ក្រសួង​សាធារណការ​និង​ដឹកជញ្ជូន​បានបញ្ជាក់ពីការ​ឃាត់អ្នក​បើកបរ​រថយន្ត​ដែល​បើកបររថយន្ត​បញ្ច្រាស​ទិស​ចរាចរណ៍​នៅលើផ្លូវល្បឿន​លឿនភ្នំពេញ-ក្រុងព្រះសីហនុ។

ក្រសួងសាធារណការ​និង​ដឹកជញ្ជូនបាន​បញ្ជាក់ថា កាលពីថ្ងៃទី១៩ និង២០ ខែមីនា ឆ្នាំ២០២៣ មានរថយន្តពីរគ្រឿងបាន​បើកបរបញ្ច្រាសទិសចរាចរណ៍លើផ្លូវល្បឿន​លឿនភ្នំពេញ-ក្រុងព្រះសីហនុ។ ក្រុមការងារផ្លូវល្បឿន​លឿន ដោយសហការជាមួយនគរបាលចរាចរណ៍ផ្លូវគោក បានធ្វើការឃាត់រថយន្តនិងអ្នកបើកបរ ដើម្បីអប់រំនិងផាកពិន័យតាមនីតិវិធីច្បាប់។

ការបើកបរបញ្ច្រាសទិសចរាចរណ៍ មិនថានៅលើផ្លូវល្បឿនលឿន ឬផ្លូវប្រភេទណានោះទេ វាជាការបំពានច្បាប់ចរាចរណ៍យ៉ាងធ្ងន់ធ្ងរ និងប្រមាថអាយុជីវិតខ្លួនឯងនិងអ្នកដទៃ។

ជាថ្មីម្តង​ទៀត ក្រសួង​បាន​អំពាវនាវសារជាថ្មីដល់បងប្អូនប្រជាពលរដ្ឋគ្រប់រូប ត្រូវចូលរួមគោរពច្បាប់ចរាចរណ៍ឱ្យបានខ្ជាប់ខ្ជួន កុំបើកបរបញ្ច្រាសទិសចរាចរណ៍ ប្រើប្រាស់គន្លងចរាចរណ៍ឱ្យបានត្រឹមត្រូវ និងជៀសវាងការប្រព្រឹត្តល្មើសនានា ដើម្បីចូលរួមរក្សាសុខសុវត្ថិភាពពេលធ្វើដំណើររបស់យើងទាំងអស់គ្នា៕