APP របស់គណៈកម្មាធិការសិទ្ធិមនុស្សកម្ពុជា មិនទាន់ទទួលបានពាក្យបណ្ដឹងណាមួយនៅឡើយទេ

ក្នុងរយៈពេលជាង ១ខែ បន្ទាប់ពីបានដាក់ឲ្យប្រើប្រាស់ជាផ្លូវការ កម្មវិធីអេឡិកត្រូនិករបស់គណៈកម្មាធិការសិទ្ធិមនុស្សកម្ពុជា (CHRC APP) មក គណៈកម្មាធិការសិទ្ធិមនុស្សកម្ពុជា មិនទាន់ទទួលបានពាក្យបណ្ដឹងណាមួយ នៅឡើយទេ។

កាលពីថ្ងៃទី ២៩ ខែមិថុនា ឆ្នាំ ២០២៣កន្លងទៅនេះ គណៈកម្មាធិការសិទ្ធិមនុស្សកម្ពុជា បានដាក់ឲ្យប្រើប្រាស់ជាផ្លូវការ កម្មវិធីអេឡិកត្រូនិករបស់គណៈកម្មាធិការសិទ្ធិមនុស្សកម្ពុជា (CHRC APP) ក្រោមអធិបតីភាពលោក កែវ រ៉េមី រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានគណៈកម្មាធិការសិទ្ធិមនុស្សកម្ពុជា។

គំនិតផ្ដួចផ្ដើម នៃការបង្កើតកម្មវិធីនេះ គឺក្នុងគោលបំណង ១. ផ្ដល់នូវព័ត៌មានអំពីសិទ្ធិមនុស្សឲ្យបាន ទូលំទូលាយ  និងឆាប់រហ័ស។ ២. កាត់បន្ថយនូវបញ្ហាប្រឈមរបស់ប្រជាពលរដ្ឋ ក្នុងការមកដាក់ពាក្យបណ្ដឹងពីការរំលោភបំពានសិទ្ធិមនុស្ស។ ការដាក់ពាក្យបណ្តឹងតាមកម្មវិធីទូរស័ព្ទនេះ អាចភ្ជាប់មកជា​មួយនូវរូបភាព សំឡេង និងវីដេអូ ហើយរាល់ពាក្យបណ្តឹងទាំងអស់ នឹងត្រូវបានរក្សាការសម្ងាត់។

លោក កត្តា អ៊​ន សមាជិក​ និង​ជា​អ្នក​នាំ​ពាក្យ​គណៈកម្មាធិការ​សិទ្ធិមនុស្ស​កម្ពុជា មានប្រសាសន៍ប្រាប់កម្ពុជាថ្មី នៅថ្ងៃទី ១៧ ខែសីហានេះថា មកដល់ពេលនេះ គណៈកម្មាធិការសិទ្ធិមនុស្សកម្ពុជា មិនទាន់មានបណ្តឹងណាមួយនោះទេ តែមានអ្នកចូលមើលក្នុងកម្មវិធីជារៀងរាល់ថ្ងៃ។

លោក កត្តា អ៊​ន បានបញ្ជាក់ថា ​គណៈកម្មាធិការ​សិទ្ធិមនុស្ស​កម្ពុជា បានផ្សព្វផ្សាយកម្មវិធីអេឡិកត្រូនិកនេះជាបណ្តើរៗ តាមរយៈការផ្សព្វផ្សាយសិទ្ធិមនុស្ស និងមានគម្រោងផ្សព្ចផ្សាយបន្ថែមទៀតដល់សាធារណៈជន។

លោក កែវ រ៉េមី រដ្ឋមន្រ្តីប្រតិភូអមនាយករដ្ឋមន្រ្តី និងជាប្រធានគណៈកម្មាធិការសិទ្ធិមនុស្សកម្ពុជា បានលើកឡើងក្នុងពិធីដាក់ឲ្យប្រើប្រាស់កម្មវិធីនេះថា ការបង្កើតឲ្យមាននូវកម្មវិធីអេឡិកត្រូនិក របស់គណៈកម្មាធិការសិទ្ធិមនុស្សកម្ពុជា គឺជាការវិវឌ្ឍក្នុងជំហានថ្មីមួយទៀតនាយុគ្គសម័យឌីជីថល ក្នុងគោលដៅជំរុញឲ្យមានការគោរព ការលើកកម្ពស់ និងការការពារសិទ្ធិមនុស្សនៅកម្ពុជា ឲ្យកាន់តែប្រសើរឡើងថែមទៀត។

លោកថា ការបង្កើតកម្មវិធីអេឡិកត្រូនិកនេះ ក៏ជាការចូលរួមចំណែកមួយផ្នែក ជាមួយរាជរដ្ឋាភិបាលដែលកំពុងធ្វើបដិវត្ត ន៍ត្តកម្មឌីជីថល ដោយបានដាក់ចេញនូវគោលនយោបាយរដ្ឋាភិបាលឌីជីថលកម្ពុជា ២០២២-២០៣៥ ដែលផ្ដោតលើចក្ខុវិស័យ “ការកសាងរដ្ឋាភិបាលឌីជីថល ដើម្បីលើកកម្ពស់គុណភាពជីវិត និងទំនុកចិត្តប្រជាពលរដ្ឋ តាមរយៈការបម្រើសេវាសាធារណៈ ឲ្យកាន់តែល្អប្រសើរ”៕