តើកម្លាំងនគរបាលជាតិ ឬប៉ូលីសចរាចរណ៍ គួរមានក្រមសីលធម៌បែបណាក្នុងពេលបំពេញការងារ?

មួយរយៈចុងក្រោយនេះ ផ្ទុះមតិរិះគន់ជាច្រើនពីសំណាក់ប្រជាពលរដ្ឋជុំវិញការផាកពិន័យរបស់ប៉ូលិសចរាចរណ៍ និងការប្រើពាក្យពេចន៍ ព្រមទាំង កាយវិការមិនសមរម្យមួយចំនួនរបស់មន្ត្រីចរាចរណ៍ទៅកាន់ប្រជាពលរដ្ឋដែលជាអ្នកធ្វើដំណើរ។ តើមន្ត្រីនគរបាលជាតិ ឬ មន្ត្រីចរាចរណ៍ គួរមានក្រមសីលធម៌បែបណាខ្លះក្នុងពេលបំពេញភារកិច្ច?

បើតាមការប្រកាសរបស់ក្រសួងមហាផ្ទៃ ឆ្នាំ១៩៩៥ គឺបានបង្ហាញពីវិន័យរបស់កងកម្លាំងនគរបាលជាតិ ដោយចែងក្នុងប្រការផ្សេងៗគ្នា។ ប្រការទី១ ទាក់ទងជាមួយនឹងកាតព្វកិច្ច សីលធម៌ អាកប្បកិរិយាសំខាន់ៗដូចជា៖

-ត្រូវគោរព និងអនុវត្តដោយស្មោះត្រង់តាមកម្មវិធីនយោបាយរបស់រាជរដ្ឋាភិបាល។ បម្រើផលប្រយោជន៍ប្រជាពលរដ្ឋដោយស្មោះត្រង់ និងមិនធ្វើឱ្យប៉ះពាល់ដល់ប្រយោជន៍ប្រជាជនឡើយ។

-ត្រូវគោរព និងប្រតិបត្តិយ៉ាងម៉ឺងម៉ាត់ និងដោយសច្ចៈយុត្តិធម៌ចំពោះច្បាប់ បទបញ្ញត្តិ និងបទបញ្ជាផ្សេងៗ។

-ត្រូវបំពេញកាតព្វកិច្ចរបស់ខ្លួនជានគរបាលជាតិ។

-ត្រូវមានអាកប្បកិរិយាសុភាពរាបសារ ថ្លៃថ្នូរ និងម៉ឺងម៉ាត់ក្នុងការងារ។

-ហាមដាច់ខាត ចូលបនល្បែងស៊ីសងដោយគ្មានភារកិច្ច។

ប្រការទី២ ទាក់ទងជាមួយការស្លៀកសម្លៀកបំពាក់ឯកសណ្ឋាន៖

-ពាក់ឯកសណ្ឋានពេលបំពេញការងារ និងពាក់បានត្រឹមត្រូវតាមការកំណត់របស់ឯកសណ្ឋាន លើកលែងមានករណីកំណត់ផ្សេងពីនេះ។

-ហាមចូលកម្សាន្តក្នុងរង្គសាល ឬ ទទួលទានអាហារតាមសាធារណៈជាមួយឯកសណ្ឋានការងារ។

ប្រការ៨ ទាក់ទងជាមួយនឹងការដាក់ទណ្ឌកម្ម ក៏មានការដាក់ទណ្ឌកម្មព្រមានលើមន្ត្រីណាដែលធ្វើខុសនឹងច្បាប់មន្ត្រីនគរបាលជាតិ និងបញ្ចេញអាកប្បករិយាមិនល្អ សម្តីគ្មានសីលធម៌ ដែលធ្វើឱ្យបាត់បង់ដល់កិត្កិយស និងសេចក្តីថ្លៃថ្នូររបស់នគរបាលជាតិ ព្រមទាំងទណ្ឌកម្មក្នុងរូបភាពផ្សេងៗទៀត។

ដោយឡែក ចំពោះជំពូកទី៩ ដែលមានចែងក្នុងច្បាប់ចរាចរណ៍ផ្លូវគោក គឺចំពោះមន្រ្តីចរាចរណ៍ ត្រូវចាត់ចែងសណ្តាប់ធ្នាប់ចរាចរណ៍ឱ្យបានល្អ។ តាមដាន ល្បាត និងពិនិត្យអំពើល្មើសនឹងបទបញ្ញត្តិចរាចរណ៍ និងចំណាត់ការជាច្រើនទៀត។

យ៉ាងណាមិញ ជុំវិញនឹងបញ្ហាក្រមសីលធម៌របស់មន្រ្តីនគរបាលនេះ លោក ស ថេត អគ្គស្នងការរង និងជាស្នងការនគរបាលរាជធានីភ្នំពេញ ក៏តែងតែធ្វើការណែនាំ និងអប់រំដល់មន្ត្រីនគរបាលទាំងឡាយឲ្យរក្សា និងប្រើប្រាស់ក្រមសីលធម៌របស់ខ្លួនឱ្យបានល្អ ព្រមទាំងបម្រើប្រជាជនដោយពាក្យសម្តីមានសុជីវធម៌ និងក្រមសីលធម៌ល្អផងដែរ៕

ដោយ៖ អុន ស្រីមាន