ពលរដ្ឋនៅខេត្តកំពត បានត្រៀមខ្លួនរួចជាស្រេចដើម្បីចូលរួមបោះឆ្នោតជ្រើសរើសតំណាងរាស្ត្រនិតិកាលទី៧ ឆ្នាំ២០២៣ នាថ្ងៃខាងមុខ

ប្រជាពលរដ្ឋខេត្តកំពតបានត្រៀមខ្លួនរួចរាល់ដើម្បីទៅចូលរួមបោះឆ្នោតជ្រើសរើសតំណាងរាស្ត្រ នៅថ្ងៃទី២៣ ខែកក្កដា ឆ្នាំ២០២៣ខាងមុខនេះ ព្រោះពួកគេយល់ថា ការបោះឆ្នោតមានសារៈសំខាន់ក្នុងការកំណត់ជោគវាសនា និងអនាគតរបស់គ្រួសារ ក៏ដូចជាប្រទេសជាតិទាំងមូល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រជាពលរដ្ឋនៅក្នុងភូមិដូនតោក សង្កាត់ត្រើយកោះ ក្រុងកំពត ខេត្តកំពត នាថ្ងៃទី១៤ ខែមិថុនា​ ឆ្នាំ២០២៣នេះបានបង្ហាញអារម្មណ៍សុំមិនបញ្ចេញឈ្មោះប្រាប់ឲ្យដឹងថា ពួកគាត់បានតាមដានរាល់ព័ត៌មានដំណើរការនៃការរៀបចំការបោះឆ្នោតជ្រើសរើសតំណាងរាស្ត្រ និតិកាលទី៧ តាមរយៈប្រព័ន្ធផ្សព្វផ្សាយនៅមូលដ្ឋាន និងតាមបណ្តាញសង្គមផ្សេងៗរបស់គណៈកម្មាធិការជាតិរៀបចំការបោះឆ្នោត។ ហើយបច្ចុប្បន្នអាជ្ញាធរមូលដ្ឋាន និងមន្ត្រីរបស់ គ.ខ.ប បាននិងបន្តចុះចែកប័ណ្ណព័ត៌មានអ្នកបោះឆ្នោតយ៉ាងផុសផុល ដើម្បីបង្កើនការយល់ដឹង និងបង្កភាពងាយស្រួលដល់ពលរដ្ឋក្នុងការទៅចូលរួមបោះឆ្នោត នៅថ្ងៃទី២៣ ខែកក្កដា ឆ្នាំ២០២៣ វេលាម៉ោង៧ព្រឹក រហូតដល់៣រសៀល ។

ប្រជាពលរដ្ឋដែលបានបង្ហាញអារម្មណ៍បញ្ជាក់ឱ្យដឹងទៀតថា ការទៅចូលរួមបោះឆ្នោតមាសារៈសំខាន់ខ្លាំងណាស់ នៅក្នុងការកំណត់ជោគវាសនា និងការអភិវឌ្ឍន៍រីកចម្រើនរបស់ខ្លួន គ្រួសារ និងប្រទេសជាតិ ។ ប្រជាពលរដ្ឋទាំងនោះថា បានត្រៀមខ្លួនរួចរាល់ដើម្បីទៅចូលរួមបោះឆ្នោត និងបានអំពាវនាវឲ្យប្រជាពលរដ្ឋផ្សេងទៀត ដែលមានឈ្មោះនៅក្នុងបញ្ជី សូមទៅបោះឆ្នោតឱ្យបានគ្រប់ៗគ្នា ព្រោះការបោះឆ្នោតជាកាតព្វកិច្ចសំខាន់របស់ពលរដ្ឋគ្រប់រូបផងដែរ។

បើយោងតាមរបាយការណ៍របស់គណៈកម្មការរៀបចំការបោះឆ្នោតខេត្ត បានឲ្យដឹងថា ក្រុមចែកប័ណ្ណព័ត៌មានអ្នកបោះឆ្នោតទាំង ៩៣ ឃុំ សង្កាត់នៅក្នុងខេត្តកំពត សម្រាប់ការបោះឆ្នោតជ្រើសតាំងតំណាងរាស្ត្រនីតិកាលទី៧ឆ្នាំ២០២៣ លើកទី២ គិតត្រឹមថ្ងៃទី២ គិតត្រឹមថ្ងៃទី១២ ខែមិថុនា ឆ្នាំ២០២៣ បានចំនួន៣២៨ ៩៩១ សន្លឹក ស្មើនឹង៧៨,២៦% នៃ ប័ណ្ណព័ត៌មានដែលទទួលបានសរុបចំនួន៤២១ ១១៩ សន្លឹក៕

អត្ថបទ៖ សឹង រ៉ាត់