ព័ត៌មានជាតិ

ទណ្ឌិត៦៣នាក់ ត្រូវស្នើសុំលែងទោស និង បន្ធូរបន្ថយ ក្នុងឱកាសបុណ្យជាតិខាងមុខ

បានផុស

៥ years មុន

នៅ

ថ្ងៃសុក្រ ២៩ មករា ២០២១

ដោយ

នៅខេត្តបន្ទាយមានជ័យ មានទណ្ឌិត៦៣នាក់ ត្រូវស្នើសុំលែងទោស និង បន្ធូរបន្ថយទោស ក្នុងឱកាសបុណ្យចូលឆ្នាំខ្មែរ និងបុណ្យវិសាខបូជាខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើយោងកិច្ចប្រជុំមួយនារសៀលថ្ងៃទី២៨ ខែមករា ឆ្នាំ២០២១ របស់គណៈកម្មការខេត្តបន្ទាយមានជ័យ លើកលែងទោសនិង បន្ធូរបន្ថយ ទោសដល់ទណ្ឌិតក្នុងឱកាសបុណ្យ ចូលឆ្នាំប្រពៃណីជាតិខ្មែរ និង បុណ្យវិសាខបូជា ឆ្នាំ២០២១ ក្នុងកិច្ចប្រជុំនោះ ដឹកនាំដោយលោក គឹង វណ្ណៈ អភិបាលរងខេត្តតំណាងឲ្យ លោក អ៊ុំ រាត្រី អភិបាលខេត្តបន្ទាយមានជ័យ លោក តេង សាម៉ៃ ព្រះរាជអាជ្ញារងនៃអយ្យការអមតុលាការខេត្ត លោកឧត្តមអគ្គនុរក្ស២ អ៊ុង ស៊ីផាន ប្រធានពន្ធនាគារ ខេត្តបន្ទាយមានជ័យ រួមទាំងមន្ត្រី ជំនាញកិច្ចការតុលាការ ពន្ធនាគារនិងមន្ត្រីពន្ធនាគារនុរក្សជាច្រើននាក់។

លោកឧត្តមអគ្គនុរក្ស២ អ៊ុង ស៊ីផាន បានអានស្ថិតិបញ្ជីឈ្មោះនិងសាវតារនៃទណ្ឌិតជនជាតិខ្មែរនិងជនបរទេស ដែលត្រូវបានអង្គភាពពន្ធនាគារខេត្តបន្ទាយមានជ័យស្នើ ហើយសុំការអនុម័តពីគណៈកម្មការ ដើម្បីបញ្ជូនបន្ថយទោសបន្តសុំថ្វាយការសម្រេចពីថ្នាក់លើ ក្នុងនោះមានទណ្ឌិតចំនួន៣០នាក់មានស្រី២នាក់ ត្រូវបានស្នើសុំលើកលែងទោសនិងបន្ធូរបន្ថយទោសក្នុងឱកាសបុណ្យចូលឆ្នាំប្រពៃណីជាតិខ្មែរ ដែលនឹងប្រព្រឹត្តទៅក្នុងថ្ងៃទី១៤.១៥.១៦ ខែមេសាឆ្នាំ២០២១ ខាងមុខ និងទណ្ឌិតចំនួន៣៣នាក់ ក្នុងនោះមានស្រី៥នាក់ ត្រូវបានស្នើសុំលើកលែងទោស និងបន្ធូរបន្ថយទោស ក្នុងឱកាសបុណ្យវិសាខបូជាខាងមុខ ដែលនឹងប្រព្រឹត្តទៅក្នុងថ្ងៃ២៦ ខែមេសា ឆ្នាំ២០២១។

លោក គឹង វណ្ណៈ អភិបាលរងខេត្តបន្ទាយមានជ័យទទួលស្គាល់ការខិតខំប្រឹងប្រែងគ្រប់គ្រង ថែរក្សាអ្នកជាប់ឃុំ ក្នុងនោះបានពិនិត្យ វាយតម្លៃលើសកម្មភាពអនុវត្ត គុណសម្បត្តិនិងរយៈពេលនៃការជាប់ឃុំរបស់ទណ្ឌិត ហើយវាយតម្លៃ ស្នើសុំលើកលែងទោសនិងបន្ធូរបន្ថយទោស។ លោកអភិបាលរងខេត្តសង្ឃឹមថា ដំណើរការនេះនឹងមិនមានអំពើពុករលួយ ភាពលំអៀង មិនបក្ខពួក ភាពមិនប្រក្រតីឬបញ្ហាកើតឡើងឡើយ ពោលធ្វើបានប្រកបដោយការទទួលខុសត្រូវនិងប្រសិទ្ធិភាពខ្ពស់ ផងដែរ។ ក្នុងនោះ លោកបានធ្វើការផ្តាំផ្ញើរដល់អ្នកជាប់ឃុំទាំងអស់ក្រោយពីស្គាល់រសជាតិជាប់គុកហើយ ចេញពីពន្ធនាគារវិញ ត្រូវចេះកែខ្លួនឲ្យក្លាយជាមនុស្សល្អ ពលរដ្ឋល្អទើបអាចរស់នៅ ក្នុងសង្គមបានស្រួល៕

អត្ថបទ៖ វ៉ាន់ ណាង

សូមចុចអាន៖ នគរបាលខេត្តតាកែវចុះបង្ក្រាបដំណាំកញ្ឆា៥ទីតាំងនៅលើខ្នងភ្នំ

Related Topics:ទណ្ឌិត