កម្ពុជា មានអ្នកកើតជំងឺគ្រុនឈាមជាង ១ម៉ឺន ៧ពាន់ករណី និងស្លាប់ ៣២នាក់ គិតត្រឹមពាក់កណ្ដាលខែកញ្ញានេះ

គិតត្រឹមពាក់កណ្ដាលខែកញ្ញា ឆ្នាំ ២០២៣នេះ ប្រទេសកម្ពុជា មានអ្នកកើតជំងឺគ្រុនឈាមជាង ១៧​,០០០ករណី ដោយក្នុងនោះស្លាប់ ៣២នាក់ ហើយមានការកើនឡើង ២ដង បើធៀបទៅនឹងរយៈពេលដូចគ្នាឆ្នាំ ២០២២កន្លងទៅ។

លោកវេជ្ជបណ្ឌិត លាង ឬទ្ធា ប្រធានកម្មវិធីជាតិប្រយុទ្ធនឹងជំងឺគ្រុនឈាម នៃក្រសួងសុខាភិបាលមានប្រសាសន៍នៅព្រឹកថ្ងៃទី ១៥ ខែកញ្ញានេះថា ចាប់ពីខែមករារហូតមកដល់ថ្ងៃទី ១៥ ខែកញ្ញា ឆ្នាំ ២០២៣នេះ មានអ្នកកើតជំងឺគ្រុនឈាមជាង ១៧, ០០០ករណី ដោយមានមនុស្សស្លាប់ចំនួន ៣២នាក់។

លោកវេជ្ជបណ្ឌិត បានបន្តថា ចំនួនអ្នកឈឺ និងអ្នកស្លាប់នេះ បើធៀបទៅនឹងរយៈពេលដូចគ្នាឆ្នាំ ២០២២កន្លងទៅ ឃើញថា មានការកើនឡើង ២ដង ហើយរាជធានី-ខេត្ត ដែលមានករណីជំងឺគ្រុនឈាមច្រើនរួមមាន៖ រាជធានីភ្នំពេញ កណ្តាល កំពង់ស្ពឺ ពោធិ៍សាត់ ត្បូងឃ្មុំ កំពង់ឆ្នាំង សៀមរាបបន្ទាយមានជ័យ និងខេត្តតាកែវ។

លោកវេជ្ជបណ្ឌិត បានពន្យល់ថា ការដែលជំងឺគ្រុនឈាមមានការកើនឡើងខ្ពស់ ដោយសារតែកត្តាការប្រែប្រួលអាកាសធាតុ ដូចជា អាកាសធាតុក្តៅអាចបង្កលក្ខណៈងាយស្រួល ក្នុងការកកើតមូសខ្លាច្រើន និងកត្តាទឹកភ្លៀងពិសេសឆ្នាំ ២០២៣នេះ ជាឆ្នាំស្ថិតក្នុងវ័ន្តមានការផ្ទុះជំងឺគ្រុនឈាម ដែលមានរយៈពេល ៥ឆ្នាំម្តង បន្ទាប់ពីកម្ពុជាបានទ្រង់ទ្រាយធំកាលពីឆ្នាំ ២០១៩ កន្លងទៅ។

ទោះយ៉ាងណាគេសង្កេតឃើញថា ស្ថានភាពជំងឺគ្រុនឈាម នៅក្នុងរយៈពេល ៣សប្តាហ៍ចុងក្រោយនេះមានការថយចុះ ដោយសារពលរដ្ឋមានការយល់ដឹង ពីវិធីការពារកុំឲ្យឆ្លងជំងឺគ្រុនឈាមនិងមានសម្ភារគ្រប់គ្រាន់ សម្រាប់បង្ការទប់ស្កាត់ និងព្យាបាលជំងឺគ្រុនឈាម រួមមាន៖ ថ្នាំអាបេតថ្នាំបាញ់សម្លាប់មូស សេរ៉ូមព្យាបាល និងចុះអប់រំសុខភាពដល់ប្រជាពលរដ្ឋ នៅតំបន់ភូមិសាស្ត្រណាដែលមានករណីជំងឺគ្រុនឈាម ច្រើនជាងគេ។

ទន្ទឹមនឹងនេះ លោកវេជ្ជបណ្ឌិត លាង ឬទ្ធា បានអំពាវនាវដល់ប្រជាពលរដ្ឋ បន្តចូលរួមអនុវត្តតាមការណែនាំរបស់ក្រសួងសុខាភិបាល ដើម្បីទប់ស្កាត់ជំងឺគ្រុនឈាម កុំឲ្យមានការរាតត្បាតទ្រង់​ទ្រាយធំ។

កាលពីថ្ងៃទី ១៤ ខែកញ្ញា ឆ្នាំ ២០២៣ ក្រសួងសុខាភិបាល​ បានចេញសេចក្តីណែនាំ ស្តីពី ការប្រុងប្រយ័ត្ន និងបង្ការជំងឺគ្រុនឈាម។ ក្នុងនោះ បានដាក់ចេញវិធានការចំនួន ៥ ដើម្បីឲ្យប្រជាពលរដ្ឋអនុវត្តទប់ស្កាត់ជំងឺគ្រុនឈាម ដែលវិធានការទាំងនោះមានដូចជា៖ ណែនាំឲ្យប្រជាពលរដ្ឋសំអាតបរិស្ថាននៅជុំវិញផ្ទះសម្បែង និងយករាល់វត្ថុទាំងឡាយណា ដែលអាចដក់ទឹកបានដូចជា សំបកកំប៉ុង សំបកដូង សំបកកង់ឡាន ទៅកប់ចោល ឬដុតចោល ព្រោះថា វត្ថុទាំងនោះអាចបង្កឲ្យកកើតជាដង្កូវទឹក ដែលវិវត្តន៍ទៅជាមូសខ្លា ដែលជាភ្នាក់ងារចម្លងជំងឺគ្រុនឈាម។

ក្រសួងសុខាភិបាល ក៏បានរំលឹកផងដែរថា បើមានអាការៈក្តៅខ្លួនខ្លាំង ត្រូវរួសរាន់បញ្ជូនអ្នកជំងឺទៅកាន់មន្ទីរពេទ្យរដ្ឋ ដែលនៅជិតផ្ទះក្នុងរយៈពេល ៤៨ម៉ោង ដើម្បីឲ្យគ្រូពេទ្យពិនិត្យ និងព្យាបាលឲ្យបានទាន់ពេលវេលា​៕

អត្ថបទ៖ សំអឿន