ក្រុមហ៊ុនបច្ចេកវិទ្យាឌីជីលកម្ពុជា-ឥណ្ឌាបង្កើនទំនាក់ទំនងជំរុញការធ្វើបរិវត្តកម្មឌីជីថល​នៅកម្ពុជា

លោក សូ វិសុទ្ធី រដ្ឋលេខាធិការក្រសួងប្រៃសណីយ៍ និងទូរគមនាគមន៍បានស្នើឱ្យក្រុមហ៊ុនបច្ចេកវិទ្យាកម្ពុជា និងឥណ្ឌា​តភ្ជាប់ទំនាក់ទំនងរវាងគ្នា ផ្លាស់ប្តួរបទពិសោធន៍ ចំណេះដឹង បង្កើនដៃគូ និងកិច្ចសហប្រតិបត្តិការជាមួយគ្នា ក៏ដូចជាការ​ចូលរួមជំរុញការធ្វើបរិវត្តកម្មឌីជីថលនៅកម្ពុជា។

នៅក្នុងកម្មវិធីជំនួបរវាងក្រុមហ៊ុនក្នុងវិស័យបច្ចេកវិទ្យាឌីជីល កម្ពុជា-ឥណ្ឌា ដែលរៀបចំឡើងដោយគណៈកម្មាធិការជំរុញ​ការនាំចេញគ្រឿងអេឡិចត្រូនិក (ESC) និង កម្មវិធីកុំព្យូទ័រឥណ្ឌា និងស្ថានទូតឥណ្ឌាប្រចាំកម្ពុជាកាលពីថ្ងៃទី២៤សីហា លោកសូ វិសុទ្ធី បានលើកឡើងថា បច្ចុប្បន្នបច្ចេកវិទ្យាឌីជីថលបានដើរតួនាទីយ៉ាងសំខាន់ណាស់ក្នុងការរស់​នៅប្រចាំ​ថ្ងៃរបស់​យើងដោយបានផ្លាស់ប្តូរការប្រាស្រ័យទាក់ទងគ្នា ការបំពេញការងារ ការធ្វើធុរកិច្ច និងការសិក្សាកាន់​តែប្រសើរ​ឡើង។

លោកបានបន្តទៀតថាទន្ទឹមនិងការរីកចម្រើនយ៉ាងឆាប់រហ័សនៃបច្ចេកវិទ្យាឌីជីថល រួមជាមួយអត្ថប្រយោជន៍ដ៏ធំធេង រាជរដ្ឋាភិបាលកម្ពុជាបានដាក់ចេញនូវក្របខ័ណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥ និងគោលនយោបាយរដ្ឋាភិបាលឌីជីថលកម្ពុជា ២០២២-២០៣៥ សំដៅកសាងសេដ្ឋកិច្ច និងសង្គមឌីជីថលដ៏រស់រវើក ជំរុញការចាប់យកបច្ចេកវិទ្យាឌីជីថល និងកំណើនសេដ្ឋកិច្ច ក៏ដូចជាការកសាងរដ្ឋាភិបាលឌីជីថល និងការបម្រើសេវា​សាធារណៈ​ប្រកបដោយប្រសិទ្ធភាព និងបរិយាប័ន្ន។ លោកបានបន្ថែមថាគោលដៅជាយុទ្ធសាស្ត្រចំបងមួយ គឺការលើក​កម្ពស់​កិច្ចសហការ និងភាពជាដៃគូរវាងវិស័យសាធារណៈ និងឯកជន សំដៅលើកទឹក​ចិត្តដល់ការចូលរួម​របស់វិស័យ​ឯកជន​និងដៃគូ ក្នុងការធ្វើបរិវត្តកម្មឌីជីថលប្រកបដោយប្រសិទ្ធផល ការកៀរគរធនធានមនុស្សឌីជីថល ហិរញ្ញវត្ថុ និងបច្ចេកវិទ្យា ក្នុងការចូលរួមអភិវឌ្ឍ ប្រតិបត្តិការ និងការថែទាំប្រព័ន្ធឌីជីថលនានា។

លោករដ្ឋលេខាធិការ កោតសរសើរ និងវាយតម្លៃខ្ពស់ចំពោះប្រទេសឥណ្ឌាដែលបានបង្កើតធនធាន​មនុស្សឆ្នើមរបស់ខ្លួន​ជាច្រើន​ក្នុងវិស័យ ICT ក៏ដូចជាក្រុមហ៊ុនបច្ចេកវិទ្យាឌីជីថលល្បីៗ និងសង្ឃឹមថាកម្មវិធីនៅថ្ងៃនេះនឹងផ្តល់​ឱកាសដល់​ក្រុម​ហ៊ុនបច្ចេកវិទ្យាកម្ពុជា និងឥណ្ឌាតភ្ជាប់ទំនាក់ទំនងរវាងគ្នា ផ្លាស់ប្តួរបទពិសោធន៍ ចំណេះដឹង បង្កើនដៃគូ និងកិច្ច​សហប្រតិបត្តិការជាមួយគ្នា ក៏ដូចជាការចូលរួមជំរុញការធ្វើបរិវត្តកម្មឌីជីថលនៅកម្ពុជាផងដែរ។

គួរបញ្ជាក់ថា កម្មវិធីជំនួបរវាងក្រុមហ៊ុនក្នុងវិស័យបច្ចេកវិទ្យាឌីជីល កម្ពុជា-ឥណ្ឌា មានក្រុមហ៊ុនបច្ចេកវិទ្យាឌីជីថលកម្ពុជា​ចូលរួមចំនួន ៦០ក្រុមហ៊ុន និងក្រុមហ៊ុនបច្ចេកវិទ្យាឌីជីថលល្បីៗមកពីឥណ្ឌាចំនួន ១៥ក្រុមហ៊ុន ដែលមានជំនាញ​លើផ្នែក Software Solution, AI, Big Data analytics, Cyber Security, Cloud Computing, Web and Mobile Application, FinTech, EduTech, AgriTech និង Blockchain៕

អត្ថបទ ៖ សំអឿន