ក្រសួងមហាផ្ទៃឲ្យអង្គការCPCS បញ្ឈប់សកម្មភាពជាបន្ទាន់ពាក់ព័ន្ធការជ្រៀតជ្រែកផ្ទៃក្នុងអាស៊ាន

ក្រសួងមហាផ្ទៃបានតម្រូវឲ្យអង្គការមជ្ឈមណ្ឌលសិក្សាបណ្តុះបណ្តាលកសាងសន្តិភាព និងដោះស្រាយទំនាស់ (CPCS) បញ្ឈប់ជាបន្ទាន់នូវកិច្ចប្រជុំរបស់ខ្លួន ក្រោយកិច្ចប្រជុំនេះ អាចជាការជ្រៀតជ្រែកកិច្ចការផ្ទៃក្នុងរបស់រដ្ឋសមាជិកអាស៊ាន។

បើតាមលិខិតរបស់ក្រសួងមហាផ្ទៃ ផ្ញើជូនលោក សុត ផ្លាយប៉ោម ប្រធានអង្គការមជ្ឈមណ្ឌលសិក្សាបណ្ដុះបណ្តាលកសាងសន្តិភាព និងដោះស្រាយទំនាស់ (CPCS) នៅថ្ងៃទី៣០ ខែឧសភានេះ បានឲ្យដឹងដូច្នេះថា៖ «ក្រសួងមហាផ្ទៃ បានតម្រូវឲ្យអង្គការមជ្ឈមណ្ឌលសិក្សាបណ្តុះបណ្តាលកសាងសន្តិភាព និងដោះស្រាយទំនាស់ (CPCS) បញ្ឈប់ជាបន្ទាន់នូវកិច្ចប្រជុំស្ដីពី Review of Current Humanitarian Efforts, and Seeking Effective Ways Forward ដែលប្រព្រឹត្តទៅនៅថ្ងៃទី៣០ ដល់ថ្ងៃទី៣១ ខែឧសភា ឆ្នាំ២០២៣ នៅខេត្តសៀមរាប ដោយសារសកម្មភាពនេះ អាចជាការជ្រៀតជ្រែកកិច្ចការផ្ទៃក្នុងរបស់រដ្ឋសមាជិកអាស៊ាន»។

តាមរយៈលិខិតដែលចុះហត្ថលេខាដោយលោក ប៊ុន ហុន រដ្ឋលេខាធិការក្រសួងមហាផ្ទៃ បានបញ្ជាក់ថា សកម្មភាពរបស់អង្គការមជ្ឈមណ្ឌលសិក្សាបណ្ដុះបណ្តាលកសាងសន្តិភាព និងដោះស្រាយទំនាស់ កំពុងផ្ទុយនឹងធម្មនុញ្ញអាស៊ាន និងច្បាប់ស្តីពីសមាគម និងអង្គការមិនមែនរដ្ឋាភិបាល ព្រមទាំងលក្ខន្តិកៈរបស់អង្គការដែលបានតម្កល់ទុកនៅក្រសួងមហាផ្ទៃ។

លិខិតដដែលនេះ ក៏បានព្រមានដែរថា ក្នុងករណីមិនអនុវត្តតាមស្មារតីនៃលិខិតនេះ ក្រសួងមហាផ្ទៃ នឹងចាត់វិធានការតាមផ្លូវច្បាប់ជាធរមាន៕