លោកជំទាវ ម៉ែន សំអន ៖ ការផ្សារភ្ជាប់ទំនាក់ទំនង គឺជាការជំរុញឲ្យមានការផ្លាស់ប្តូរទស្សនកិច្ចស្វែងយល់អំពីស្ថានភាពពិត

លោកជំទាវ ម៉ែន សំអន ឧបនាយករដ្ឋមន្ត្រី និងជាសមាជិករដ្ឋសភា នៃព្រះរាជាណាចក្រកម្ពុជា បានថ្លែងថា ការផ្សារភ្ជាប់ទំនាក់ទំនងឲ្យកាន់តែជិតស្និទ្ធរវាងប្រទេស និងប្រជាជនទាំងពីរ ជាពិសេសតាមរយៈការជំរុញឲ្យមានការផ្លាស់ប្តូរទស្សនកិច្ច ដើម្បីស្វែងយល់អំពីស្ថានភាពពិតនៃវឌ្ឍនភាពរីកចម្រើនរបស់ប្រទេសកម្ពុជា ដូចទស្សនកិច្ចរបស់សមាជិកព្រឹទ្ធសភាកាណាដា នាឱកាសនេះគឺជាទំនាក់ទំនងដ៏ល្អប្រសើរបំផុត។

លោកជំទាវ ថ្លែងបែបនេះ ខណៈទទួលជួបសំណេះសំណាល និងពិភាក្សាការងារជាមួយនឹងលោក វ៉ិចទ័រ អូ សមាជិកព្រឹទ្ធសភាកាណាដា ដែលបានអញ្ជើញមកបំពេញទស្សនកិច្ចនៅកម្ពុជា​ កាលពីរសៀល ថ្ងៃទី ២ ខែមីនា ឆ្នាំ ២០២៣​។

លោកជំទាវ បានសម្តែងនូវការស្វាគមន៍ ចំពោះការអញ្ជើញមកបំពេញទស្សនកិច្ចរបស់លោក វ៉ិចទ័រ អូ មកកាន់ព្រះរាជាណាចក្រកម្ពុជា។​ ជាមួយគ្នានេះផងដែរ លោកជំទាវបានជម្រាបអំពីស្ថានភាពនយោ​បាយ និងស្ថានភាពសេដ្ឋកិច្ច របស់ព្រះរាជាណាចក្រកម្ពុជាជូនដល់គណៈប្រតិភូ និងបានលើកឡើងផងដែរអំពីសក្តានុពល នៃកិច្ចសហប្រតិបត្តិការទ្វេភាគីលើវិស័យនានា សំដៅធ្វើយ៉ាងណាដើម្បីផ្សារភ្ជាប់ទំនាក់ទំនងឲ្យកាន់តែជិតស្និទ្ធរវាងប្រទេស និងប្រជាជនទាំងពីរ ជាពិសេសតាមរយៈការជំរុញឲ្យមានការផ្លាស់ប្តូរទស្សនកិច្ច ដើម្បីស្វែងយល់អំពីស្ថានភាពពិត នៃវឌ្ឍនភាពរីកចម្រើនរបស់ប្រទេសកម្ពុជា ដូចទស្សនកិច្ចរបស់សមាជិកព្រឹទ្ធសភាកាណាដា នាឱកាសនេះ។

ជាការឆ្លើយតបលោក វ៉ិចទ័រ អូ បានកោតសសើរដល់រាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោ ហ៊ុន សែន ដែលបានដឹកនាំប្រទេសឆ្ពោះទៅរកការអភិវឌ្ឍលើគ្រប់វិស័យ។ ជាពិសេស ការទប់ស្កាត់នូវការឆ្លងរីករាលកូវីដ-១៩ រហូតក្លាយជាប្រទេសដែលឈានមុខគេ ក្នុងការងើបចេញពីវិបត្តិកូវីដ-១៩ និងបានបើកដំណើរការប្រទេសឡើងវិញ។ លោក វ៉ិចទ័រ អូ ក៏បានបន្តទៀតថា ទំនាក់ទំនងទ្វេភាគីកាណាដា-កម្ពុជា បានគូសបញ្ជាក់អំពីចំណងមិត្តភាពរឹងមាំរវាងរដ្ឋាភិបាល, ប្រជាជន និងប្រទេសទាំងពីរ ដែលមានតាំងពីយូលង់មកហើយ។

លោកជំទាវ ក៏បានថ្លែងអំណរគុណដល់លោក វ៉ិចទ័រ អូ ចំពោះការបំពេញទស្សនកិច្ចនៅកម្ពុជា និងជូនពរដល់ប្រតិភូស្នាក់ទៅប្រកបដោយផាសុខភាព និងត្រលប់ទៅកាន់មាតុប្រទេសវិញប្រកបដោយសុខសុវត្ថិភាព៕

អត្ថបទ៖ វិមាន