ព័ត៌មានជាតិ

វិមានឯករាជ្យខេត្តបាត់ដំបង គ្រោងបញ្ចប់ការស្ថាបនាឲ្យរួចនៅ ១ អាទិត្យទៀតនេះ

បានផុស

៣ years មុន

នៅ

ថ្ងៃពុធ ២៤ ឧសភា ២០២៣

ដោយ

សមិទ្ធផល ៣ ដែលរដ្ឋបាលខេត្តបាត់ដំបងកំពុងសាងសង់ព្រមៗគ្នា ដែលនឹងបម្រើប្រយោជន៍សម្រាប់ប្រជាជន និងជាមុខមាត់ថ្មីបន្ថែមទៀតសម្រាប់ខេត្តបាត់ដំបង។

សមិទ្ធិផលទាំង ៣ ដែលបានកំពុងសាងសង់រួមមាន វិមានឯករាជ្យ ការកែលម្អផ្លូវក្នុងក្រុងរង្វង់មូលលោកតាដំបងក្រញួងឲ្យក្លាយជាផ្លូវស្តង់ដា ក្នុងនោះមានសម្រាប់ខ្សែរថយន្ត ខ្សែជិះកង់កម្សាន្ត និងខ្សែថ្មើជើង និងទី ៣ ការជួសជុលច្រាំងស្ទឹងសង្កែឲ្យមានសោភ័ណ្ឌភាពល្អទប់ស្កាត់ការបាក់ស្រុតនៅរដូវវស្សាបន្តទៀត។

លោក ព្រួញ រិទ្ធ ប្រធានមន្ទីរសាធារណ:ការ និងដឹកជញ្ជូនខេត្ត បានប្រាប់កម្ពុជាថ្មីយ៉ាងខ្លីដូច្នេះថា វិមានឯករាជ្យ យ៉ាងយូរ ១ សប្តាហ៍ទៀតរួចរាល់។ ច្រាំងស្ទឹងយ៉ាងយូរសប្តាហ៍ទី១ ខែកក្កដា។ ចំណែកផ្លូវក្រុង ១ ខ្សែចាប់ពីរង្វង់មូលលោកតាដំបងក្រញួង ដល់រង្វង់មូលព្រាបសក្រុមការងារកំពុងសម្រុកឲ្យហើយក្នុងពេលដំណាលគ្នាផងដែរ។

នៅព្រឹកថ្ងៃទី ២៤ ខែឧសភានេះដែរ លោកសុខ លូ អភិបាលនៃគណះអភិបាលខេត្តក៏បានចុះពិនិត្យមើលការងារសាងសង់រង្វង់មូលវិមានឯករាជ្យផងដែរ ដែលត្រូវកែលម្អក៏ដូចជាសួនច្បារជុំវិញវិមានឯករាជ្យ។

ពាក់ព័ន្ធការសាងសង់វិមានឯករាជ្យនៅលើទឹកដីខេត្តបាត់ដំបង ប្រជាពលរដ្ឋក៏បានសម្តែងក្តីរីករាយខណះដែលពួកគាត់បានលើកឡើងថា មិនដែលបានទៅលេងនិងមើលវិមានឯករាជ្យនៅឯរាជធានីភ្នំពេញឡើយ.ពេលនេះវិមានឯករាជ្យបានបង្ហាញខ្លួននៅក្បែរពួកគាត់ហើយពួកគាត់សប្បាយចិត្តហួសពីការរំពឹង។

ជាមួយគ្នានេះដែរ យុវជនសិស្សានុសិស្សក៏បានបញ្ចេញទស្សនះដូចគ្នាថា ការសាងសង់វិមានឯករាជ្យលើទឹកដីកំណើតនាពេលនេះហាក់ដូចរូបគេម្នាក់ៗកំពុងស្ថិតនៅក្នុងក្តីស្រមៃមួយ ដែលខេត្តកំណើតរបស់ពួកគេស្ថិតនៅក្នុងការត្រួតត្រាពីជនបរទេសកាលពីសម័យមុន បើទោះបីពួកគេមិនទាន់ចាប់កំណើតក៏មានការឈឺចាប់ដែរ។ ដោយសប្យាយចិត្តគ្រប់ៗគ្នា យុវជនក្មេងៗទាំងនោះបានលើកឡើងថា “នេះជាការល្អពេលពួកខ្ញុំទំនេរ ពួកខ្ញុំដើរកម្សាន្តហើយអង្គុយអានមេរៀនៅក្បែរ វិមានឯករាជ្យ ដោយមានក្តីស្រម៉ៃថាពួកខ្ញុំកំពុងនៅឯវិមានឯករាជ្យនៅរាជធានីភ្នំពេញចឹងដែរ”។

ចំណែកមន្ត្រីទេសចរណ៍ខេត្តបានលើកឡើងថា នេះជាចំណែកមួយក្នុងចំណោមផ្នែកផ្សេងទៀតដែលខេត្តបាត់ដំបងមានសម្រាប់ទាញកំណើនភ្ញៀវទេសចរកាន់តែមានកំណើនខ្ពស់ជាផលប្រយោជន៍រួម និងបានផ្តល់និងលើកកម្ពស់សេដ្ឋកិច្ចគ្រួសាររបស់ប្រជាពលរដ្ឋក្នុងក្រុងបាត់ដំបងបានយ៉ាងល្អប្រសើរបន្ថែមទៀត តាមរយះសមិទ្ធិផលថ្មីៗជាបន្តបន្ទាប់នេះ៕

អត្ថបទ៖ សៅ សារិទ្ធ