ព័ត៌មានជាតិ

ក្រសួងពាណិជ្ជកម្ម ជំរុញការលក់ផលិតផលខ្មែរតាមស្ថានីយប្រេងឥន្ធនៈ

បានផុស

៣ years មុន

នៅ

ថ្ងៃសុក្រ ១០ មីនា ២០២៣

ដោយ

ក្រោមកម្មវិធីស្តីពី«កិច្ចសហការជំរុញ និងបង្កើនផលិតផលខ្មែរតាមស្ថានីយប្រេងឥន្ធនៈភីធីធី នៅតាមបណ្ដារាជធានី-ខេត្ត» អគ្គនាយកដ្ឋានជំរុញពាណិជ្ជកម្មនៃក្រសួងពាណិជ្ជកម្ម បានសហការជាមួយក្រុមហ៊ុន ភីធីធី(ខេមបូឌា) ដើម្បីអនុវត្តគម្រោងការដាក់លក់ផលិតផលខ្មែរនៅតាមស្ថានីយសាខារាជធានី-ខេត្ត ទាំង ១៦ របស់ក្រុមហ៊ុន។

ក្រោមការសហការរវាងក្រសួងពាណិជ្ជកម្ម និងក្រុមហ៊ុនភីធីធី គម្រោងនេះរៀបចំឡើងដើម្បីជួយជ្រំជ្រែង លើកកម្ពស់ផលិតផលខ្មែរ ដែលជាផលិតផលលក្ខណៈគ្រួសារតូចៗលើទីផ្សារក្នុងស្រុក ក៏ដូចជាការអភិវឌ្ឍវិស័យពាណិជ្ជកម្មកម្ពុជា នៅលើមូលដ្ឋានតម្លាភាព និងផលប្រយោជន៍សហគមន៍។ ម្យ៉ាងវិញទៀតកម្មវិធីមួយនេះ ក៏ធ្លាប់បានអនុវត្តន៍នឹងទទួលបានជោគជ័យម្តងរួចមកហើយកាលពីឆ្នាំ២០២២ កន្លងទៅ នៅរាជធានី-ខេត្តចំនួន ១១ និងស្ថានីយឥន្ធនៈប្រមាណ ២០។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាថ្មីម្ដងទៀត ក្នុងឆ្នាំ២០២៣ នេះ ក្រសួងពាណិជ្ជកម្ម និងក្រុមហ៊ុន ភីធីធី នឹងសហការការពង្រីកគម្រោងដដែល ជាគោលដៅបន្តចំពោះរាជធានី-ខេត្តប្រមាណ ១៦ នៅតាមស្ថានីយប្រេងឥន្ធនៈភីធីធីចំនួន ១៩បន្ថែមទៀតដូចខាងក្រោមនេះ៖

រាជធានីភ្នំពេញ នៅស្ថានីយប្រេងឥន្ធនៈភីធីធីព្រៃកី
ខេត្តកណ្ដាល នៅស្ថានីយប្រេងឥន្ធនៈភីធីធីតាខ្មៅផ្លូវជាតិលេខ ២១
ខេត្តកំពង់ចាម នៅស្ថានីយប្រេងឥន្ធនៈភីធីធីផ្ដៅជុំ២
ខេត្តក្រចេះ នៅស្ថានីយប្រេងឥន្ធនៈភីធីធីក្រុងក្រចេះ
ខេត្ត ស្ទឹងត្រែង នៅស្ថានីយប្រេងឥន្ធនៈភីធីធីក្រុងស្ទឹងត្រែងជិតរង្វង់មូលថ្មី
ខេត្តព្រៃវែង នៅស្ថានីយប្រេងឥន្ធនៈភីធីធី ស្វាយអន្ទរ
ខេត្តស្វាយរៀង នៅស្ថានីយប្រេងឥន្ធនៈភីធីធីក្រុងស្វាយរៀង
ខេត្តកំពង់ឆ្នាំង នៅស្ថានីយប្រេងឥន្ធនៈភីធីធី ឧត្តុង្គ និងភីធីធីក្រុងកំពង់ឆ្នាំង
ខេត្តពោធិ៍សាត់ នៅស្ថានីយប្រេងឥន្ធនៈភីធីធីក្រុងពោធិ៍សាត់
ខេត្តបាត់ដំបង នៅស្ថានីយប្រេងឥន្ធនៈភីធីធីអូរចារ
ខេត្តសៀមរាប នៅស្ថានីយប្រេងឥន្ធនៈភីធីធីសៀងណាំ
ខេត្តបន្ទាយមានជ័យ នៅស្ថានីយប្រេងឥន្ធនៈភីធីធីបន្ទាយមានជ័យ
ខេត្តកំពង់ស្ពឺ នៅស្ថានីយប្រេងឥន្ធនៈភីធីធី រលាំងសង្កែ និង ភីធីធីត្រាំខ្នារ
ខេត្តតាកែវ នៅស្ថានីយប្រេងឥន្ធនៈភីធីធីសុខកែវ ជិតរង្វង់មូលក្បែរផ្សាររាត្រី និងភីធីធីអង្គតាសោម
ខេត្តកំពត នៅ ស្ថានីយប្រេងឥន្ធនៈភីធីធីទីរួមខេត្តកំពត
ខេត្តព្រះសីហនុ នៅស្ថានីយប្រេងឥន្ធនៈភីធីធីឃ្លាំងលើ

តាមស្ថានីយទាំង ១៦ នឹងមានការដាក់លក់នូវផលិតផលមួយចំនួនដូចជាអាហារសម្រន់ បង្អែម ផ្លែឈើតាមរដូវកាល វត្ថុអនុស្សាវរីយ៍ សម្ភារៈធ្វើដោយដៃ និងបន្លែ ត្រី សាច់ ជាដើម។ រាល់ការដាក់តាំងបង្ហាញលក់ផលិតផលនៅតាមស្ថានីយឥន្ធនៈភីធីធី តាមគម្រោងអាចនឹងចាប់ផ្ដើមជារៀងរាល់ថ្ងៃសុក្រ-សៅរ៍-អាទិត្យ នៅក្នុងខែមីនា-ឧសភា-កញ្ញា-វិច្ឆិកា ឆ្នាំ២០២៣ ខាងមុខនេះ៕