ពីវេទិកាចែកសញ្ញាបត្រ ជូននិស្សិត​សាកលវិទ្យាល័យបៀលប្រាយជាង ៤ពាន់នាក់ នៅព្រឹកថ្ងៃទី ១៦ ខែមីនានេះ សម្ដេចតេជោ ហ៊ុន សែន នាយករដ្ឋមន្ត្រី និងជាប្រធានគណបក្សប្រជាជនកម្ពុជា បានថ្លែងថា គណបក្សប្រជាជនកម្ពុជា គឺជានិមិត្តរូបនៃការផ្លាស់ប្ដូរ មិនមែនគណបក្សផ្សេងណាមួយឡើយ។

«ពិតហើយ យើងធ្លាប់បានលឺអំពីគណបក្សខ្លះ បាននិយាយថា ពួកគេជានិមិត្តរូបនៃការផ្លាស់ប្ដូរ ក៏ប៉ុន្តែខ្ញុំសូមយកទីនេះបញ្ជាក់ថា គណបក្សប្រជាជន ដឹកនាំរដ្ឋាភិបាលទៅវិញទេ ដែលជានិមិត្តរូបនៃការផ្លាស់ប្ដូររបស់ព្រះរាជាណាចក្រកម្ពុជា »។ នេះជាការថ្លែងបែបរបស់សម្ដេចតេជោ ហ៊ុន សែន។

ជាមួយនេះ សម្ដេចប្រធានគណបក្សប្រជាជនកម្ពុជា បានបញ្ជាក់ថា មូលហេតុដែលគណបក្សប្រជាជនកម្ពុជា ដឹកនាំរាជរដ្ឋាភិបាលហ៊ានអះអាងថា គណបក្សនេះ ជានិមិត្តរូបនៃការផ្លាស់ប្ដូរ ដោយយើងបានឃើញរួចថា មានការផ្លាស់ប្ដូរពីវាលពិឃាដនៃរបបខ្មែរក្រហម មកកាន់ការរស់រានមានជីវិតឡើងវិញ ផ្លាស់ប្ដូរពីសង្រ្គាមមកកាន់សន្តិភាព ហើយផ្លាស់ប្ដូរពីភាពក្រីក្រតោកយ៉ាក មកកាន់ប្រទេសមួយមានប្រាក់ចំណូលមធ្យមកម្រិតទាប ព្រមទាំងឈានទៅដល់ការផ្លាស់ប្ដូរនៅឆ្នាំ ២០៣០ ក្លាយទៅជាប្រទេសដែលមានប្រាក់ចំណូលមធ្យមកម្រិតខ្ពស់ និងឆ្នាំ ២០៥០ ក្លាយទៅជាប្រទេសដែលមានប្រាក់ចំណូលខ្ពស់៕