ប្រធានសារមន្ទីរជាតិចង់ឃើញកូនខ្មែរម្នាក់មកសារមន្ទីរមិនតិចជាង៥ដងក្នុងមួយជីវិត

ប្រធានសារមន្ទីរជាតិ នៅក្នុងកិច្ចសម្ភាសន៍ជាមួយកម្ពុជាថ្មីបានលើកឡើងពីទស្សនៈរបស់លោកដែល ចង់ឲ្យសារមន្ទីរជាទីកន្លែងមួយពោរពេញទៅដោយភ្ញៀវទេសចរណ៍ ជាពិសេសកូនខ្មែរដែលបានសិក្សារៀនសូត្រនៅសាលានានា ចូលរួមទស្សនាសារមន្ទីរជាតិឲ្យបានច្រើនដង គឺយ៉ាងហោចណាស់ក្នុងម្នាក់ឲ្យបាន៥ដងក្នុងមួយជីវិត។

លោក ឆាយ វិសុទ្ធ ប្រធានសារមន្ទីរជាតិបានសង្កត់ធ្ងន់ថា សារមន្ទីរមិនមែនគ្រាន់តែជាកន្លែងដែលជួសជុលវត្ថុបុរាណ និងដាក់តាំងវត្ថុបុរាណប៉ុណ្ណោះទេ តែជាកន្លែងដែលបានផ្តល់នូវចំណេះដឹងនូវអ្វីដែលខ្មែរមាននៅក្នុង សារមន្ទីរដែលអាចឲ្យកូនខ្មែរចងចាំ។ លោកបានបន្ថែមថាលោកក៏មានគម្រោងបង្កើតនូវកម្មវិធីផ្សេងៗ ថ្មីៗជាច្រើនដើម្បីទាក់ទាញភ្ញៀវទេសចរណ៍ ក៏ដូចជាប្អូនៗសិស្សានុសិស្សឲ្យបានទៅចូលរួមឲ្យបានញឹកញាប់ដោយគ្មានការធុញទ្រាន់។

លោកបន្តទៀតថាការដែលមានកម្មវិធីថ្មីៗច្រើនអាចជួយជំរុញឲ្យកូនខ្មែរ ជាពិសេសសិស្សានុសិស្សចូលទស្សនាសារមន្ទីរឲ្យបានញឹកញាប់ ហើយជាក៏ជាការបណ្តុះគំនិតដល់ពួកគាត់ឲ្យចង់ស្វែងយល់ពីប្រវត្តិសាស្រ្តរបស់ជាតិយើងឲ្យបានច្រើន។ នៅក្នុងន័យនេះលោកចង់ឲ្យសិស្សានុសិស្សចូលទស្សនាសារមន្ទីរជាតិឲ្យបានយ៉ាងតិច៥ដងក្នុងមួយជីវិតរបស់ពួកគាត់ ដើម្បីឲ្យគាត់បានយល់ដឹងបន្ថែមពីប្រវត្តិវត្ថុបុរាណដែលខ្មែរមាន។

ទន្ទឹមនឹងនោះលោក ឆាយ វិសុទ្ធ ក៏បានលើកទឹកចិត្តឲ្យប្អូនៗសិស្សានុសិស្សខិតខំប្រឹងប្រែង តស៊ូរៀនសូត្រទៅលើជំនាញដែលខ្លួនមាន ហើយព្យាយាមឲ្យបានច្រើន ពិសេសផ្តល់ឱកាសឲ្យខ្លួនឯងបានសិក្សារៀនសូត្រ ស្រាវជ្រាវឲ្យលើសពីអ្វីដែលខ្លួនមាន៕

អត្ថបទ៖ គេន ម៉ាលិះ