ប.ស.ស អំពាវនាវដល់កម្មករនិយោជិត​ប្រុងប្រយ័ត្នខ្ពស់​ចៀសវាងគ្រោះថ្នាក់ចរាចរណ៍​ពេលធ្វើដំណើរទៅស្រុក

ក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករ និយោជិត នៃបេឡាជាតិសន្តិសុខសង្គម នៃក្រសួងការងារ និងបណ្តុះបណ្តាលវិជ្ជាជីវៈ បានអំពាវនាវដល់បងប្អូនកម្មករនិយោជិត សូមឱ្យមានការប្រុងប្រយ័ត្នខ្ពស់​ចំពោះគ្រោះ​ថ្នាក់ចរាចរណ៍នាឱកាសពិធីបុណ្យចូលឆ្នាំថ្មី ប្រពៃណីជាតិខ្មែរដើម្បីទទួលបានសុវត្ថិភាពក្នុងការធ្វើដំណើរ និងជួបជុំក្រុមគ្រួសារ សាច់ញាតិ ។

យោងតាមសេចក្ដីអំពាវនាវ  ស្ដីពីការបង្ការទប់ស្កាត់ កាត់បន្ថយគ្រោះថ្នាក់ចរាចរណ៍ផ្លូវគោក  នាឱកាសពិធីបុណ្យចូល​ឆ្នាំថ្មី ប្រពៃណីជាតិខ្មែរ ចុះថ្ងៃទី១២ មេសា បានឱ្យដឹងថា ជារៀងរាល់ឆ្នាំប្រជាពលរដ្ឋខ្មែរ ក្នុងនោះក៏មាន​កម្មករ​និយោជិតផងដែរ តែងតែធ្វើដំណើរ ទៅលេងស្រុកកំណើត ឬធ្វើដំណើរកម្សាន្តពីទីកន្លែង​មួយទៅកន្លែងមួយ​ផ្សេងទៀត នាឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ជាហេតុធ្វើឲ្យចរាចរណ៍មានភាពមមាញឹកខ្លាំង ទន្ទឹមនឹងនោះ គ្រោះថ្នាក់ចរាចរណ៍ក៏កើតមានច្រើនផងដែរ។

ដើម្បីចូលរួមបង្ការទប់ស្កាត់ កាត់បន្ថយគ្រោះថ្នាក់ចរាចរណ៍ផ្លូវគោក នាឱកាសពិធីបុណ្យ ចូលឆ្នាំថ្មីប្រពៃណីជាតិខ្មែរ ខាងមុខនេះ ក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករ និយោជិត (ស.ផ.ក) នៃបេឡាជាតិ​សន្តិសុខសង្គម នៃក្រសួងការងារ និងបណ្តុះបណ្តាលវិជ្ជាជីវៈសូមអំពាវនាវដល់កម្មករ​និយោជិតដែលធ្វើដំណើរ​តាមរថយន្ត ត្រូវជ្រើសរើសរថយន្តណាដែលមានសុវត្ថិភាពហើយ ចំពោះកម្មករនិយោជិតដែលធ្វើដំណើរតាមម៉ូតូ ត្រូវមានការប្រុងប្រយ័ត្នខ្ពស់ និងត្រូវអនុវត្តវិធានការសុវត្ថិភាពដូចជាត្រូវត្រួតពិនិត្យលក្ខណៈបច្ចេក​ទេសម៉ូតូមុន​ពេលបើកបរ ជាពិសេសកង់ ចង្កូត ហ្រ្វាំង និងភ្លើងបំភ្លឺ។ ត្រូវពាក់មួកសុវត្ថិភាពឲ្យបានត្រឹមត្រូវទាំងអ្នកបើកបរ និងអ្នករួមដំណើរ។ ត្រូវបើកបរបំណែកពាក់កណ្ដាលទ្រូងផ្លូវកៀកនឹងចឹញ្ចើមផ្លូវ ឬជាផ្លូវ។ ត្រូវបត់ឆ្វេង ឬបត់ស្តាំឲ្យបានត្រឹមត្រូវ ជាពិសេសត្រូវឲ្យភ្លើងស៊ីញ៉ូ យ៉ាងតិច ២០ម៉ែត្រ។មិនត្រូវទឹកបរលើសល្បឿនកំណត់ និងបន្ថយល្បឿន ជាពិសនៅជិតផ្លូវបត់ ផ្លូវបំបែកនិងផ្លូវកោង។មិនត្រូវជែងឬវ៉ា ក្នុងស្ថានភាពគ្រោះថ្នាក់។ មិនត្រូវបើកបរស្ថិតក្រោមឥទ្ធិពលគ្រឿងស្រវឹង និងគ្រឿងញៀន។

លើសពីនេះមិនត្រូវបើកបរនៅពេលងងុយដេក មិនត្រូវខឹងឆេវឆាវ គឺត្រូវចេះអត់ធ្មត់ និងយោគយល់​អធ្យាស្រ័យគ្នា​ទៅវិញទៅមក។

បេឡាជាតិសន្តិសុខសង្គម សង្ឃឹមថា កម្មករនិយោជិតទាំងអស់ ជាពិសេសកម្មករ និយោជិតជាអ្នកបើកបរម៉ូតូ នឹងចូលរួមគោរពច្បាប់ស្តីពីចរាចរណ៍ផ្លូវគោក ក៏ដូចជាអនុវត្តតាម សេចក្តីអំពាវនាពខាងលើនេះឲ្យបានខ្ជាប់ខ្ជួន និងត្រឹមត្រូវ ដើម្បីទទួលបានសុវត្ថិភាពក្នុងការធ្វើដំណើរ និងជួបជុំក្រុមគ្រួសារ សាច់ញាតិ នាឱកាសពិធី​បុណ្យចូលឆ្នាំថ្មីប្រពៃណីជាតិខ្មែរ ខាងមុខនេះ។

យោតាមរបាយការណ៍របស់ក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិត (ស.ផ.ក) នៃបេឡាជាតិសន្តិសុខសង្គម (ប.ស.ស.)បានឱ្យដឹងថា ក្នុងត្រីមាសទី១ ឆ្នាំ២០២៣ នេះ គ្រោះថ្នាក់ចរាចរណ៍​ផ្លូវគោកបាន​កើតឡើងទៅលើបងប្អូនកម្មករនិយោជិតចំនួន ៦៣៦លើក កើនឡើងចំនួន២៦០លើក ស្មើនឹង ៧១.៨៩%បើធៀបនឹងត្រីមាសទី១ដូចគ្នាក្នុងឆ្នាំ២០២២ កន្លងទៅ។ ក្នុងនោះ មានអ្នកស្លាប់កើនឡើង ២១% អ្នករបួសធ្ងន់កើនឡើង ០.៨៤%និងអ្នករបួសស្រាលកើនឡើង ៧៨% ៕

អត្ថបទ៖ សំអឿន