ខេត្តកែប​ផ្អាកចរាចរណ៍ ៤ ថ្ងៃចំពោះរថយន្ត​ដឹក​ជញ្ជូនរ៉ែផ្លូវ ៣៣ អា ដើម្បីប្រកួតកីឡាទ្រីយ៉ាថ្លុង

រដ្ឋបាលខេត្តកែបបាន​ប្រកាសផ្អាកចរាចរណ៍ជាបណ្ដោះអាសន្ន ចំពោះរថយន្តដឹកជញ្ជូនរ៉ែគ្រប់ប្រភេទ ដែលកំពុងធ្វើចរាចរណ៍​លើដងផ្លូវជាតិលេខ ៣៣អា ចាប់ពីថ្ងៃទី ០៥ ដល់ថ្ងៃទី ០៨ ខែឧសភា ឆ្នាំ២០២៣ ដើម្បីរៀបចំព្រឹត្តិការណ៍ប្រកួតកីឡាស៊ីហ្គេមលើកទី ៣២ លើប្រភេទកីឡាទ្រីយ៉ាថ្លុង។

សេចក្ដីជូនដំណឹងរបស់រដ្ឋបាលខេត្តបញ្ជាក់ថា «ដើម្បីរក្សាបាននូវសន្តិសុខ សុវត្ថិភាព សណ្ដាប់ធ្នាប់សាធារណៈ ចូលរួមអបអរសាទរនូវព្រឹត្តិការណ៍ស៊ីហ្គេម ជាប្រវត្តិសាស្ត្រនេះ រដ្ឋបាលខេត្តកែប សម្រេចផ្អាកជាបណ្ដោះអាសន្ននូវការដឹកជញ្ជូនរ៉ែលើកំណាត់ផ្លូវជាតិលេខ៣៣អាការដ្ឋានសំណង់ និងហាមដាច់ខាតសត្វចិញ្ចឹមគ្រប់ប្រភេទឆ្លងកាត់ដងផ្លូវ​ពិសេសចាប់ពីចំណុចមុខក្លោងទ្វារវិហារខ្មែរឥស្លាម កាត់តាមផ្សារក្ដាម ផ្លូវ1KEP1 រហូតដល់មុខសាលាខេត្តកែប ពីថ្ងៃទី ៦ ដល់ថ្ងៃទី០៨ ខែឧសភា ឆ្នាំ ២០២៣ ដោយគន្លងផ្លូវនេះ ស្ថិតក្នុងសៀគ្វីនៃការប្រកួតកីឡាស៊ីហ្គេម»។

ខេត្តកែបក៏ត្រូវបានរាជរដ្ឋាភិបាលជ្រើសរើសជា ទីតាំងសម្រាប់ការប្រកួតកីឡាស៊ីហ្គេម ប្រភេទកីឡា​ទ្រីយ៉ាថ្លុង ដែលប្រព្រឹត្តទៅចាប់ពីថ្ងៃទី០៦ ដល់ថ្ងៃទី០៨ ខែឧសភា ឆ្នាំ២០២៣៕

អត្ថបទ៖ ឡេង ដេត