ព្រះមហាក្សត្រ យាងប្រោសព្រះរាជទានសញ្ញាបត្រដល់សមណនិស្សិត-និស្សិត នៅពុទ្ធិកសាកលវិទ្យាល័យព្រះសីហមុនីរាជា

ព្រះករុណា ព្រះបាទ សម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានយាងប្រោសព្រះរាជទានសញ្ញាបត្រ ប្រគេន-ជូនសមណនិស្សិត-និស្សិតជ័យលាភីថ្នាក់បរិញ្ញា​បត្រ និងបរិញ្ញាបត្រជាន់ខ្ពស់ នៃពុទ្ធិកសាកលវិទ្យាល័យព្រះសីហមុនីរាជា។ ព្រះរាជពិធីនេះ ធ្វើឡើងនៅព្រឹកថ្ងៃទី ៣ ខែកក្កដា ឆ្នាំ ២០២៣នេះ នៅសាលសន្និសីទចតុមុខ។

ក្នុងព្រះរាជពិធីនេះ ក៏មានការអមព្រះរាជដំណើរដោយសម្តេចព្រះមហាសង្ឃរាជ បួរ គ្រី, សម្តេចចៅហ្វាវាំង គង់ សំអុល ឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង, លោក ឈិត សុខុន រដ្ឋមន្រ្តីក្រសួងធម្មការ និងសាសនា, ឥស្សរជននានា សាស្ត្រាចារ្យ និងសមណនិស្សិត-និស្សិតជ័យលាភីចំនួន ៥០០រូប។

ពុទ្ធិកសាកលវិទ្យាល័យព្រះសីហមុនីរាជា មានពុទ្ធិកមហាវិទ្យាល័យចំនួន ៤ ពុទ្ធិកមហាវិទ្យាល័យ និងមាន តេប៉ាតឺម៉ងចំនួន ៧ ផ្សេងៗទៀត។ ក្នុងនោះមានដូចជា តេប៉ាតឺម៉ង់ ទស្សនវិជ្ជា និងសាសនា នីតិសាស្រ្ត វិទ្យាសាស្រ្តអប់រំ គ្រប់គ្រងទូទៅ ព័ត៌មានវិទ្យា អក្សរសាស្រ្តអង់គ្លេស និងអក្សរសាស្រ្តខ្មែរ រួមទាំងតេប៉ាតឺម៉ង់ផ្សេងៗទៀត។

ពុទ្ធិកសាកលវិទ្យាល័យព្រះសីហមុនីរាជា ជាគ្រឹះស្ថានឧត្តមសិក្សាសាធារណៈវ័យចំណាស់មួយ ដែលមានបណ្តុះបណ្តាលថ្នាក់បរិញ្ញាបត្រ ថ្នាក់បរិញ្ញាបត្រជាន់ខ្ពស់ ថ្នាក់បណ្ឌិត សម្រាប់សមណនិស្សិតសិស្ស ដែលមានបំណងចង់បន្តការសិក្សាថ្នាក់មហាវិទ្យាល័យឡើងទៅ៕

អត្ថបទ៖ សួស សិត