កម្ពុជា បន្តរៀបចំពិព័រណ៍ផលិតខ្មែរ និងទំនិញនាំចេញ-នាំចូល ដើម្បីជំរុញទីផ្សារពាណិជ្ជកម្ម

ការរៀបចំពិព័រណ៍ផលិតផលខ្មែរ និងទំនិញនាំចេញ-នាំចូលកម្ពុជា លើកទី១៦ កម្រិតអន្តរជាតិ ​ដែលនឹងប្រព្រឹត្តទៅ​ចាប់ពី​ថ្ងៃ​ទី​១៥-១៨​ ខែធ្នូ ឆ្នាំ២០២៣ នៅមជ្ឈមណ្ឌលតាំង ពិព័រណ៍ និងសន្និបាតកោះពេជ្រ។ នេះបើតាមការ​ប្រកាសរបស់ក្រសួងពាណិជ្ជកម្ម។

តាមរយៈនៃការរៀបចំពិព័រណ៍​នេះ​ ក្រសួងមានរៀបចំ​ព្រឹត្តិការណ៍អមសំខាន់ៗមួយចំនួនដូចជា សិក្ខា សាលាស្តីពី ការជំរុញ​សកម្មភាព​ពាណិជ្ជកម្ម វេទិកាធុរកិច្ចនិងវិនិយោគ ជំនួបពាណិជ្ជកម្ម និងកម្មវិធីចុះអនុស្សរណៈ យោគយល់លើ​កិច្ចការ​ពាណិជ្ជកម្ម ត្រូវបានរៀបចំឡើងដើម្បីជួយគាំទ្រ និងអភិវឌ្ឍន៍វិស័យឯកជន​។

បើតាមការប្រកាសរបស់ក្រសួងពាណិជ្ជកម្ម បានបញ្ជាក់ថា ការរៀបចំព្រឹត្តិការណ៍ពិព័រណ៍នេះ​ ​ក្នុងគោលបំណងជំរុញ​សកម្មភាពពាណិជ្ជកម្ម និងវិនិយោគនៅកម្ពុជា ជាពិសេស​ជំរុញ​ការនាំចេញផលិតផល និងសេវាឱ្យដល់គោលដៅទីផ្សារ ដែលជាផ្នែកមួយជួយជំរុញកំណើន​សេដ្ឋកិច្ច​ជាតិ។ ព្រឹត្តិការណ៍ពាណិជ្ជកម្មខាងលើ ​នឹងផ្តល់នូវកាលានុវត្តភាពថ្មី ​ក្នុងការតភ្ជាប់ទំនាក់ទំនងពាណិជ្ជកម្មក្នុង​ស្រុករវាងរាជធានី-ខេត្ត ទូទាំងប្រទេសកម្ពុជា និងរវាងកម្ពុជា ជាមួយអន្តរជាតិ។

នៅក្នុងសេចក្តីប្រកាសដដែល ក្រសួងពាណិជ្ជកម្ម សូមអញ្ជើញ អ្នកវិនិយោគ ក្រុមហ៊ុន សហគ្រាស កម្ពុជា បងប្អូនផលិតករ និងពាណិជ្ជករ ដែលមានបំណងចង់​ចូលរួម​ក្នុងព្រឹត្តិការណ៍ពិព័រណ៍ផលិតផលខ្មែរ និងទំនិញ​នាំចេញ-នាំចូលកម្ពុជា លើកទី១៦ ឆ្នាំ២០២៣ ឬមាន​គម្រោង​ស្វែងរកដៃគូពាណិជ្ជកម្ម និងវិនិយោគ ឬមានគម្រោង​ចុះហត្ថលេខាលើអនុស្សរណៈយោគយល់គ្នាជាមួយ​ដៃគូ​របស់ខ្លួន សូមមកបំពេញបែបបទ ចូលរួម និងផ្ញើគម្រោង​របស់ខ្លួនមកអគ្គនាយកដ្ឋានជំរុញពាណិជ្ជកម្ម នៃក្រសួងពាណិជ្ជកម្ម ឱ្យបានមុនថ្ងៃទី១៥ ខែវិច្ឆិកា ឆ្នាំ២០២៣ ជាកំណត់៕

​