ព័ត៌មានជាតិ

ជនជាតិចិន១៦នាក់ទៀត ត្រូវបានបណ្តេញចេញនិងហាមចូលកម្ពុជារយៈពេល៣ឆ្នាំ

បានផុស

៥ years មុន

នៅ

ថ្ងៃអង្គារ ១២ មករា ២០២១

ដោយ

ភ្នំពេញ ៖ លោក ឧត្តមសេនីយ៍ឯក កែម សារិន ប្រធាននាយកដ្ឋានស៊ើបអង្កេត និងអនុវត្តនីតិវិធីនៃអគ្គនាយកដ្ឋានអន្តោប្រវេសន៍បានមានប្រសាសន៍ថា ជនជាតិចិនចំនួន១៦នាក់ ដែលបានបណ្តេញចេញពីកម្ពុជា គឺមានជាប់ពាក់ព័ន្ធនឹងបទល្មើសបង្ករបួសស្នាមដោយចេតនា និងបង្ខាំងមនុស្សជម្រិតទារប្រាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឧត្តមសេនីយ៍ឯកបន្តថា ការបណ្តេញនេះ ធ្វើឡើងតាមប្រកាសរបស់ក្រសួងមហាផ្ទៃ ដោយហាមចូលប្រទេសរយៈពេល ០៣ឆ្នាំ តាមជើងយន្តហោះលេខ ZH9046 វេលាម៉ោង ១៦និង៣០នាទីថ្ងៃទី១១ ខែមករា ឆ្នាំ២០២១ ទៅប្រទេសដើមវិញ។

លោកឧត្តមសេនីយ៍ឯកបានបន្តទៀតថា ការបណ្តេញចេញនេះយើងបានសហការជាមួយប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិភ្នំពេញ នៃនាយកដ្ឋានច្រកទ្វារទី១ ដោយមានការចូលរួមពីតំណាងស្ថានទូតចិន និងសមត្ថកិច្ចនគរបាលសាធារណរដ្ឋប្រជាមានិតចិន ផងដែរ។

លោក កែវ វណ្ណថន អ្នកនាំពាក្យអគ្គនាយកដ្ឋានអន្តោប្រវេសន៍ បានឲ្យដឹងថា គិតចាប់តាំងពីឆ្នាំ២០១៤ មកដល់ឆ្នាំ២០២០នេះ ជនជាតិចិន ដែលកម្ពុជា បានបណ្តេញ មានចំនួន ៣,១១៣នាក់ ក្នុងនោះមានស្រី៥២៤នាក់។ ជនជាតិចិនប្រមាណជាង៣ពាន់នាក់ដែលបណ្តេញចេញពីកម្ពុជានេះ ភាគច្រើន ប្រព្រឹត្តបទល្មើសដូចជា ការឆបោកតាមប្រព័ន្ធទូរគមនាគមន៍ និងល្បែងអនឡាញ ការស្នាក់នៅខុសច្បាប់ និងការលួចឆ្លងដែនខុសច្បាប់ជាដើម៕
ដោយ ៖ សំអឿន