អាជ្ញាធរយករថយន្តពន្លត់អគ្គិភ័យដឹកទឹកស្រោចដើមឈើអមសង្ខាងផ្លូវ

អាជ្ញាធរខណ្ឌច្បារអំពៅ រាជធានីភ្នំពេញបានសម្រេចចិត្តយករថយន្តពន្លត់អគ្គិភ័យដឹកទឹកយកទៅស្រោចដើមឈើដែលបានដាំនៅអមសង្ខាងផ្លូវជាតិលេខ១ ក្នុងភូមិសាស្ត្រខណ្ឌច្បារអំពៅ រាជធានីភ្នំពេញ។

លោក គុយ គឹមហ៊ាង នាយករងរដ្ឋបាលសាលាខណ្ឌច្បារអំពៅបានឲ្យដឹងនៅរសៀលថ្ងៃទី ១ ខែមីនានេះថា ដោយអនុវត្តតាមការណែនាំពីលោក ចេង មុនីរ៉ា អភិបាលនៃគណអភិបាលខណ្ឌច្បារអំពៅលោកបានដឹកនាំកម្លាំងប្រជាការពារសាលាខណ្ឌច្បារអំពៅធ្វើពលកម្មប្រមូលសំរាម និងយករថយន្តពន្លត់អគ្គិភ័យដែលប្រចាំការ២៤​ លើ ២៤​ម៉ោងនៅសា​លាខណ្ឌដឹកទឹកមកស្រោចដើមឈើដែលបានដាំដុះកន្លងមកឲ្យរស់លូតលាស់ហើយដើមឈើដែលដាំអម​សង្ខាងផ្លូវជាតិលេខ១ចាប់ពីសង្កាត់និរោធដល់សង្កាត់ក្បាលកោះព្រំប្រទល់ស្រុកកៀនស្វាយខេត្តកណ្តាលនេះគឺប្រភេទដើម (សាគូរ៉ា) ទាំងអស់។

លោកនាយករងរដ្ឋបាលសាលាខណ្ឌច្បារអំពៅ បានសំណូមពរដល់អាជ្ញាធរសង្កាត់ក៏ដូចជាបងប្អូនប្រជាពលរដ្ឋរស់នៅតាមបណ្តោយផ្លូវជាតិលេខ១ជួយថែទាំដើមឈើដែលសាលាខណ្ឌបានដាំដើម្បីឲ្យដុះលូតលាស់ល្អនិងជាម្លប់សម្រាប់ឲ្យអ្នកដំណើរបានឈប់ជ្រកក្រោមកំដៅថ្ងៃ។ ហើយជាងនេះគឺសូមបងប្អូនជួយទុកដាក់សំរាមមុខផ្ទះឲ្យបានត្រឹមត្រូវ ចៀស​វាង​​ដាក់ចោលហើយពេលខ្យល់បោកបក់នាំឲ្យហើរប្រសេចប្រសាចពេញលើដងផ្លូវនោះ។ ព្រោះផ្លូវជាតិលេខ១សម្បូទៅដោយភ្ញៀវទេសចរណ៍ឆ្លងកាត់ទៅប្រទេសវៀតណាម៕

អត្ថបទ៖ នរា