ព័ត៌មានជាតិ

អភិបាលខេត្តកែប ដឹកនាំមន្ត្រីស្វាគមន៍គណៈប្រតិភូរណសិរ្សមាតុភូមិវៀតណាម ខេត្តគៀនយ៉ាង មកសួរសុខទុក្ខ និងជូនពរដល់ថ្នាក់ដឹកនាំខេត្តកែប ក្នុងឱកាសពិធីបុណ្យចូលឆ្នាំថ្មី

បានផុស

១២ ខែ មុន

នៅ

ថ្ងៃចន្ទ ៣ មេសា ២០២៣

ដោយ

កែប ៖ នាថ្ងៃទី៣ ខែមេសា ឆ្នាំ២០២៣នេះ ឯកឧត្តម សោម ពិសិដ្ឋ អភិបាលខេត្តកែបបានថ្លែងនៅក្នុងកិច្ចទទួលស្វាគមន៍គណៈប្រតិភូរណសិរ្សមាតុភូមិវៀតណាមខេត្តគៀនយ៉ាងនោះថា ជាការពិតណាស់កាលៈទេសៈបច្ចុប្បន្ននិងអតីតកាលបានបញ្ជាក់ឲ្យឃើញថា កម្ពុជា-វៀតណាមតែងតែនៅក្បែរគ្នា ហើយបានជួបគ្នាទៅវិញទៅមកនៅក្នុងស្មារតីទទួលខុសត្រូវតែងតែសម្រេចឲ្យបានតម្រូវឆន្ទៈរួមរបស់រាជរដ្ឋាភិបាលនៃប្រទេសទាំងពីរកម្ពុជា- វៀតណាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឯកឧត្តម សោម ពិសិដ្ឋ អភិបាលខេត្តកែប ជាប្រធានគណៈកម្មាធិការរណសិរ្សមាតុភូមិកម្ពុជាខេត្តកែប បានទទួលជួបសំណេះសំណាល និងទទួលស្វាគមន៍គណៈប្រតិភូរណសិរ្សមាតុភូមិវៀតណាម ខេត្តគៀនយ៉ាង ដឹកនាំដោយឯកឧត្តមស្រី ឡេ ធី វេ សមាជិកគណៈកម្មាធិការអចិន្ត្រៃយ៍គណបក្សខេត្ត និងជាប្រធានគណៈកម្មាធិការរណសិរ្សមាតុភូមិវៀតណាម ខេត្តគៀងយ៉ាង មកសាកសួរសុខទុក្ខ និងជូនពរថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋខេត្តកែប ក្នុងឱកាសពិធីបុណ្យចូលថ្មីប្រពៃណីជាតិខ្មែរ នាពេលខាងមុខនេះ។

ទន្ទឹមនេះឯកឧត្តមអភិបាលខេត្តកែប បានសង្ឃឹមយ៉ាងមុតមាំថា ខេត្តទាំងពីរ និងពង្រឹងទំនាក់ទំនងមិត្តភាព សាមគ្គីភាពបន្ថែមទៀត នាពេលអនាគត ដើម្បីសន្តិភាព ស្ថេរភាព និងអភិវឌ្ឍន៍។

ឯកឧត្តមស្រី ឡេ ធីវេ ជួសមុខឱ្យថ្នាក់ដឹកនាំនៃខេត្តគៀនយ៉ាង ប្រទេសវៀតណាម សូមបួងសួងទេវតាឆ្នាំថ្មី ឆ្នាំថោះ តាមជួយថែរក្សា ប្រោសព្រំសព្ទសាធុការពរ ជូនដល់អភិបាលខេត្ត ថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ និងប្រជាជន ក្នុងខេត្តកែប នៃព្រះរាជាណាចក្រកម្ពុជា សូមទទួលបាននូវកម្លាំងពលំមាំមួន ជៀសឆ្ងាយពីជំងឺកាចសាហាវទាំងពួង ព្រមទាំងទទួលបាននៅជោគជ័យគ្រប់ភារកិច្ច។

ឯកឧត្តមស្រីក៏សូមឱ្យទំនាក់ទំនង និងកិច្ចសហប្រតិបតិ្តការ និងចំណងមិត្តភាព កាន់តែល្អប្រសើរទ្វេឡើង ដើម្បីភាពសុខសាន្ត និងការរីកចម្រើនទាំងផ្នែកជីវភាពរស់នៅរបស់ប្រជាជន និងផ្នែកសេដ្ឋកិច្ច ពាណិជ្ជកម្មរវាងខេត្តទាំងពីរ។