ព័ត៌មានជាតិ

លោក កែវ រ៉េមី ថាថៃមិនអាចកាន់កាប់ដីខ្មែរដោយស្របច្បាប់ទេហើយរដ្ឋាភិបាលដឹងថានឹងដោះស្រាយតាមវិធីណា

បានផុស

៥ ខែ មុន

នៅ

ថ្ងៃព្រហស្បតិ៍ ៥ កុម្ភៈ ២០២៦

ដោយ

ប្រធានគណៈកម្មាធិការសិទ្ធិមនុស្សកម្ពុជាលោក កែវ រ៉េមី បានលើកឡើងថារដ្ឋាភិបាលមានមធ្យោបាយដោះស្រាយបញ្ហាឈ្លានពានរបស់ថៃលើដីខ្មែរបាន ហើយវិធានការមិនអាចធ្វើដោយខ្វះភាពរឹងមាំ និងខ្ជីខ្ជាទេ។ ការលើកឡើងរបស់លោក កែវ រ៉េមី គឺបន្ទាប់ពីក្រុមប្រឆាំងនៅក្រៅប្រទេសបានប្រកាសពីដាក់ពាក្យបណ្ដឹងប្ដឹងថៃទៅកាន់តុលាការព្រហ្មទណ្ឌអន្តរជាតិកាលពីថ្ងៃទី៤ ខែកុម្ភៈ ម្សិលមិញនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កែវ រ៉េមី បានសរសេរលើហ្វេសបុករបស់លោកនៅថ្ងៃទី៥ ខែកុម្ភៈ ឆ្នាំ២០២៦នេះ ដោយបញ្ជាក់ថាវិធានការរបស់រដ្ឋាភិបាលមួយមិនអាចធ្វើដូចជាក្រុមហ៊ុន ឬគណបក្សនយោបាយដែលមិនដឹកនាំរដ្ឋទេ។

លោកបញ្ជាក់ថា៖ «រាល់លិខិតស្នាម ឬ វិធានការណាមួយរបស់រដ្ឋត្រូវមានការគិតគូរដោយមានភាពល្អិតល្អន់បំផុតនូវផលប៉ះពាល់របស់វា។ យ៉ាងណាមិញ, រាល់លិខិតបណ្តឹង ឬវិធានការតាមផ្លូវច្បាប់ដែលទាក់ទងទៅរដ្ឋណាមួយ ឬប្រទេសមួយគឺកាន់តែមានការប្រុងប្រយ័ត្នខ្ពស់បំផុតហើយត្រូវតែរឹងមាំនិងថ្លឹងថ្លែងនូវផលប្រយោជន៍យូរអង្វែង»។

លោក កែវ រ៉េមី បានបញ្ជាក់ថា ការឈ្លានពានទឹកដីដោយប្រើកម្លាំងយោធាថៃដើម្បីកាន់កាប់មិនអាចទទួលបានភាពស្របច្បាប់នោះទេ។ រដ្ឋាភិបាលកម្ពុជាដឹងច្បាស់ថានឹងដោះស្រាយបញ្ហានេះដោយវិធីណាពោលគឺត្រូវតែរក្សានិងឱ្យតម្លៃទៅលើអាយុជីវិតរបស់មនុស្សដែលរស់នៅតាមព្រំដែនប្រទេសទាំងពីរជាសំខាន់។ លោកអំពាវនាវដល់ពលរដ្ឋបន្តអត់ធ្មត់ និងជឿលើវិធានការដោះស្រាយរបស់រាជរដ្ឋាភិបាល។

បន្ទាប់ពីសម្រេចបានបទឈប់បាញ់កាលពីថ្ងៃទី២៧ ខែធ្នូ ឆ្នាំ២០២៥ ទាហានថៃបានបំពានលើសេចក្ដីថ្លែងការណ៍រួមជាបន្តបន្ទាប់ដោយបានរាយលួសបន្លា ដាក់ទូរកុងតឺន័រ បំផ្លាញផ្ទះសំបែងពលរដ្ឋខ្មែរ និងហាមពលរដ្ឋខ្មែរមិនឱ្យត្រលប់ទៅកាន់ផ្ទះរបស់ពួកគេវិញ។ ក្នុងជំនួបជាមួយប្រជាជនភៀសសឹកនៅខេត្តព្រះវិហារ កាលពីថ្ងៃទី៣១ ខែមករា កន្លងទៅ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានបញ្ជាក់ថាអ្វីដែលកម្ពុជាធ្វើបច្ចុប្បន្នគឺធ្វើយ៉ាងណារក្សាឱ្យបាននូវសន្ដិភាពឡើងវិញជាមុនសិនជាមួយនឹងការស្ដារនូវទំនុកចិត្តឡើងវិញបាន និងអំពាវនាវដល់ពលរដ្ឋសូមកុំមានការព្រួយបារម្ភពីការបាត់បង់ទឹកដីដោយសម្ដេចបញ្ជាក់ថាកម្ពុជានៅតែបន្តទាមទារនូវសិទ្ធិជាម្ចាស់ដីមកវិញដោយសន្តិវិធី៕