ប្រធានមន្ទីរពេទ្យគន្ធបុប្ផា៖ កុមារមានជំងឺធ្ងន់ធ្ងរកើនឡើង ១០៨%

លោកសាស្ត្រាចារ្យ គី សន់ទី ប្រធានមន្ទីរពេទ្យគន្ធបុប្ផា បានឱ្យ “កម្ពុជាថ្មី” ដឹងថា តាមរបាយការណ៍សកម្មភាព​របស់ មន្ទីរពេទ្យគន្ធបុប្ផាទាំងនៅភ្នំពេញ និងខេត្តសៀមរាម ក្នុងរយៈពេល ៦ខែ ដើមឆ្នាំ២០២៣នេះ កុមារមានជំងឺធ្ងន់ៗ ចំនួន ៨៨ ៩៣០ នាក់ បាន​សម្រាកព្យាបាលនៅក្នុងមន្ទីរពេទ្យ ដែលចំនួននេះ កើនឡើង ១០៨ ភាគរយ ច្រើនជាងឆ្នាំ២០២២ ខណៈកុមារចំនួន ៣៩២ ០៣៤ នាក់​ បានឈឺ និងបានពិនិត្យព្យាបាលនៅក្នុងផ្នែកពិគ្រោះជំងឺក្រៅ​ ដែលចំនួននេះ កើន ៥២%។

លោកសាស្ត្រាចារ្យ គី សន់ទី មានប្រសាសន៍បញ្ជាក់បន្ថែមថា៖ “៦០ ភាគរយជាង ជាប្រភេទជំងឺឆ្លង ឆ្លងតាមប្រព័ន្ធដង្ហើម ជំងឺរលាកពោះវៀន ខ្នែងពោះវៀន ជំងឺគ្រុនឈាមជាដើម និង ៤០ ភាគរយទៀត គឺគ្រោះថ្នាក់ចរាចរណ៍ និងជំងឺផ្សេងៗទៀតដែលមិនមែនជាជំងឺឆ្លង”។

លោកវេជ្ជបណ្ឌិត គី សន់ទី មានប្រសាសន៍ថា ជាទូទៅ នៅរដូវរស្សា ឬខែភ្លៀងនេះ មានជំងឺកើតឡើងច្រើនចំពោះកូនក្មេង។ ម៉្យាងទៀតដោយសារការស្បើយនៃការរីករាលដាលជំងឺកូវីដ-១៩ ទើបនាំឱ្យអាណាព្យាបាលអាចយកកូនមកពិនិត្យសុខភាព និងព្យាបាលនៅមន្ទីរពេទ្យ ទោះបីជំងឺស្រាលក្ដី ដែលនាំឱ្យផ្នែកពិគ្រោះជំងឺក្រៅ ទទួលបានកំណើនអ្នកមកពិនិត្យជំងឺ ដូចកាលមិនទាន់មានកូវីដ-១៩ ដែរ។

លោកវេជ្ជបណ្ឌិត គី សន់ទី មានប្រសាសន៍ថា ឪពុកម្ដាយ ឬអាណាព្យាបាលកុមារត្រូវយកចិត្តទុកដាក់ថែទាំ កូនចៅ ដោយរស់នៅស្អាតមានអនាម័យ និងចូលរួមទាំងអស់គ្នា ពិសេសបំបាត់ជម្រកមូសខ្លាការពារជំងឺគ្រុនឈាម។ អាណាព្យាបាល ត្រួវស្វែងរកការពិគ្រោះព្យាបាលជំងឺ ជាមួយគ្រូពេទ្យមានជំនាញវិជ្ជាជីវៈ ពេលកូនចៅមានជំងឺដង្កាត់។

ប្រធានមន្ទីរពេទ្យគន្ធបុប្ផារូបនេះ មានប្រសាសន៍បន្តថា៖ “កុំស្វែងរកទិញថ្នាំព្យាបាលកូនចៅដោយខ្លួនឯង តែត្រូវស្វែងរកការព្យាបាលមួយត្រឹមត្រូវ នៅមណ្ឌលសុខភាព មន្ទីរពេទ្យបង្អែកជាដើម។ ស្វែងរកការបញ្ជូនអ្នកជំងឺធ្ងន់ធ្ងរ ប្រកបដោយសុវត្ថិភាព និងត្រឹមត្រូវតាមក្បួនខ្នាតបច្ចកទេស មកកាន់មន្ទីរពេទ្យឯកទេសមានជំនាញដែលទុកចិត្តបាន”។

គួរបញ្ជាក់ថា រាល់ការព្យាបាលទាំងអស់នៅមន្ទីរពេទ្យគន្ធបុប្ផាទាំងនៅរាជធានីភ្នំពេញ និងខេត្តសៀមរាប គឺមិនគិតថ្លៃសម្រាប់គ្រប់ៗគ្នា ដោយគ្មានការរើសអើង។ មន្ទីរពេទ្យគន្ធបុប្ផាទាំង ៥ទីតាំង នៅតែត្រូវការថវិកាជាប្រចាំប្រមាណ ៨៤ ម៉ឺនដុល្លារក្នុង ១សប្តាហ៍ ឬត្រូវចំណាយ ប្រមាណ ៤០ លានដុល្លារ ក្នុង១ឆ្នាំ ដើម្បីធ្វើប្រតិបត្តិការមនុស្សធម៌សង្រ្គោះជីវិតកុមារនៅកម្ពុជា ដោយមានការជួយបំពេញបន្ថែមគ្នាទៅវិញទៅមក រវាងមូលនិធិគន្ធបុប្ផាស្វីស និងមូលនិធិ គន្ធបុប្ផាកម្ពុជា ក៏ដូចជាពីសំណាក់ក្រសួងសុខាភិបាល នៃព្រះរាជាណាចក្រកម្ពុជា។ ការបរិច្ចាគនេះតែមួយអាចគ្រប់គ្រាន់នៅឡើយទេសម្រាប់ការគាំទ្រផ្នែកហិរញ្ញវត្ថុដល់មន្ទីរពេទ្យគន្ធបុប្ផា ព្រោះមន្ទីរពេទ្យនេះ មិនមែនជាស្ថាប័នដែលរកប្រាក់ចំណូល។

មូលនិធិគន្ធបុប្ធាកម្ពុជាបានបង្កើត KHQR CODE (ទាំងប្រាក់រៀល និងដុល្លារអាមេរិក) សម្រាប់គ្រប់ App ធនាគារទាំងអស់ក្នុងព្រះរាជាណាចក្រកម្ពុជា ដែលមានកម្មវិធីស្ដែន QR CODE ដើម្បីសម្រួលដល់ការចូលរួមបរិច្ចាគពីសំណាក់សប្បុរសជននានា ក្នុងគោលបំណង ជួយ នាំភាពញញឹមដល់កុមារដែលជាអនាគតដ៏ភ្លឺស្វាងរបស់កម្ពុជា តាមរយៈការរួម​គ្នា រក្សានិរន្តរភាព  នៃកិច្ចដំណើរការរបស់មន្ទីរពេទ្យគន្ធបុប្ផា ទាំង ៥ទីតាំង នៅព្រះរាជាណាចក្រកម្ពុជា៕

អត្ថបទ៖ ច័ន្ទ វីរៈ