់នៃវិបត្តិទាំងកូវីដ-១៩ និងរលកអតិផរណា។

ស្របពេលនេះដែរ លោកស្រី ជា សិរី បានស្នើឱ្យស្ថានទូតអង់គ្លេស បង្កើតឱកាសវិនិយោគនៅកម្ពុជា និងបង្កើនតម្រូវ​ការនាំទំនិញពីកម្ពុជា បន្ថែមទៀត។

សូមបញ្ជាក់ថា ក្រសួងសេដ្ឋកិច្ច និងហិរញ្ញវត្ថុ មានសុទិដ្ឋិនិយមថា អតិផរណារបស់កម្ពុជា នៅឆ្នាំ២០២៣នេះ នឹងអាច​គ្រប់គ្រង់បានក្នុងរង្វង់២,៥ភាគរយ  ខណៈឆ្នាំ២០២២កន្លងទៅឡើងដល់៥,៤ភាគរយ ។ ចំណែកកំណើន​សេដ្ឋកិច្ចត្រូវ​បានទម្លាក់ការព្យាករណ៍ពី៦,៦%ថយមកត្រឹម ៥,៦%វិញ៕ សំអឿន