រាជរដ្ឋាភិបាល សម្រេចបង្កើតគណៈកម្មាធិការជាតិសម្របសម្រួលកិច្ចការព័ត៌មាន និងសាធារណមតិ

សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានចេញអនុក្រឹត្យ ស្ដីពី ការរៀបចំ និងការប្រព្រឹត្តទៅរបស់គណៈកម្មាធិការជាតិសម្របសម្រួលកិច្ចការព័ត៌មាន និងសាធារណមតិ។

អនុក្រឹត្យចុះថ្ងៃទី ១ ខែកញ្ញា ឆ្នាំ ២០២៣នេះ បានឲ្យដឹងថា គណៈកម្មាធិការជាតិសម្របសម្រួល កិច្ចការព័ត៌មាន និងសាធារណមតិ ដែលសរសេរអក្សរកាត់ថា គ.ស.ព.ស. ជាសេនាធិការរបស់រាជរដ្ឋាភិបាល សម្រាប់កិច្ចការព័ត៌មាន និងសាធារណមតិ ដើម្បីការពារសមិទ្ធផល ស្នាដៃ និងកេរ្តិ៍ឈ្មោះរបស់ព្រះរាជាណាចក្រកម្ពុជា។

គណៈកម្មាធិការជាតិសម្របសម្រួលកិច្ចការព័ត៌មាន និងសាធារណមតិ មានតួនាទីភារកិច្ចដូចជា៖

-ធ្វើកិច្ចការងារពង្រឹងសាធារណមតិ តាមរយៈការតាមដានក្ដាប់គ្រប់ស្ថានការណ៍ ឃោសនា ពន្យល់ និងការពាររូបភាពវិជ្ជមានរបស់ព្រះរាជាណាចក្រកម្ពុជា។

-ការពារអធិបតេយ្យជាតិ ផ្សព្វផ្សាយសមិទ្ធផលរបស់រាជរដ្ឋាភិបាល និងកសាងរូបភាពវិជ្ជមាន និង លើកកម្ពស់កិត្យានុភាព របស់ព្រះរាជាណាចក្រកម្ពុជាទាំងក្នុងស្រុក និងលើឆាកអន្តរជាតិ។

-ជំរុញប្រសិទ្ធភាពការងារឆ្លើយតបព័ត៌មានក្លែងក្លាយ តាមរយៈការរៀបចំយន្តការឆ្លើយតបឲ្យទាន់ពេលវេលាជាប្រព័ន្ធតួអង្គតែមួយ និងបង្កើនសមត្ថភាពយុទ្ធសាស្ត្របែបឌីជីថល។

-ផ្តួចផ្ដើមគំនិតលើការផលិតខ្លឹមសារគ្រប់ប្រភេទ សម្រាប់ពង្រឹងសាធារណមតិ

-សហការជាមួយបណ្តាញផ្សព្វផ្សាយ ដើម្បីចែករំលែកខ្លឹមសារ និងផ្សព្វផ្សាយបន្ត

-ធ្វើរបាយការណ៍ ស្តីពី សកម្មភាពការងាររបស់ គ.ស.ព.ស. ជូនប្រមុខរាជរដ្ឋាភិបាល

-អនុវត្តភារកិច្ចផ្សេងៗទៀតតាមការប្រគល់ពីប្រមុខរាជរដ្ឋាភិបាល៕