រដ្ឋមន្ត្រីក្រសួងអប់រំ ផ្តាំដល់កាយរឹទ្ធិជាតិកម្ពុជា ត្រូវរក្សាសេចក្តីថ្លៃថ្នូរនៅលើឆាកអន្តរជាតិ

លោកបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានណែនាំដល់ប្រតិភូកាយរឹទ្ធិជាតិកម្ពុជា ត្រូវលើកតម្កើន និងរក្សាសេចក្តីថ្លៃសថ្នូររបស់ជាតិនៅលើឆាកអន្តរជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការណែនាំរបស់លោកបណ្ឌិតសភាចារ្យ ហង់ជួន ណារ៉ុន បែបនេះ បន្ទាប់ពីលោកបណ្ឌិតបានអនុញ្ញាតឱ្យប្រតិភូកាយរឹទ្ធិជាតិកម្ពុជា ចូលជួបសម្តែងការគួរសម ទទួលអនុសាសន៍ មុននឹងទៅចូលរួមការបោះជំរំកាយរឹទ្ធិពិភពលោកលើកទី២៥ នៅប្រទេសកូរ៉េខាងត្បូង កាលពីថ្ងៃទី៣០ ខែកក្កដានេះ។

នៅក្នុងជំនួបនេះ លោកបណ្ឌិតសភាចារ្យ បានផ្តល់អនុសាសន៍ល្អៗជាច្រើន ដោយណែនាំដល់ប្រតិភូកាយរឹទ្ធិជាតិកម្ពុជាទាំងអស់ ត្រូវលើកតម្កើន និងរក្សាឱ្យបាននូវគុណតម្លៃ សេចក្តីថ្លៃថ្នូររបស់ជាតិ ពោល គឺក្នុងឱកាសដែលចូលរួមការបោះជំរំនេះ គ្រប់សកម្មភាពនានា មិនថាការសិក្សារៀនសូត្រជំនាញ បំណិនថ្មីៗ គឺធ្វើខ្លួនឱ្យក្លាយជាទូតសុច្ឆទៈ ក្នុងការផ្សព្វផ្សាយវប្បធម៌កម្ពុជាទៅកាន់ពិភពលោកឱ្យបានល្អ។ ជាមួយនឹងការផ្សព្វផ្សាយពីកម្ពុជាទៅឆាកអន្តរជាតិនេះ គឺតាមរយៈការប្រាស្រ័យទាក់ទងល្អក្នុងស្មារតីមិត្តភាព និងសន្តិភាពជាមួយសមាជិកជំរំមកពីប្រទេសផ្សេងទៀត។   

បន្ទាប់ពីបានជួប និងទទួលអនុសាសន៍ពីលោកបណ្ឌិតសភាចារ្យ ហង់ជួន ណារ៉ុន រួចមក នៅយប់ថ្ងៃទី៣០ ខែកក្កដា ប្រតិភូកម្ពុជាចំនួន ៤៧រូប ក៏បានធ្វើដំណើរទៅកាន់កូរ៉េខាងត្បូង សម្រាប់ការបោះជំរំកាយរឹទ្ធិពិភពលោកលើកទី២៥នេះ។

សូមបញ្ជាក់ថា នេះ គឺជាលើកទី៦ ដែលកម្ពុជាចូលរួមក្នុងការបោះជំរំកាយរឹទ្ធិពិភព។ សម្រាប់ការបោះជំរំលើកទី២៥នេះ នឹងប្រព្រឹត្តទៅចាប់ពីថ្ងៃទី១ ដល់ថ្ងៃទី១២ ខែសីហា ឆ្នាំ២០២៣៕