ព័ត៌មានជាតិ

បុណ្យមាឃបូជា មានសារៈសំខាន់ណាស់ ចំពោះវិស័យព្រះពុទ្ធសាសនា គឺរំឭកដល់ការ៤ធំៗ

បានផុស

៥ years មុន

នៅ

ថ្ងៃសុក្រ ២៩ មករា ២០២១

ដោយ

លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី បានថ្លែងថា ពិធីបុណ្យ មាឃបូជា មានសារៈសំខាន់ណាស់គឺរំឭកដល់ព្រឹត្តិការណ៍ធំៗ៤យ៉ាង លើវិស័យព្រះពុទ្ធសាសនាហើយនិង ដើម្បីរំឭកដល់ព្រះសម្មាសម្ពុទ្ធបរមគ្រូនៃយើង កាលព្រះអង្គទ្រង់នៅមានព្រះជន្មាយុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកជំទាវកិត្តិសង្គហបណ្ឌិត ម៉ែន សំអន រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចថ្លែងបែបនេះ ខណៈអញ្ជើញជាអធិបតី ក្នុងពិធីបុណ្យមាឃបូជា ដែលប្រព្រឹត្តទៅ នៅព្រះមហាសក្យមុនី ចេតិយ ភ្នំព្រះរាជទ្រព្យ (ឧត្តុង្គ) និងពិធីរាប់បាត្រព្រះសង្ឃ៨០អង្គ ស្ថិតនៅក្នុងស្រុកពញាឮ ខេត្តកណ្តាល នៅព្រឹកថ្ងៃ១៥កើត ខែមាឃ ឆ្នាំជូត ទោស័ក ព.ស ២៥៦៤ ត្រូវ នឹងថ្ងៃទី២៨ ខែមករា ឆ្នាំ២០២១ម្សិលមិញនេះ។

យោងតាមឯកសារ ដែលមាននៅក្នុងព្រះរាជពិធីទ្វាទសមាស បានបញ្ជាក់ថា ប្រភពនៃបុណ្យ មាឃបូជា គឺបុណ្យមួយដែលសារៈសំខាន់ណាស់ សម្រាប់វិស័យពុទ្ធសាសនាដោយមានអត្ថន័យនៃការរំឭកដល់ព្រឹត្តិការណ៍ធំៗ៤យ៉ងដូចជា៖

ទី១. បុណ្យមាឃបូជា គឺជាបុណ្យរំលឹកដល់ថ្ងៃនៃការប្រជុំចតុរង្គសន្និបាត នៃព្រះអរហន្ត១២៥០អង្គ ដែលប្រព្រឹត្តទៅនាថ្ងៃពេញបូណ៌រមីក្នុងឆ្នាំរកាមុនពុទ្ធសករាជ៤៤ឆ្នាំ ដែលជាថ្ងៃនក្ខត្តឬក្សធំមួយ របស់ព្រះសក្យមុនីគោតមបរមគ្រូនៃយើង ដែលសន្និបាតបែបនេះមានតែម្តងគត់នាសម័យពុទ្ធកាល។ ទី២. បុណ្យមាឃបូជា គឺជាបុណ្យរំលឹកដល់ថ្ងៃដែលព្រះពុទ្ធជាម្ចាស់ប្រកាសដាក់ព្រះជន្មាយុសង្ខារចំពោះមុខមារ ប្រព្រឹត្តទៅនាថ្ងៃពេញបូណ៌មីខែមាឃជាថ្ងៃអភិលក្ខិតកាលដ៏ធំមួយទៀត នៅមុនពុទ្ធសករាជ៣ខែ សម័យនោះព្រះសម្មាសម្ពុទ្ធបរមគ្រូនៃយើងទ្រង់ប្រជុំសាវ័កហើយប្រកាសដាក់ព្រះជន្មាយុសង្ខាររបស់ព្រះអង្គ។ ទី៣. រំឭកដល់ថ្ងៃដែលព្រះសម្មាសម្ពុទ្ធទ្រង់សម្ដែងនូវឱវាទបាតិមោក្ខ និងទី៤. រំឭកដល់ថ្ងៃដែលព្រះសម្មាសម្ពុទ្ធទ្រង់តែងតាំងព្រះអគ្គសាវ័កឆ្វេងស្ដាំ។

សម្រាប់ពុទ្ធសាសនិកកម្ពុជាយើង ក៏បានប្រារព្ធធ្វើបុណ្យមាឃបូជាដូចប្រទេសកាន់ព្រះពុទ្ធដទៃទៀតដែរ ពោលគឺចាប់តាំងពីរជ្ជកាល ព្រះបាទសម្តេចព្រះស៊ីសុវត្ថិ មុនីវង្ស មករាជរដ្ឋាភិបាលបានកំណត់យកថ្ងៃពេញបូណ៌មី ខែមាឃ ជាថ្ងៃបុណ្យសម្រាប់ជាតិហៅយ៉ាងខ្លីថា ថ្ងៃបុណ្យមាឃបូជា ជាថ្ងៃបុណ្យខាងព្រះពុទ្ធសាសនា៕

អត្ថបទ៖ វិមាន

Related Topics:បុណ្យមាឃបូជា