លោកស្រី ធី សុវណ្ណថា ប្ដេជ្ញាប្រឹងប្រែងចូលរួមបម្រើប្រជាជន ក្រោយទទួលបានការតែងតាំងជាអភិបាលរងក្រុងអរិយក្សត្រ

លោកស្រី ធី សុវណ្ណថា ដែលទើបត្រូវបានតែងតាំងជាអភិបាលរងក្រុងអរិយក្សត្រ នៃខេត្តកណ្ដាល ប្ដេជ្ញាថា នឹងប្រឹងប្រែងអស់ពីលទ្ធភាពដើម្បីចូលរួមបម្រើប្រជាជន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមប្រកាសរបស់ក្រសួងមហាផ្ទៃ កាលពីថ្ងៃទី ៧ ខែមេសា ឆ្នាំ ២០២៣ បានសម្រេចថា លោកស្រី ធី សុវណ្ណថា ឋានន្តរស័ក្ដិនាយក្រមការ ថ្នាក់លេខ ៥ ជាអភិបាលរង នៃគណៈអភិបាលក្រុងអរិយក្សត្រ។

តាមរយៈទំព័រហ្វេសប៊ុករបស់ខ្លួន នៅព្រឹកថ្ងៃទី ២៨ ខែមេសានេះ លោកស្រី ធី សុវណ្ណថា បានឲ្យដឹងថា លោកស្រី មានអាយុ ២៨ឆ្នាំ ហើយកម្រិតវប្បធម៌បច្ចុប្បន្នបរិញ្ញាបត្រជាន់ខ្ពស់ និងមានបទពិសោធន៍ ១០ឆ្នាំ លើកិច្ចការរដ្ឋបាល សង្គម និងនយោបាយ។

លោកស្រី ធី សុវណ្ណថា បានថ្លែងអំណរគុណថ្នាក់ដឹកនាំរាជរដ្ឋាភិបាល ដែលបានផ្តល់ឱកាសតែង​តាំ​ង​មុខតំណែងជា អភិបាលរងក្រុងអរិយក្សត្យ ដល់លោកស្រី។ «នាងខ្ញុំសន្យាថា នឹងប្រឹងប្រែងអស់ពីលទ្ធភាព ដើម្បីចូលរួមបម្រើប្រជាជន»។ នេះជាការបេ្ដជ្ញាចិត្តរបស់លោកស្រី ធី សុវណ្ណថា។

សូមជម្រាបថា លោកស្រី ធី សុវណ្ណថា កាលពីអំឡុងឆ្នាំ ២០១៣ ធ្លាប់ជាសកម្មជនល្បីឈ្មោះមួយរូប នៃអតីតគណបក្សប្រឆាំង តែក្រោយមកលោកស្រីក៏បានចូលរួមជីវភាពនយោបាយ ជាមួយគណបក្សប្រជាជនកម្ពុជាមកទល់នឹងពេលបច្ចុប្បន្ននេះ។

កាលពីថ្ងៃទី ២៣ ខែធ្នូ ឆ្នាំ ២០២២ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បា​នចេញអនុក្រឹត្យបង្កើតក្រុងអរិយក្សត្រ នៃខេត្តកណ្ដាល ដោយកាត់យកឃុំចំនួន ៦ ពីស្រុកខ្សាច់កណ្ដាល៕