អតីតចៅអធិការ វត្តកំពូលពេជ្រ ហេង សាវ៉ុន ព្រះរាជាគណៈថ្នាក់កិត្តិយស ឧត្តមទីប្រឹក្សាសម្តេចព្រះសង្ឃនាយក នៃព្រះរាជាណាចក្រកម្ពុជា ដែលស្លៀកពាក់ស៊ីវិលដើរផឹកស៊ី ពេលយប់ត្រូវបានមន្ត្រីសង្ឃសម្រេចផ្សឹកហើយ។

អតីត ភិក្ខុ ហេង សាវ៉ុន ព្រះគ្រូចៅអធិការ វត្តកំពូលពេជ្រ បានយល់ព្រម ដោយស្ម័គ្រចិត្ដសម្រេចលាចាកសិក្ខាបទនៅព្រឹកថ្ងៃទី ០៣ ខែមីនា ឆ្នាំ២០២៣ ស្ថិតនៅវត្តដំណាក់ត្រាច ស្រុកភ្នំស្រួច ខេត្តកំពង់ស្ពឺ។

កាលពីពេលកន្លងទៅនេះ ភិក្ខុ ហេង សាវ៉ុន ព្រះគ្រូចៅអធិការ វត្តកំពូលពេជ្រ ជាទីប្រឹក្សាសម្តេចសង្ឃ បានលួចដោះស្បង់ ស្លៀកខោអាវ ចូលហាងផឹកស៊ី ស្រីទាំងកណ្តាលយប់ ត្រូវបានតាមទាន់ និងបែកធ្លាយរូបភាព។ ក្រោយពេលបែកធ្លាយសកម្មភាព ស្លៀកពាក់ស៊ីវិល ដើរផឹកស៊ីពេលយប់នោះ ត្រូវបាន ព្រះមេគុណ ព្រះអនុគណ នូ ជិន ព្រះមន្រ្តីសង្ឃ សាំង សឿន បាននិមន្តឲ្យចូលមកសារភាពកំហុស និងទទួលយកកំហុសខាងលើ។

បន្ទាប់មានការសាកសួរករណីអតីត ភិក្ខុ ហេង សាវ៉ុន ចៅអធិការវត្តរូបនេះ លួចដោះស្បង់ ស្លៀកខោអាវ ចូលហាងផឹកស៊ី នៅព្រឹកថ្ងៃទី០៣ ខែមីនា ត្រូវរៀបចំពិធីផ្សឹកដោយបុគ្គលរូបនោះ បានទទួលកំហុសរបស់ខ្លួនដែលបានប្រព្រឹត្តកន្លងមក៕

អត្ថបទ៖ ភួង រដ្ឋា