ព័ត៌មានជាតិ
ឯកឧត្តម ហ៊ុន ម៉ានី ស្នើអត្តពលិកកម្ពុជាចេះជួយគ្នាក្នុងនាមជាម្ចាស់ផ្ទះ
ប្រធានសហភាពសហព័ន្ធយុវជនកម្ពុជា ឯកឧត្តម ហ៊ុន ម៉ានី បានស្នើដល់អត្តពលិកកម្ពុជារក្សាស្មារតីចេះជួយគ្នាទៅវិញទៅមកក្នុងនាមជាម្ចាស់ផ្ទះនៃព្រឹត្តិការណ៍កីឡាអាស៊ានប៉ារ៉ាហ្គេមលើកទី១២។ ឯកឧត្តមស្នើបែបនេះក្នុងពិធីប្រគល់ថវិកា ៥០០លានរៀលដល់គណៈកម្មាធិការជាតិប៉ារ៉ាឡាំពិកកម្ពុជា នៅថ្ងៃទី២៩ ខែឧសភា ឆ្នាំ២០២៣នេះ។
ឆ្លៀតក្នុងឱកាសនោះ ឯកឧត្ដម ហ៊ុន ម៉ានី បានថ្លែងដូច្នេះថា៖«ការឈ្នះចាញ់ គឺជារឿងធម្មតា តែអ្វីដែលត្រូវប្រកាន់ខ្ជាប់របស់អត្តពលិក គឺគប្បីរក្សាស្មារតីចេះជួយយកអាសារគ្នាទៅវិញទៅមកក្នុងនាមកម្ពុជាជាម្ចាស់ផ្ទះ»។ ឯកឧត្តមបន្ថែមថា នៅពេលអត្តពលិកដែលមានពិការភាពចូលរួមប្រកួតក្នុងព្រឹត្តិការណ៍អាស៊ានប៉ារ៉ាហ្គេម ទាំងរាជរដ្ឋាភិបាល ទាំងឯកឧត្តមផ្ទាល់ ក៏ដូចជាប្រជាជនខ្មែរនឹងនៅឈរខាងក្រោយ ដោយបន្តគាំទ្រជានិច្ច និងមានមោទនភាពចំពោះអត្តពលិកកម្ពុជា បើទោះបីជាលទ្ធផលនៃការប្រកួតយ៉ាងណាក៏ដោយ។
ពាក់ព័ន្ធនឹងការប្រគល់ថវិកា គឺឯកឧត្តម ហ៊ុន ម៉ានី បានលើកឡើងថា ថ្វីត្បិតតែទំហំថវិកាបានប្រគល់នៅពេលនេះ មានចំនួនតិច ឬចំនួនច្រើនយ៉ាងណាក្ដី ក៏មិនអាចប្រៀបធៀបនឹងការលះបង់កម្លាំងកាយចិត្តក្នុងការខិតខំប្រឹងប្រែងហ្វឹកហាត់របស់អត្តពលិកគ្រប់រូបបានឡើយ។ ឯកឧត្តម បានបញ្ជាក់ថា ការបរិច្ចាគថវិកានេះ គឺជាការបង្ហាញអំពីក្តីស្រលាញ់ ការផ្ដល់កម្លាំងចិត្ត និងការគាំទ្រដោយឥតលក្ខខណ្ឌរបស់ប្រជាជនកម្ពុជាចំពោះអត្តពលិកដែលមានពិការភាពរបស់កម្ពុជា។
លើសពីនេះ ការចូលរួមបរិច្ចាគថវិកានេះទៀតសោត ក៏ជាការបង្ហាញអំពីសាមគ្គីភាព និងការរួបរួមគ្នារបស់ប្រជាជនកម្ពុជាគ្រប់ស្រទាប់វណ្ណៈក្នុងការគាំទ្រដល់អត្តពលិក តាមរយៈសកម្មភាពជាក់ស្ដែង ក៏ដូចជាបង្ហាញឲ្យពិភពលោកបានឃើញថា ប្រទេសកម្ពុជាតូច តែបេះដូងរបស់ប្រជាជនកម្ពុជាធំ។
ព្រឹត្តិការណ៍នៃការប្រកួតកីឡាជនមានពិការភាពអាស៊ានប៉ារ៉ាហ្គេម លើកទី១២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ នឹងប្រព្រឹត្តទៅចាប់ពីថ្ងៃទី៣ ដល់ថ្ងៃទី៩ ខែមិថុនា ឆ្នាំ២០២៣ ដែលមានកីឡា១៤ប្រភេទ។ ក្នុងព្រឹត្តិការណ៍កីឡានេះ មានអត្តពលិកចូលរួមចំនួនប្រមាណ២ពាន់នាក់មកពីប្រទេសចំនួន១១នៃតំបន់អាស៊ីអាគ្នេយ៍ ក្នុងនោះ អត្តពលិកកម្ពុជាមានចំនួន២៥១នាក់ផងដែរ។
ស្របពេលព្រឹត្តិការណ៍អាស៊ានប៉ារ៉ាហ្គេមលើកទី១២ ខិតជិតមកដល់ឆាប់ៗនេះ យុទ្ធនាការ Beyond the Games នៃសហភាពសហព័ន្ធយុវជនកម្ពុជា (ស.ស.យ.ក) និងដៃគូបរិច្ចាគ បានប្រគល់ថវិកាចំនួន៥០០លានរៀល ឬ ស្មើនឹងចំនួន ១២៥ ០០០ដុល្លារអាមេរិកជូនគណៈកម្មាធិការជាតិប៉ារ៉ាឡាំពិកកម្ពុជា ក្រោមកម្មវិធីបំបែកឯតទគ្គកម្មបេះដូងច្រើនជាងគេ លើពិភពលោក កាលពីថ្ងៃទី១១ ខែមេសា ឆ្នាំ២០២៣ កន្លងទៅនេះ៕
អត្ថបទ៖ ធឿន វ៉ាន់សុង / រូបភាព៖ Beyond the Games
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ៧ ថ្ងៃ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៥ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ៤ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ព័ត៌មានអន្ដរជាតិ៦ ថ្ងៃ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង