សម្ដេចតេជោ ហ៊ុន សែន ៖ ដំណើរការបោះឆ្នោត នឹងត្រូវប្រព្រឹត្តទៅដោយភាពស្ងប់ស្ងាត់ និងគោរពសិទ្ធិជ្រើសរើសរបស់ប្រជាជន

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានលើកឡើងថា ដំណើរការបោះឆ្នោតជ្រើសតាំង តំណាងរាស្រ្ដ នីតិកាលទី ៧ នឹងប្រព្រឹត្តទៅដោយភាពស្ងប់ស្ងាត់ គ្មានអំពើហិង្សា និងគោរពសិទ្ធិជ្រើសរើសរបស់ប្រជាជន។

ការលើកឡើងរបស់សម្ដេចតេជោ ហ៊ុន សែន បានធ្វើឡើងក្នុងពិធីបើកការដ្ឋានសាងសង់ផ្លូវល្បឿនលឿនភ្នំពេញ-បាវិត និងបើកការដ្ឋានសាងសង់​ស្ពាន​ឆ្លងកាត់ទន្លេមេគង្គ និងផ្លូវតភ្ជាប់ក្បាលស្ពាន នៅព្រឹកថ្ងៃទី ៧ ខែមិថុនា ឆ្នាំ ២០២៣ នេះ។

សម្ដេចតេជោ ហ៊ុន សែន បានថ្លែងថា ចាប់ពីថ្ងៃនេះដល់ថ្ងៃបោះឆ្នោតជ្រើសតាំង តំណាងរាស្រ្ដ នីតិកាលទី ៧ នៅសល់មិនច្រើនថ្ងៃនោះទេ។ ដូច្នេះសូមទាំងអស់គ្នា រក្សាភាពស្ងប់ស្ងាត់ និងរក្សាបរិយា​កាសនយោបាយអព្យាក្រឹត្យ សម្រាប់ការបោះឆ្នោតនាពេលខាងមុខ។

សម្ដេចតេជោ ហ៊ុន សែន បានថ្លែងបន្តថា បញ្ហាសន្តិសុខ និងសណ្ដាប់ធ្នាប់សង្គម បាននិងកំពុងត្រូវបានធានា ហើយដំណើរការបោះឆ្នោត នឹងត្រូវប្រព្រឹត្តទៅដោយភាពស្ងប់ស្ងាត់ គ្មានអំពើហិង្សា ប្រជាធិបតេយ្យ និងគោរពសិទ្ធិជ្រើសរើសរបស់ប្រជាជន។ ចំណែកឯបញ្ហាវិធានការនានា ពាក់ព័ន្ធទៅនឹងអ្នកបន្តុចបង្អាក់ការបញ្ចេញសិទ្ធិរបស់ប្រជាពលរដ្ឋ ក្នុងការបោះឆ្នោតនោះ គណៈកម្មាធិការជាតិរៀបចំការបោះឆ្នោត (គ.ជ.ប) បានបញ្ជាក់រួចហើយ។

សម្ដេចតេជោ ហ៊ុន សែន ថ្លែងបែបនេះថា «ឯរឿងវិធានការនានា ដែលគណៈកម្មាធិការជាតិរៀបចំការបោះឆ្នោត ត្រូវចាត់វិធានការចំពោះអ្នកបន្តុចបង្អាក់ នៃការអនុវត្តសិទ្ធិរបស់ពលរដ្ឋ គឺគណៈកម្មាធិការជាតិរៀបចំការបោះឆ្នោត បានបញ្ជាក់ហើយៗ ថា គេមិនទៅបោះឆ្នោតទេ ព្រោះដោយសារតែគ្មានអ្នកនេះ គ្មានអ្នកនោះ អញ្ចឹងសុំអ្នកឯងបន្តទៅ អ្នកឯងសាកលមើលថា វាត្រូវទៅដល់ណា ខាងគណៈកម្មាធិការជាតិរៀបចំការបោះឆ្នោត ច្បាស់ជាស្នើមករាជរដ្ឋាភិបាល ដើម្បីចាត់វិធានការទៅលើអ្នកណា អាហ្នឹងរឿងមួយផ្សេងទៀត»។

សម្ដេចតេជោ ហ៊ុន សែន បានបង្ហាញក្ដីសង្ឃឹមថា ប្រជាពលរដ្ឋខ្មែរគ្រប់អាយុបោះឆ្នោត ហើយមានឈ្មោះក្នុងបញ្ជីបោះឆ្នោត នឹងអញ្ជើញទៅចូលរួមការបោះឆ្នោតជ្រើសតាំង តំណាងរាស្រ្ដ នីតិកាលទី ៧ ទាំងអស់គ្នា នៅថ្ងៃអាទិត្យ ទី ២៣ ខែកក្កដា ឆ្នាំ ២០២៣ខាងមុខ៕