ព័ត៌មានជាតិ

រដ្ឋបាលរាជធានី បើកកិច្ចប្រជុំរកដំណោះស្រាយជូនពលរដ្ឋ ដើម្បីត្រៀមរៀបចំវេទិកាតាមខណ្ឌទាំង១៤

បានផុស

៣ years មុន

នៅ

ថ្ងៃពុធ ១៦ សីហា ២០២៣

ដោយ

ភ្នំពេញ ៖ រដ្ឋបាលរាជធានីភ្នំពេញ នៅរសៀលថ្ងៃទី១៦ សីហានេះ បានបើកកិច្ចប្រជុំមួយដើម្បីពិនិត្យ ពិភាក្សារកដំណោះស្រាយ សំណើនិងសំណូមពរ ប្រជាពលរដ្ឋនៅក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញកាលពីឆ្នាំ២០២២ និងដើម្បីត្រៀមរៀបចំវេទិកា នៅតាមខណ្ឌទាំង១៤ក្នុងឆ្នាំ២០២៣ខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចប្រជុំនេះធ្វើឡើង នៅសាលារាជធានីភ្នំពេញ ក្រោមអធិបតីភាព លោកកើត ឆែ អភិបាលរងរាជធានីភ្នំពេញ ដោយមានការចូលរួមពីមន្ត្រីរដ្ឋបាលនិងសមាជិកក្រុមប្រឹក្សារាជធានី។

លោក កើត ឆែ បានមានប្រសាសន៍លើកឡើងថា កិច្ចប្រជុំនេះមានគោលបំណង ដើម្បីពិនិត្យ ពិភាក្សារកដំណោះស្រាយរាល់សំណើនិងសំណូមពររបស់ប្រជាពលរដ្ឋនៅក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញកាលពីឆ្នាំ២០២២កន្លងមក និងដើម្បីត្រៀមរៀបចំវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញនៅតាមខណ្ឌទាំង១៤ក្នុងឆ្នាំ២០២៣ខាងមុខនេះ។

លោក កើត ឆែ ក្នុងឱកាសនោះ ក៏បានផ្តាំផ្ញើឱ្យនាយករដ្ឋបាល និងអ្នកពាក់ព័ន្ធ ពន្លឿនការដោះស្រាយ រាល់សំណើនិងសំណូមពរស្របច្បាប់របស់ប្រជាពលរដ្ឋដែលនៅសេសល់ឱ្យអស់។

លោកស្រី ដោ សម្ផស្ស នាយិកាទីចាត់ការររដ្ឋបាល បានឱ្យដឹងថា ការរៀបចំវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញនៅតាមខណ្ឌទាំង១៤ក្នុងឆ្នាំ២០២២ កន្លងទៅយើងទទួលបាននូវសំណួរ សំណើ និងសំណូមពរសរុបចំនួន ១០៨៨បញ្ហា ក្នុងនោះបញ្ហាដែលបានលើកឡើង ផ្ទាល់មាត់មានចំនួន២១៨បញ្ហា ដែលគណៈអភិបាល និងថ្នាក់ដឹកនាំមន្ទីរ អង្គភាពជំនាញ បានដោះស្រាយដោយផ្ទាល់ រួចហើយនៅក្នុងវេទិកា និងសំនួរ សំណើ សំណូមពរជាលាយលក្ខណ៍អក្សរសរុបចំនួន៨៧០បញ្ហា ដែលគណៈអភិបាល ទទួលយកមកពិនិត្យ និងដោះស្រាយតាមនីតិវិធី។

លោកស្រីបន្តថា តាមស្មារតីនៃអង្គប្រជុំកាលពីថ្ងៃទី០៥ ខែមេសា ឆ្នាំ២០២៣ យើងបានសំរឹទ្ធិសម្រាំងកាត់ចោលនូវសំនួរ សំណើ សំណូមពរណា ដែលមិនសមស្រប ឬជាន់គ្នាមកនៅ ត្រឹម៧៦១បញ្ហា និងបានបញ្ជូនទៅគណៈអភិបាលខណ្ឌទាំង១៤ មន្ទីរ អង្គភាពពាក់ព័ន្ធ ទាំងអស់ ដើម្បីធ្វើការឆ្លើយបំភ្លឺចំពោះសំណួរ សំណើ សំណូមពរទាំង៧៦១ សម្រាប់ឆ្លើយតបជូនប្រជាពលរដ្ឋវិញក្នុងនោះ បានដោះស្រាយរួចចំនួន ៣៧៨បញ្ហា មិនទាន់បានដោះស្រាយចំនួន១៨៤បញ្ហា និងបានដាក់បញ្ចូលទៅក្នុងកម្មវិធីវិនិយោគ៣ឆ្នាំរំកិលរបស់រាជធានី ខណ្ឌ និងសង្កាត់ បានចំនួន១៩៩បញ្ហា៕

ដោយ ៖ ស្រីរ័ត្ន