ក្រុមហ៊ុនសហគ្រាសមានបុគ្គលិកចាប់ពី១នាក់ឡើង ត្រូវមានកាតព្វកិច្ចចុះបញ្ជីការ បសស

ប្រធាននាយកដ្ឋានបុគ្គលិកនៃបេឡាជាតិសន្តិសុខសង្គម(បសស) បានលើកឡើងថា ជាគោលការណ៍ទៅតាមលិខិត​បទដ្ឋានគតិយុត្ត​​​ គ្រប់ក្រុមហ៊ុន សហគ្រាស ស្ថាប័នដែលប្រើប្រាស់បុគ្គលិកចាប់ពីម្នាក់ឡើងទៅ គឺត្រូវមាន​កាតព្វ​កិច្ចចុះបញ្ជីការ បសស។ សូម្បីតែ បសស ខ្លួនឯង ក៏ធ្វើការចុះបញ្ជីផងដែរ។ នេះបើតាមការបញ្ជាក់របស់លោក សុខ បូរ៉ា ប្រធាននាយកដ្ឋានបុគ្គលិកនៃបេឡាជាតិសន្តិសុខសង្គម នៅថ្ងៃទី ០៣ ខែ មីនា ឆ្នាំ ២០២៣។

ទន្ទឹមនឹងនេះលោក លើកឡើងថា រាជរដ្ឋាភិបាលបានការពារដល់អ្នកធ្វើការនៅតាមផ្ទះឱ្យមានសិទ្ធិពេញលេញ ក្នុងការទទួលបានបណ្ណ បសស។ ស្របពេលជាមួយគ្នានេះ លោក បូរ៉ា បានអំពាវនាវដល់ម្ចាស់ផ្ទះ ឱ្យចុះបញ្ជីចូលជាសមាជិក បសស ដើម្បីទទួលបានការការពារ និងអត្ថបទប្រយោជន៍ដល់អ្នកបម្រើការងារក្នុងផ្ទះ។

បើតាមលោក សុខ បូរ៉ា ក្រោយពេលចុះបញ្ជីនេះ នឹងទទួលបានការការពារលើគ្រោះថ្នាក់ការងារ សុខភាព និងរបបសោធននិវត្តន៍ ពី បសស។

លើសពីនេះទៀត បសស ក៏កំពុងសិក្សាលើបុគ្គលស្វ័យនិយោជន៍ ពោលគឺអ្នកដែលប្រកបអាជីវកម្មគ្មានការគ្រប់​គ្រងដោយ​និយោជក ដូចជា មុខរបរលក់ដូរតាមចិញ្ចើមថ្នល់តូចតាច លក់លៀសហាល ប៉េងប៉ោង និងផ្សេងៗទៀត ប្រមាណ ៧លាន ទៅ៨លាននាក់ ដែលមិនទាន់បានចូលនៅពេលខាងមុខ។ នេះជាការបញ្ជាក់បន្ថែមរបស់លោក សុខ បូរ៉ា នៅក្នុងសិក្ខាសាលាបណ្តុះបណ្តាលស្តីពី របបសន្តិសុខសង្គម ជូនដល់អ្នកសារព័ត៌មាន ក្រោមគម្រោងគាំពារ​សង្គមប្រកបដោយបរិយាបន្ន ដែលឆ្លើយតបទៅនឹងតម្រូវការរបស់កម្មករនិយោជិត ក្នុងវិស័យកាត់ដេរ៕