ពលរដ្ឋក្នុងសង្កាត់ទួលល្វា ក្រុងប៉ៃលិន ប្តេជ្ញាបោះឆ្នោតជូនគណបក្សប្រជាជនកម្ពុជា

សកម្មជនរបស់គណបក្សប្រជាជនកម្ពុជានៅរសៀលថ្ងៃទី០៤ ខែកក្កដា ឆ្នាំ២០២៣នេះ បានបន្តសកម្មភាពចុះពន្យល់ណែនាំដល់សមាជិកសមាជិការបស់គណបក្សនៅតាមបណ្តាមូលដ្ឋាន ប្រជាពលរដ្ឋ ក្នុងសង្កាត់ទួលល្វា ក្រុងប៉ៃលិន ខេត្តប៉ៃលិន។

ក្នុងសកម្មភាពចុះពន្យល់ដល់សមាជិកសមាជិកាឱ្យស្គាល់អំពីស្លាកសញ្ញា និងលេខរៀងរបស់គណបក្សប្រជាជនកម្ពុជា និងរបៀបគូសសន្លឹកឆ្នោតខាងលើនេះ គឺធ្វើឡើងទៅតាមពេលវេលា និងការបែងចែករបស់គណៈកម្មការរៀបចំការបោះឆ្នោតថ្នាក់ឃុំ ផ្តល់ជូន និងបានរៀបចំឱ្យផងដែរ។

លោក វួច ពឿន ដែលជាសកម្មជនម្នាក់ របស់គណបក្សប្រជាជនកម្ពុជាខេត្តប៉ៃលិន បានបញ្ជាក់ប្រាប់កម្ពុជាថ្មីថា៖ លោក និងប្រជាពលរដ្ឋ នៅតាមខ្នងផ្ទះនីមួយៗ ក្នុងសង្កាត់ទួលល្វា ប្រមាណជា៩០ភាគរយ និងទៅបោះឆ្នោត ហើយបោះជូនគណបក្សប្រជាជនកម្ពុជា ដែលមានឡូហ្គោ មានរូបសញ្ញាទេវតាបាចផ្កា និងឈរនៅលេខរៀងទី១៨ ហើយការបោះឆ្នោតនេះ និងប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣ ដែលនៅមានរយៈពេលតែ១៩ ថ្ងៃទៀតប៉ុណ្ណោះ បើគិតពីថ្ងៃទី០៤ ខែកក្កដានេះតទៅ។

បើតាមលោក ហុក សុផល ប្រធានក្រុមការងារគណបក្សប្រជាជនកម្ពុជា ចុះជួយសង្កាត់ទួលល្វា និងជាសមា​ជិក ដ៏សកម្មម្នាក់ ដែលបានដឹកនាំក្រុមការងារគណបក្សបានឱ្យដឹងថា៖ ក្នុងការចុះពន្យល់ណែនាំដល់សមាជិក សមាជិកា នៅតាមផ្ទះក្នុងមូលដ្ឋានរបស់ខ្លួន គឺប្រជាពលរដ្ឋ នៅក្នុងមូលដ្ឋានរបស់លោក ភាគច្រើនលើសលប់បានស្គាល់អំពីស្លាកសញ្ញាឡូហ្គោ និងលេខរៀង របស់គណបក្សប្រជាជនកម្ពុជាច្បាស់លាស់គ្រប់ៗគ្នា ចំណែករបៀបគូសសន្លឹកឆ្នោតវិញ ក៏ពួកគាត់ចេះចាំ ក្នុងការគូសបានត្រឹមត្រូវផងដែរ៕

អត្ថបទ៖ សេង សុវណ្ណារិទ្ធ