ព័ត៌មានជាតិ

ទង់ជាតិអាស៊ាន១១ប្រទេសបង្ហូតជាផ្លូវការសម្រាប់អាស៊ានប៉ារ៉ាហ្គេមនៅកម្ពុជា

បានផុស

២ years មុន

នៅ

ថ្ងៃសុក្រ ២ មិថុនា ២០២៣

ដោយ

នៅព្រឹកថ្ងៃសុក្រ ទី២ ខែមិថុនា ឆ្នាំ២០២៣នេះ កម្ពុជាក្នុងនាមជាម្ចាស់ផ្ទះបានរៀបចំពិធីបង្ហូតទង់ជាតិ និងទទួលស្វាគមន៍ជាផ្លូវការនូវប្រទេសអាស៊ានទាំង១១សម្រាប់ព្រឹត្តិការណ៍កីឡាជនពិការអាស៊ីអាគ្នេយ៍ លើកទី១២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងពិធីបង្ហូតទង់ជាតិ និងទទួលស្វាគមន៍ជាផ្លូវការនេះក្រោមវត្តមានរបស់ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាតំណាងប្រតិភូកីឡាប៉ារ៉ាឡាំពិកកម្ពុជាក្នុងព្រឹត្តិការណ៍កីឡាជនពិការអាស៊ានលើកទី១២។ ជាមួយគ្នានេះក៏មាន លោក ថោង ខុន រដ្ឋមន្ត្រីក្រសួងទេសចរណ៍ អនុប្រធានអចិន្ត្រៃយ៍នៃគណៈកម្មាធិការជាតិរៀបចំការប្រកួតអាស៊ានប៉ារ៉ាហ្គេម (CAMPAGOC) លោក Osoth Bhavillai ប្រធានគណៈសហព័ន្ធកីឡាជនពិការអាស៊ាន (APFS) និងលោក យី វាសនា អគ្គលេខាធិការរង CAMPAGOC។ ជាពិសេសតំណាងប្រតិភូកីឡាជនពិការទាំង១១ប្រទេស។

បន្ទាប់ពីបញ្ចប់ពិធីបង្ហូតទង់ជាតិ និងទទួលស្វាគមន៍ ក៏ដូចជាផ្តល់វត្ថុអនុស្សាវរីយ៍ជាផ្លូវការ លោក យី វាសនា មានប្រសាសន៍ថា ប្រតិភូកីឡាជនពិការអាស៊ានទាំង១០ប្រទេសផ្សេងទៀតសប្បាយរីករាយ និងពេញចិត្តដែលបានមកចូលរួមប្រកួតអាស៊ានប៉ារ៉ាហ្គេមនៅកម្ពុជា។ ពួកគាត់ទាំងអស់គ្នាមានអារម្មណ៍កក់ក្តៅដូចជាកម្ពុជាជាផ្ទះរបស់ខ្លួន។

លោក យី វាសនា មានប្រសាសន៍ថា ៖«ព្រឹកនេះជាព្រឹកដ៏សប្បាយរីករាយដែលជាពេលវេលាផ្តល់សញ្ញាចាប់ផ្តើមហើយ។ ព្រឹកនេះយើងរៀបចំពិធីបង្ហូតទង់ជាតិបណ្តាប្រទេសទាំង១១។ យើងមានវត្តមានប្រធាន អនុប្រធាន នាយបេសកកម្មរបស់ប្រទេសទាំងអស់អញ្ជើញចូលរួម ក្រោមអធិបភាពឯកឧត្តម ហ៊ុន ម៉ានី ប្រធានសហភាពសហព័ន្ធកម្ពុជា ឯកឧត្តមបណ្ឌិត ថោង ខុន អនុប្រធានអចិន្ត្រៃយ៍ CAMPAGOC និងភ្ញៀវយ៉ាងច្រើនកុះករ។ យើងចូលរួមអបអរសាទរ និងស្វាគមន៍ភ្ញៀវជាតិ អន្តរជាតិទាំងអស់»។

«យើងឃើញថា ពួកគាត់សប្បាយរីករាយ។ អ្វីដែលខ្ញុំទទួលបានគឺពួកគាត់ប្រាប់ថា កម្ពុជាធ្វើបានយ៉ាងអស្ចារ្យ ដែលមិនទាន់មានប្រទេសណាមួយធ្វើកីឡាអាស៊ានប៉ារ៉ាហ្គេម មានស្តង់ដា និងល្អណាស់»។

កីឡាអាស៊ានប៉ារ៉ាហ្គេម លើកទី១២ នឹងចាប់ផ្តើមបើកសម្ពោធជាផ្លូវការចាប់ពីថ្ងៃទី៣ ដល់ថ្ងៃទី៩ ខែមិថុនា ឆ្នាំ២០២៣ ដែលមានកីឡា១៤ប្រភេទ ស្មើនឹង៤៣១វិញ្ញាសា៕