អភិបាលរងខេត្តស្វាយរៀង ជំរុញសកម្មភាពជំងឺរបេង ក្នុងផែនការវិនិយោគស្រុករមាសហែក

(ស្វាយរៀង)៖ លោកបណ្ឌិត តូច ប៉ូលីវ៉ា អភិបាលរងខេត្តស្វាយរៀង តំណាងអភិបាលខេត្ត បានដឹកនាំសិក្ខា សាលាស្ដីពី ម៉ូឌែលរបេងសហគមន៍ និងបញ្ជ្រាបសកម្មភាពរបេងក្នុងផែនការវិនិយោគឃុំទាំង១៦ របស់ស្រុករមាសហែក ដែលពិធីនេះប្រព្រឹត្តធ្វើឡើងនៅបរិវេណវិទ្យាល័យរមាសហែក ស្ថិតក្នុងស្រុករមាសហែក ថ្ងៃទី ៣០ ខែ ឧសភា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបណ្ឌិត តូច ប៉ូលីវ៉ា បានមានប្រសាសន៍ថា រាជរដ្ឋាភិបាលក្រោមការដឹកនាំដ៏ឈ្លាសវៃ របស់សម្តេចតេជោ នាយករដ្ឋមន្ត្រីកម្ពុជា តែងតែយកចិត្តបន្តជំរុញលើកកម្ពស់សុខភាពរបស់ប្រជាជនឱ្យកាន់តែទូលំទូលាយ និងបំផុសការ​យល់ដឹងការយកចិត្តទុកដាក់ក្នុងការប្រយុទ្ធនឹងជំងឺរបេង ជាពិសេសការផ្សព្វផ្សាយ​ជូនដល់ប្រជាពល​រដ្ឋឱ្យបានយល់​ដឹងអំពីទំហំនៃបញ្ហា និងផលវិបាកនៃជំងឺរបេង។

លោកបណ្ឌិត តូច ប៉ូលីវ៉ា បានបន្តថា គោលបំណងនៃសិក្ខាលាសានេះ សំដៅដល់ទិដ្ឋភាពទូទៅនៃបញ្ហាជំងឺរបេង រចនាសម្ព័ន្ធ ភារកិច្ច និងការទទួលខុសត្រូវរបស់អាជ្ញាធរឃុំលើកិច្ចការអភិវឌ្ឍ និងសេវាសង្គម ការបញ្ជ្រាប​សកម្មភាពរបេងក្នុងផែនការឃុំ និងការកំណត់សកម្មភាពអទិភាពនៃជំងឺរបេងសមស្រប នឹងតម្រូវការថវិកា​ដែលឃុំនីមួយៗអាចវិភាជន៍។ បើតាមលោក អភិបាលរងខេត្ត សិក្ខាសាលានេះ ពិតជាព្រឹត្តិការណ៍​ដ៏មានសារៈសំខាន់មួយនៃការជួបជុំគ្នា ដែលផ្តល់នូវឱកាសឱ្យថ្នាក់ដឹកនាំ មន្ត្រីរាជការ បុគ្គលិកសុខាភិបាល​គ្រប់លំដាប់ថ្នាក់ អ្នកពាក់ព័ន្ធ អាជ្ញាធរ ឃុំ និងស្រុក ជាពិសេសដៃគូអភិវឌ្ឍ ចែករំលែកបទពិសោធន៍ និងរួមសហការគ្នា ដើម្បីរៀបចំផែនការដាក់បញ្ចូលដោះស្រាយ បញ្ហាប្រឈម និងកាលានុវត្តភាព បន្តខិតខំប្រឹងប្រែង ក្នុងទស្សនៈមួយ គឺការកាត់បន្ថយអត្រាជំងឺរបេង ដើម្បីលើកកម្ពស់សុខភាព និង សុខុមាលភាព ប្រជាពលរដ្ឋឱ្យ កាន់តែប្រសើរ​ឡើងថែមទៀត។

លោក បានបន្ថែមដូច្នេះថា« យើងចូលរួមចំណែកក្នុងការលុបបំបាត់ជំងឺរបេងត្រឹមឆ្នាំ២០៣០ ដូចដែលបាន​កំណត់ក្នុងផែនការយុទ្ធសាស្ត្ររបស់ CENAT និងស្វែងរកយុទ្ធសាស្ត្រចលនាធនធានបន្ថែម និងធានាចីរភាព​នៃការឆ្លើយតបជំងឺរបេងនៅកម្រិតជាតិ ក៏ដូចជាក្នុងខេត្តស្វាយរៀង៕ ដោយ ៖ ភក្ដី