ព័ត៌មានជាតិ

ប្រជាពលរដ្ឋសប្បាយចិត្ត បន្ទាប់ពីអាជ្ញាធរអនុញ្ញាតឱ្យកាយផ្តាច់ទំនប់ជាផ្លូវឆ្លងកាត់ទន្លេតូចស្រុកកោះសូទិន

បានផុស

៣ years មុន

នៅ

ថ្ងៃពុធ ១២ មេសា ២០២៣

ដោយ

កំពង់ចាម ៖ អាជ្ញាធរស្រុកកោះសូទិនបានសម្រេចអនុញ្ញាត ឱ្យកាយផ្តាច់ទំនប់ដែលបានទប់ធ្វើជាផ្លូវឆ្លងកាត់ទន្លេតូច ស្ថិតនៅមុខវត្តពាមប្រធ្នោះ ភូមិពាមប្រធ្នោះ ឃុំពាមប្រធ្នោះ ក្នុងស្រុកកោះសូទិន ពីត្រើយម្ខាងមកកាន់ត្រើយម្ខាងនោះចេញហើយ បន្ទាប់ពីមានប្រជាពលរដ្ឋរស់នៅតាមដងទន្លេនេះផ្ទុះការតវ៉ាកាលពីថ្ងៃទី ១១ មេសា ម្សិលមិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក យិន វណ្ណៈ អភិបាលស្រុកកោះសូទិនបានឱ្យដឹងកាលពីថ្ងៃទី ១១ មេសាថា ករណីនេះខាងលោកបានពិភាក្សា ជាមួយអាជ្ញាធរស្រុកជាប់ទន្លេតូច របស់ខេត្តកណ្តាល និងខេត្តព្រៃវែង កាលពីថ្ងៃទី ១០ មេសាដែលប្រជាពលរដ្ឋតវ៉ាថា ទន្លេតូចគោករីងអស់ដោយសារទំនប់ កាត់ទន្លេតូចត្រង់ចំណុចខាងលើ ដែលភ្ជាប់ពីត្រើយខាងលិច ទៅខាងកើតទន្លេតូច ដែលត្រើយខាងកើតជាប់ទៅនឹងព្រែកអង់កូ ស្ថិតក្នុងភូមិកំពង់ឪជ្រឹង ឃុំពង្រ ស្រុកកោះសូទិន ដែលបានទប់ធ្វើផ្លូវឆ្លងកាត់ជាច្រើនខែមកហើយនោះ ដោយចំណុចនេះទន្លេគោកស្រាប់ងាយស្រួលធ្វើផ្លូវឆ្លងកាត់។

លោកអភិបាលបានឱ្យដឹងទៀតថា ប៉ុន្តែនៅថ្ងៃទី ១១ មេសាយើងបានយល់ព្រមឲ្យគ្រឿងចក្រកាយបើកផ្លូវទឹកហូរដូចធម្មតាវិញហើយ ដើម្បីបញ្ចៀសការតវ៉ា ឬ ស្តីបន្ទាសដោយសារទំនប់មួយនេះរបស់ប្រជាពលរដ្ឋរស់នៅខាងក្រោម។

ដោយឡែកនៅរដូវប្រាំង គឺទន្លេតូចបានគោករីងអត់ទឹកជាកង់ៗ នៅមានទឹកតែកន្លែងប្រភពទឹកជ្រៅ ជាអន្លង់ ព្រោះនៅខាងមាត់ទន្លេនេះទឹកទន្លេមេគង្គបានស្រកផុតអស់ដែរ។ ម្យ៉ាងទៀតឆ្នាំកន្លងមានភ្លៀងកក់ខែច្រើន ខុសពីឆ្នាំ២០២៣នេះមានបន្តិចបន្តួចប៉ុណ្ណោះធ្វើឱ្យរីងផ្ទុះការតវ៉ាបែបនេះ។

លោកអនុសេនីយ៍ឯក ឆាយ ម៉ាច នាយរងប៉ុស្តិ៍ព្នៅ២ ស្រុកស៊ីធរកណ្តាល ខេត្តកណ្តាល បានប្រាប់ថា ទឹកទន្លេតូចដែលប្រជាពលរដ្ឋស្នើខាងអាជ្ញាធរស្រុកកោះសូទិនកាយទំនប់ជាផ្លូវចេញនោះកាលពីថ្ងៃទី១១ ខែមេសា ទើបហូរធ្លាក់មកដល់ព្រែកសណ្តែកចម្ងាយប្រមាណ ២០ គីឡូម៉ែត្រប៉ុណ្ណោះគិតត្រឹមម៉ោងប្រមាណ ១០ ព្រឹកថ្ងៃទី ១២ មេសា គឺនៅសល់ប្រហែលពាក់កណ្តាលទៀតទើបទឹកទន្លេនេះហូរធ្លាក់ដល់ទឹកដីខាងលោក។ ខុសកាលពីទប់ទំនប់ធ្វើសង់ស្ពានដើមស្តៅ គឺទឹកហូរលឿនជាន់លិចយករបស់របរស្ទើរមិនទាន់កាលនោះ។

សូមបញ្ជាក់ថា ទន្លេតូចជាទន្លេមួយបែកចេញពីទន្លេមេគង្គ ក្នុងភូមិសាស្ត្រស្រុកកោះសូទិន ដោយហូរកាត់ទឹកដីខេត្តកណ្តាល និងខេត្តព្រៃវែង ហើយឆ្លងកាត់ប្រទេសវៀតណាម គឺនៅខែប្រាំងទន្លេបានគោក ជាអន្លើៗ មិនឱ្យធ្វើដំណើរតាមទូក កាណូត បានទេ លុះត្រានៅរដូវវស្សាទើបអាចធ្វើចរាចរឆ្លងកាត់បាន៕

ដោយ ៖ សាន វិឡែម