ឃាត់ខ្លួនបានហេីយអ្នកទោសដែលជាមេក្លោងគ្រឿងញៀន ក្រោយជនបិទមុខភ្ជង់រំដោះនៅសៀមរាប

កម្លាំងប្រឆាំងបទល្មើសគ្រឿងញៀន នៅល្ងាចថ្ងៃទី២២ ខែសីហា ឆ្នាំ២០២៣ បានតាមប្រម៉ាញ់ និងឃាត់ខ្លួនមេក្លោងគ្រឿងញៀន ដែលត្រូវជាប់ទោស ៥២ឆ្នាំ ពីបទជួញដូគ្រឿងញៀនចំនួន២លើក ហើយមានក្រុមជនបិទមុខ ៦នាក់ បានជួយរំដោះគេចខ្លួននៅមន្ទីពេទ្យធ្មេញមួយកន្លែង ក្នុងខេត្តសៀមរាប កាលពីថ្ងៃទី១៧ ខែសីហា ឆ្នាំ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី១៧ ខែសីហា ឆ្នាំ២០២៣ កន្លងទៅ មានបទល្មើសមួយបានកើតឡើង ដោយមានក្រុមឧក្រិដ្ឋជនបើកបររថយន្ត Lexus មកភ្ជង់រំដោះអ្នកទោស ទីតាំងកើតហេតុនៅកន្លែងពេទ្យធ្មេញ ស្ថិតនៅភូមិតាភុល សង្កាត់ស្វាយដង្គំ ក្រុងសៀមរាប។

ប៉ុន្តែទោះជាយ៉ាងណាកម្លាំងសមត្ថកិច្ចគ្រប់លំដាប់ថ្នាក់ រាជធានី ខេត្ត បានសហការក្នុងប្រតិបត្តិការស៊ើបអង្កេតជុំវិញរឿងរ៉ាវក្រុមបិទមុខរំដោះអ្នកទោស ដែលជាមេក្លោងគ្រឿងញៀនត្រូវផ្តន្ទាទោសដាក់ពន្ធនាគារខេត្តសៀមរាបចំនួន ៥២ឆ្នាំ ហើយមេក្លោងរូបនេះទើបតែឃុំខ្លួននៅពន្ធនាគារបានរយៈពេល ១៤ឆ្នាំប៉ុណ្ណោះ ។

មកដល់ថ្ងៃទី២២ ខែសីហាឆ្នាំ ២០២៣នេះ កម្លាំងប្រឆាំងបទល្មើសគ្រឿងញៀន បានធ្វើការឃាត់ខ្លួនមនុស្ស ៧នាក់ដែលជាក្រុមជនបិទមុខដែលធ្វើសកម្មភាពរំដោះអ្នកទោសដែលជាមេក្លោង។ ក្រោយពេលកម្លាំងសមត្ថកិច្ចខំប្រឹងប្រែងស៊ើបអង្កេតដើម្បីតាមស្វែងរក ទីបំផុតអាចឃាត់ខ្លួនមេក្លោងដែលត្រូវបានរំដោះនោះ នៅឯខេត្តព្រះវិហារ។

បច្ចុប្បន្នកម្លាំងមន្ទីរប្រឆាំងបទល្មើសគ្រឿងញៀន កំពុងបញ្ជូនខ្លួនពិរុទ្ធជន ជាមេក្លោងរូបនេះទៅកាន់ទៅមន្ទីប្រឆាំងបទល្មើសគ្រឿងញៀន នៃអគ្គស្នងការនគរបាលជាតិដើម្បីបន្តនីតិវិធី៕

អត្ថបទ៖ សុខា

ចុចអាន៖ អ្នកទោសដែលត្រូវគេរំដោះ ជាមេជួញដូរគ្រឿងញៀន ជាប់ទោស ៥២ ឆ្នាំ