លោក ឡុង ឌីម៉ង់៖ សកម្មភាពអ្នកវិនិយោគចាប់ផ្តើម​ចូលខេត្តព្រះសីហនុបណ្តើរៗ

លោក ឡុង ឌីម៉ង់ អភិបាលរងខេត្តព្រះសីហនុ បានប្រាប់កម្ពុជាថ្មីថា មកដល់ពេលនេះ មានសកម្មភាពកម្រើកឡើងវិញ​នៃការចូលមកវិនិយោគនៅខេត្តព្រះសីហនុជាបណ្តើរៗហើយ។ លើសពីនេះទៀត លោកថា ស្ថានភាពការធ្វើអាជីវកម្ម​ក៏ចាប់ផ្តើមបើកដំណើរការជាបន្តបន្ទាប់ផងដែរ។

កាលពី ៥ ឆ្នាំ​មុន វិនិយោគិន​ចិន​បាន​ចាប់ផ្តើមចូលមកអភិវឌ្ឍខេត្តព្រះសីហនុ ឱ្យ​ប្រែក្លាយពីខេត្ត ​ដែល​មាន​ភាព​ស្ងប់ស្ងាត់​ឱ្យ​ទៅ​ជា​តំបន់​ដ៏​ទាក់ទាញជាពិសេសផ្នែកសំណង់អគារ និងតំបន់ទេសចរណ៍ជាដើម។ ប៉ុន្តែគម្រោង​អភិវឌ្ឍជាច្រើនដែលមានថៅកែជាជនជាតិចិនត្រូវបានជាប់គាំង ក្រោយពេលរាជរដ្ឋាភិបាល បាន​ដាក់​បម្រាម​លើ​ល្បែង​អនឡាញ ​និងការផ្ទុះឡើងនៃ​វិបត្តិ​ជំងឺ​កូវីដ១៩។

បើដូចអ្វីដែលអភិបាលរងខេត្តព្រះសីហនុ លើកឡើងអំពីការកម្រើកឡើងវិញនៃវិនិយោគិននោះ មិនយូរប៉ុន្មានទេ ការអភិវឌ្ឍលើគម្រោងចាស់ និងថ្មី នឹងរីកលូតលាស់ស្គុះស្គាយនាពេលឆាប់ៗខាងមុខនេះ។

ខេត្តព្រះសីហនុមានការរីកចម្រើនពីមួយឆ្នាំទៅមួយឆ្នាំ ខណៈសំណង់អាគារខ្ពស់ៗចាប់ពី៥ជាន់ ទៅ៥៣ជាន់ ក្នុងខេត្តនេះ មានការកើនឡើងដល់ជាង៦០០អាគារ គិតត្រឹមចុងឆ្នាំ២០២០។

ស្របពេលជាមួយគ្នានេះ កំណើនទេសចរក្នុងស្រុក ក៏មានចំនួនច្រើនចូលទៅកម្សាន្តនៅខេត្តព្រះសីហនុ ជាលំដាប់ផងដែរ។ នេះជាការបន្ថែមរបស់លោកអភិបាលរងខេត្ត៕

​