ព័ត៌មានជាតិ

៦ខែឆ្នាំនេះ កម្ពុជាមានជំងឺគ្រុនឈាមជាង៤៦០០ករណី កើនឡើងជិត២ដង

បានផុស

៩ ខែ មុន

នៅ

ថ្ងៃពុធ ៥ កក្កដា ២០២៣

ដោយ

នៅក្នុងរយៈពេល៦ខែ ឆ្នាំ២០២៣នេះ កម្ពុជាមានអ្នកឆ្លងជំងឺគ្រុនឈាមប្រមាណជាង៤៦០០ករណី ក្នុងនោះស្លាប់ករណីកើនឡើងជិត២ដងបើប្រៀបធៀបទៅនឹងរយៈពេល៦ខែដូចគ្នាកាលពីឆ្នាំ២០២២កន្លងទៅ ដែលមានអ្នកស្លាប់ត្រឹមតែ៧ករណីប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិត លាង ឬទ្ធា ប្រធានកម្មវិធីជាតិប្រយុទ្ធនឹងជំងឺគ្រុនឈាមនៃក្រសួងសុខាភិបាលមានប្រសាសន៍នៅព្រឹកថ្ងៃទី៥កក្កដានេះថា ចាប់ពីខែមករារហូតមកដល់ខែមិថុនា ឆ្នាំ២០២៣ មានករណីជំងឺគ្រុនឈាមចំនួន៤៦៦៨ករណី ក្នុងនោះស្លាប់១០ករណីមានការកើនឡើងជិត២ដងបើប្រៀបធៀបទៅនឹងរយៈពេលដូចគ្នាកាលពីឆ្នាំ២០២២កន្លងទៅដែលមានករណីជំងឺគ្រុនឈាមចំនួន២៨៦៩ករណីក្នុងនោះស្លាប់៧ករណី ។

លោកវេជ្ជបណ្ឌិតបានបន្តថា រាជធានីខេត្តដែលមានករណីជំងឺគ្រុនឈាមច្រើនរួមមាន រាជធានីភ្នំពេញ កណ្តាល កំពង់ស្ពឺ ពោធិ៍សាត់ ត្បូងឃ្មុំ កំពង់ឆ្នាំង សៀមរាប បន្ទាយមានជ័យនិងខេត្តតាកែវ។ លោកវេជ្ជបណ្ឌិតបានបន្ថែមថា ការកើនឡើងនៃករណីជំងឺគ្រុនឈាមនៅដើមឆ្នាំនេះដោយសារតែកត្តាការប្រែប្រួលអាកាសធាតុដូចជាអាកាសធាតុក្តៅអាចបង្កលក្ខណៈងាយស្រួលក្នុងការកកើតមូសខ្លាច្រើន និងកត្តាទឹកភ្លៀងពិសេសឆ្នាំ២០២៣នេះជាឆ្នាំស្ថិតក្នុងវ័ន្តមានការផ្ទុះជំងឺគ្រុនឈាមដែលមានរយៈពេល៥ឆ្នាំម្តង បន្ទាប់ពីកម្ពុជាបានទ្រង់ទ្រាយធំកាលពីឆ្នាំ ២០១៩ កន្លងទៅ។

លោកវេជ្ជបណ្ឌិតបានណែនាំដល់ប្រជាពលរដ្ឋគ្រប់រូបបើមានអាការៈក្តៅខ្លួនខ្លាំងត្រូវរួសរាន់បញ្ជូនអ្នកជំងឺទៅកាន់មន្ទីរពេទ្យរដ្ឋដែលនៅជិតផ្ទះក្នុងរយៈពេល៤៨ម៉ោង ដើម្បីឲ្យគ្រូពេទ្យពិនិត្យ និងព្យាបាលឱ្យបានទាន់ពេលវេលា។ លោកវេជ្ជបណ្ឌិតបានអំពាវនាវឱ្យបងប្អូនប្រជាពលរដ្ឋមានការប្រុងប្រយ័ត្ននិងចូលរួមទាំងអស់គ្នាក្នុងការសំអាតបរិស្ថាននៅជុំវិញផ្ទះសម្បែង និងយករាល់វត្ថុទាំងឡាយណាដែលអាចដក់ទឹកបានដូចជាសំបកកំប៉ុងសំបកដូងសំបកកង់ឡានទៅកប់ចោល ឬដុតចោលព្រោះថាវត្ថុទាំងនោះអាចបង្កឱ្យកកើតជាដង្កូវទឹកដែលវិវត្តន៍ទៅជាមូសខ្លាដែលជាភ្នាក់ងារចម្លងជំងឺគ្រុនឈាម៕

អត្ថបទ៖ សំអឿន