ព័ត៌មានជាតិ

ជប៉ុន ចូលរួមលើកកម្ពស់ និងអភិវឌ្ឍន៍ភាសាអង់គ្លេសដល់យុវជនកម្ពុជា

បានផុស

៣ years មុន

នៅ

ថ្ងៃពុធ ១៤ មិថុនា ២០២៣

ដោយ

រាជរដ្ឋាភិបាលជប៉ុន បានចូលរួមលើកកម្ពស់ និងអភិវឌ្ឍន៍ភាសាអង់គ្លេសដល់សិស្សានុសិស្សនៅសាលាមធ្យមសិក្សាទុតិយភូមិទូទាំងប្រទេសតាមរយៈកម្មវិធីសិក្សា និងសៀវភៅសិក្សាគោលភាសាអង់គ្លេសថ្នាក់ទី ១០-១២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងអប់រំ យុវជន និងកីឡា និងអង្គការគីហ្សូណា កាលពីថ្ងៃទី ១៣ មិថុនា បានដាក់ឲ្យប្រើប្រាស់កម្មវិធីសិក្សា និងសៀវភៅសិក្សាគោលភាសាអង់គ្លេសថ្នាក់ទី ១០-១២ ជាផ្លូវការ ដែលផលិតដោយ ESC-Kizuna និងមូលនិធិនីបប៉ុន។

ថ្លែងក្នុងពិធីដាក់ឲ្យប្រើប្រាស់កម្មវិធីសិក្សា និងសៀវភៅសិក្សាគោលភាសាអង់គ្លេសថ្នាក់ទី ១០-១២ លោកស្រី ទន់ សាអ៊ីម អនុរដ្ឋលេខាធិការក្រសួងអប់រំ យុវជន និងកីឡា បានមានប្រសាសន៍ថា កាលពីមុន អង្គការគីហ្សូណា បានអភិវឌ្ឍន៍កម្មវិធីសិក្សាភាសាអង់គ្លេសកម្រិតមធ្យមសិក្សាបឋមភូមិ សៀវភៅសិក្សាគោលថ្មី និងសោតុបករណ៍បង្រៀនភាសាអង់គ្លេស “English is Fun” ដែលឥឡូវនេះត្រូវបានប្រើប្រាស់នៅសាលាមធ្យមសិក្សាទុតិយភូមិទូទាំងប្រទេស។

លោកស្រីបានបន្តថា សៀវភៅសិក្សាគោលថ្មីនេះងាយស្រួលយល់ និងងាយអនុវត្តជាងសៀវភៅមុនៗ ធ្វើឲ្យចំនួនសិស្សដែលចូលចិត្តរៀនភាសាអង់គ្លេសបានកើនឡើង។

លោកស្រីបានបន្ថែមថា ជាមួយនឹងការណែនាំសៀវភៅសិក្សាគោលថ្មីទាំងនេះ វានឹងមិនមានភាពខុសប្លែកគ្នាខ្លាំងរវាងប្រជាជនរស់នៅអ្នកជនបទ និងអ្នកទីក្រុង ហើយសង្ឃឹមថា ការរៀនភាសាអង់គ្លេសមិនផ្ដោតសំខាន់តែនៅក្នុងតំបន់ទេសចរណ៍ និងទីក្រុងប៉ុណ្ណោះទេ ថែមទាំងរំពឹងថា ចំនួនអ្នកនិយាយភាសាអង់គ្លេសនឹងមានការកើនឡើងច្រើន ទូទាំងប្រទេសកម្ពុជា។

លោក អ៊ូអិណុ អាត់ស៊ូស៊ី ឯកអគ្គរដ្ឋទូតជប៉ុនប្រចាំកម្ពុជា បានសំដែងការពេញចិត្តយ៉ាងខ្លាំងដែលមូលនិធិនីបប៉ុនសហការជាមួយអង្គការគីហ្សូណា ក្នុងការអភិវឌ្ឍភាសាអង់គ្លេសក្នុងវិស័យអប់រំនៅប្រទេសកម្ពុជា។

លោកឯកអគ្គរដ្ឋទូតជឿជាក់ថា ភាសាអង់គ្លេស គឺមានសារៈសំខាន់យ៉ាងខ្លាំងសម្រាប់ក្មេងៗជំនាន់ក្រោយ ពីព្រោះជំនាញមួយនេះ ផ្ដល់នូវផលជះវិជ្ជមានដល់អនាគតប្រទេសជាតិរបស់ពួកគេ។

ចំណែកលោក ម៉ូរី យឺជិ នាយកប្រតិបត្តិមូលនិធិនីបប៉ុន បានប្ដេជ្ញាថា ទៅអនាគត នឹងបន្តខិតខំប្រឹងប្រែងដើម្បីអភិវឌ្ឍន៍ប្រទេសកម្ពុជាឲ្យកាន់តែរីកចម្រើនទៅមុខ៕

អត្ថបទ ៖ សំអឿន