ព័ត៌មានជាតិ

ផ្ទុះអត្រាអ្នកឆ្លងជំងឺអេដស៍កើនឡើង ប្រមុខរដ្ឋាភិបាលឲ្យបង្កើនការប្រុងប្រយ័ត្ន

បានផុស

៣ years មុន

នៅ

ថ្ងៃសៅរ៍ ២៤ មិថុនា ២០២៣

ដោយ

សម្តេចតេជោ ហ៊ុន សែន បង្ហាញក្តីបារម្ភក្រោយរបាយការណ៍បង្ហាញអត្រាអ្នកឆ្លងជំងឺអេសដ៍នៅក្នុងប្រទេសកម្ពុជា កំពុងមាននិន្នាការកើនឡើង។

អេដស៍ក៏ដូចកូវីដ តែអេដស៍ធ្ងន់ជាងកូវីដ។ អេដស៍អត់ទាន់ចប់ទេនៅស្រុកខ្មែរ។ សារប្រមុខរដ្ឋាភិបាលក្រើនរំលឹក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងជំនួបជាមួយកម្មករកម្មការិនីជាង ២ ម៉ឺននាក់នៅព្រឹកនេះ ប្រមុខរដ្ឋាភិបាលសម្តេចតេជោ ហ៊ុន សែន ថ្លែងដោយក្តីបារម្ភ មេរោគអេដស៍មានភាពកាចសាវហាវគ្មានថ្នាំព្យាបាលនោះទេ។

«ឆ្នាំ ២០២២ កើនឡើង ៣០០ នាក់ បើប្រៀបធៀប ២០២១ គឺនិន្នាការមានការកើនឡើង។ ចឹងទេ អត្រាឆ្លងពាក់ព័ន្ធជាមួយអ្នកណា? ពាក់ព័ន្ធអ្នកយកភេទដូចគ្នា។ ស្រីនិងស្រីមិនចោទជាបញ្ហាទេ ប៉ុន្តែប្រុសនិងប្រុសយកគ្នា គេរកឃើញជាប្រភពចម្លង»។

ការឆ្លងលើមនុស្សស្រលាញ់ភេទដូចគ្នាមានអត្រាខ្ពស់។ សម្តេចតេជោបញ្ជាក់ថា ប្រទេសយើងអត់ទាន់មានច្បាប់ណាមួយរារាំងការស្រលាញ់ភេទដូចគ្នា និងក៏មិនមានច្បាប់អនុញ្ញាតិនោះដែរ។

ក្នុងស្ថានភាពបែបនេះ មានតែការអំពាវនាវទេ។ ទីមួយកុំភ្លេចថានៅកម្ពុជាមិនទាន់អស់មេរោគអេសដ៍នោះទេ ដូច្នេះសូមកុំភ្លេចខ្លួនឲ្យសោះ។ មិនថាស្រ្តីឬបុរសបើមិនទុកចិត្ត ត្រូវចេះការពារ។

ប្រទេសកម្ពុជាជោគជ័យលើការគ្រប់គ្រងជំងឺគ្រុនស្វិតដៃជើង និងកំពុងឈានទៅសម្រេចផ្តាច់ព្រ័ត្រជំងឺគ្រុនចាញ់នៅឆ្នាំ ២០២៥។

ជំងឺអេសដ៍កាត់បន្ថយបានច្រើន។ តែនៅឆ្នាំ ២០២២ បែរជាអត្រាឆ្លងកើនឡើង។ នៅឆ្នាំ ២០២២ អ្នកកើតមេរោគអេដស៍មានចំនួន ១៤០០ នាក់ ក្នុងនោះកើនឡើង ៣០០ នាក់។

ផ្អែកលើទិន្នន័យ សម្តេចតេជោអំពាវនាវឲ្យបង្កើនការការពារកុំឲ្យកើនឡើងបន្តទៀត។ សម្តេចថា លើពិភពលោកមិនទាន់មានប្រទេសណាមួយរកឃើញថ្នាំព្យាបាលអេដស៍ឲ្យជានោះទេ។

ដោយណែនាំបន្ថែមកុំឲ្យមានការរើសអើសអ្នកផ្ទុកមេរោគអេដស៍ សម្តេចតេជោក៏អំពាវនាវអ្នកមានមេរោគអេសដ៍សូមកុំចម្លងទៅអ្នកដទៃ បង្កើតបញ្ហាលើបញ្ហា។ ជាមួយគ្នានេះក៏អំពាវនាវឲ្យបង្កើនការការពារខ្លួនកុំឲ្យមានមេរោគអេដស៍ ជាពិសេសអ្នកស្រលាញ់ភេទដូចគ្នា ហើយបើសង្ស័យមានផ្ទុកមេរោគអេដ៍ ត្រូវធ្វើតេស្តដើម្បីទទួលបានសេវាព្យាបាលភ្លាមៗ៕

Related Topics:Featured