គម្រោងព្រះរាជឧបត្ថម្ភវិស័យអប់រំដល់កម្ពុជា របស់ព្រះអង្គម្ចាស់ក្សត្រិយ៍ថៃ មហាចក្រី សិរិនថន

ព្រះអង្គម្ចាស់ក្សត្រិយ៍ មហាចក្រី សិរិនថន នៃព្រះរាជាណាចក្រថៃ មានគម្រោងបន្ថែមព្រះរាជឧបត្ថម្ភដល់ព្រះរាជាណាចក្រកម្ពុជាលើវិស័យអប់រំ ខណៈទ្រង់បានជួយកិច្ចការនេះអស់រយៈពេល ២០ឆ្នាំមកហើយ។ នេះតាមការផ្ដល់ព័ត៌មាន ពីក្រសួងអប់រំ យុវជន និងកីឡា នៅព្រឹកថ្ងៃទី២១ ខែមីនា ឆ្នាំ២០២៣នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសបន្ថែមព្រះរាជឧបត្ថម្ភនេះ ធ្វើឡើងនៅទីស្ដីការក្រសួងអប់រំ យុវជន និងកីឡា ក្នុងកិច្ចប្រជុំពិនិត្យលើវឌ្ឍនភាពការអនុវត្តគម្រោងព្រះរាជឧបត្ថម្ភ ស្ដីពី ការធ្វើផែនការវិស័យអប់រំ អាហារូបករណ៍ និងការសាងសង់ហេដ្ឋារចនាសម្ព័ន្ធនៅវិទ្យាស្ថានបច្ចេកវិទ្យាកំពង់ស្ពឺ និងវិទ្យាស្ថានបច្ចេកវិទ្យាកំពង់ឈើទាល ក្រោមអធិបតីភាព បណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និងភាគីគម្រោងព្រះរាជឧបត្ថម្ភ នៃព្រះរាជាណាចក្រថៃ។

ក្នុងពេលឆាប់ៗខាងមុខ ភាគីគម្រោងព្រះរាជឧបត្ថម្ភនឹងផ្ដល់ជំនួយរៀបចំទស្សនីយភាព (landscape) ក្នុងបរិវេណវិទ្យាស្ថានបច្ចេកវិទ្យាកំពង់ស្ពឺ និងសាងសង់ហេដ្ឋារចនាសម្ព័ន្ធបន្ថែមនៅវិទ្យាស្ថានទាំងពីរ ដើម្បីឆ្លើយតបនឹងកំណើនសិស្ស និស្សិត។

បណ្ឌិតសភាចារ្យ ហង់ជួន ណារ៉ុន បានគោរពថ្លៃអំណរព្រះគុណថ្វាយដល់ព្រះអង្គម្ចាស់ក្សត្រិយ៍ មហាចក្រី សិរិនថន ដែលព្រះអង្គ បានប្រទានអំណោយដ៏ថ្លៃថ្លាតាមរយៈគម្រោងព្រះរាជឧបត្ថម្ភដល់ ព្រះរាជាណាចក្រកម្ពុជា លើវិស័យអប់រំ ក្នុងការអភិវឌ្ឍធនធានមនុស្សនៅកម្ពុជាអស់រយៈពេល ២០ឆ្នាំកន្លងមក ក្នុងនោះមានសមិទ្ធផលធំៗពីរគឺ វិទ្យាស្ថានបច្ចេកវិទ្យាកំពង់ឈើទាល និងវិទ្យាស្ថានបច្ចេកវិទ្យាកំពង់ស្ពឺ។ ភាគីកម្ពុជា និងភាគីថៃ នឹងបន្តកិច្ចខិតខំរក្សានិរន្តរភាពកិច្ចសហប្រតិបត្តិការលើវិស័យអប់រំនេះ ដើម្បីចូលរួមអភិវឌ្ឍប្រទេសកម្ពុជា និងពង្រឹងចំណងទំនាក់ទំនងអន្តរជាតិដ៏រឹងមាំរវាងប្រទេសទាំងពីរ៕