ព័ត៌មានជាតិ

ខេត្តរតនគីរីនាំចេកចេញមួយថ្ងៃជាង ៤០ តោនទៅប្រទេសវៀតណាម

បានផុស

៣ years មុន

នៅ

ថ្ងៃអង្គារ ៤ មេសា ២០២៣

ដោយ

លោក ញ៉ែម សំអឿន អភិបាលនៃគណៈអភិបាលខេត្តរតនគិរីបានបញ្ជាក់នៅក្នុងសន្និសីទនៅទីស្តីការគណៈរដ្ឋមន្ត្រីនៅព្រឹកនេះថា ចេកជាដំណាំដ៏គួរឲ្យចាប់អារម្មណ៍មួយរបស់ខេត្តរតនគិរី។ ខណៈដំណាំចេកមានការវិនិយោគដាំដុះលើផ្ទៃដីរាប់ពាន់ហិកតា ក្នុងឆ្នាំ ២០២២ ខេត្តរតនគិរីបាននាំចេញចេកទៅប្រទេសវៀតណាមបានជាង ១៣ ម៉ឺនតោន ហើយបើគិតជាមធ្យមក្នុងមួយថ្ងៃការនាំចេញមានជាង ៤០ តោន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រជាពលរដ្ឋក្នុងខេត្តសរុបជាង ២០ ម៉ឺននាក់ ក្នុងនោះ ៨២ ភាគរយប្រកបរបរធ្វើកសិកម្មជាចម្បង ខណៈសេវាកម្មមានជាង ១៧ ភាគរយ និងឧស្សាហកម្មមានតែជាង ១% ប៉ុណ្ណោះ។

លោកអភិបាលខេត្តបានបញ្ជាក់ថា ខេត្តរតនគិរីមានសក្ដានុពលទៅលើដំណាំកសិកម្ម ដំណាំកសិ-ឧស្សាហកម្ម និងដំណារួមផ្សំមួយចំនួនទៀត។ ចេកជាដំណាំដ៏មានសក្តានុពល ដែលកំពុងមានការវិនិយោគដាំដុះលើផ្ទៃដីរាប់ពាន់ហិកតានៅក្នុងខេត្ត។

លោកអភិបាលខេត្តបានបន្ថែមទៀតថា ក្រៅពីដំណាំចេក ខេត្តរតនគិរីក៏មានដាំដុះដំណាំកសិកម្មសំខាន់ៗផ្សេងទៀតក្នុងនោះស្រូវមានចំនួន ៣០ ៨៤៤ ហិកតា ស្វាយចន្ទីមានចំនួន ៦១ ៥៤៨ ហិកតា កៅស៊ូមានចំនួន ៦៦ ៦៧០ និងដំឡូងមីមានចំនួន ១៥ ៦៣២ ហិកតា។

បច្ចុប្បន្នខេត្តរតនគិរីមានក្រុមហ៊ុនទទួលបានដីសម្បទានសេដ្ឋកិច្ចសរុបមានចំនួន ២៧ ក្រុមហ៊ុន ក្នុងនោះក្រុមហ៊ុនវិនិយោគមកពីប្រទេសវៀតណាមមានចំនួន ២៣ ក្រុមហ៊ុន។ ខេត្តក៏មានរោងចក្រកែច្នៃកៅស៊ូចំនួន ៧ កន្លែង និងរោងចក្រកែច្នៃដំឡងមីចំនួន ១ កន្លែងផងដែរ៕