​កម្ពុជារំពឹងកំណើនទេសចរអន្តរជាតិងើបឡើងវិញ​ ក្រោយព្រឹត្តិការណ៍ស៊ីហ្គេម

ក្រោយព្រឹត្តិការណ៍ការរៀបចំព្រឹត្តិការណ៍ជាតិធំៗ​នៅកម្ពុជា ជាពិសេសការរៀបចំព្រឹត្តិការណ៍​ស៊ី​ហ្គេមដែលបានបញ្ចប់កន្លងទៅថ្មីៗនេះ ​កម្ពុជារំពឹងកំណើនទេសចរអន្តរជាតិ​មានសន្ទុះងើបឡើង​វិញ។

​លោក តុប សុភ័ក អ្នកនាំពាក្យក្រសួងទេសចរណ៍ប្រាប់កម្ពុជាថ្មីនៅថ្ងៃទី ១៩ ខែឧសភានេះថា ​នៅក្នុងឆ្នាំ ២០២៣ តាមរយៈព្រឹត្តិការណ៍ធំៗនៅកម្ពុជា ជាពិសេសព្រឹត្តិការណ៍កីឡាស៊ីហ្គេមលើកទី៣២ កម្ពុជា​អាចទទួលបានទេសចរណ៍ជាតិ និងអន្តរជាតិប្រមាណ ១៩ លាននាក់ ក្នុងនោះទេសចរណ៍​អន្តរជាតិ​ប្រមាណ ៤ លានាក់។

​អ្នកនាំពាក្យរូបនេះ បញ្ជាក់ថា សន្ទស្សន៍ទេសចរណ៍ ដែលនៅក្នុងផែនការស្តារ និងលើកស្ទួយវិស័យទេសចរណ៍អំឡុងពេល និងក្រោយវិបត្តិជំងឺឆ្លងកូវីដ១៩ នៅឆ្នាំ២០២៥ និង២០២៦ នឹងចាប់យកមកវិញនូវចំនួនភ្ញៀវទេសចរអន្តរជាតិ ៧លាននាក់មកវិញ ដូចពេលមុនវិបត្តិជំងឺកូវីដ១៩។

ឆ្នាំ​ ២០២២ កម្ពុជា​រក​ចំណូល​បាន​ប្រមាណ​ ១,៤១៥ ​លាន​ដុល្លារ​ពី​ទេសចរ​អន្តរជាតិ​ប្រមាណ​ ២,២៨​ លាន​នាក់​ ខណៈ​ទេសចរ​ជាតិ​ប្រមាណ​ ១៤ លាន​នាក់​ដែល​ដើរ​កម្សាន្ត​ទូទាំង​ប្រទេស​ បាន​ផ្តល់​ចំណូល​ប្រមាណ​ ៦៥០ ​លាន​ដុល្លារ​អាមេរិក៕

អត្ថបទ៖ ឡេង ដេត