អ្នកសេដ្ឋកិច្ច៖ ការបញ្ចុះតម្លៃអគ្គិសនីជាយន្តការកាត់បន្ថយថ្លៃដើម និងលើកទឹកចិត្ត​ដល់អ្នកវិនិយោគ​ឧស្សាហកម្មកែច្នៃកសិកម្ម

អ្នកសេដ្ឋកិច្ច បានលើកឡើងថា ការបញ្ចុះថ្លៃអគ្គិសនី គឺជាយន្តការមួយ ក្នុងការកាត់បន្ថយថ្លៃដើមឧស្សាហកម្ម និងលើកទឹកចិត្តឱ្យមានប្រាក់ចំណេញលើវិស័យកែច្នៃ ជាពិសេសទាក់ទាញក្រុមហ៊ុនវិនិយោគ​លើវិស័យកសិ​-ឧស្សាហកម្មកែច្នៃ កាន់តែច្រើន។

លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា មើលឃើញថា បច្ចុប្បន្ននេះ កម្ពុជា មានតម្លៃអគ្គិសនីខ្ពស់ជាងប្រទេសថៃ ឡាវ និងវៀតណាម ហើយស្ទើរតែខ្ពស់ជាងគេ នៅក្នុងតំបន់អាស៊ាន។ លោកបន្តថា តម្លៃអគ្គិសនីខ្ពស់ ជាកត្តារារាំងទៅដល់ភាពរីកចម្រើនក្នុងវិស័យឧស្សាហកម្មកម្មន្តសាល និងឧស្សា​ហកម្មកែច្នៃនានា។

លោកបណ្ឌិត គី សេរីវឌ្ឍន៍ មានសុទិដ្ឋិនិយមថា ការបញ្ចុះថ្លៃអគ្គិសនីនេះ គឺជាចំណុចចាប់ផ្តើមជំរុញឱ្យមាន​ឧត្តមភាព​ក្នុងការប្រកួតប្រជែងលើវិស័យកម្មន្តសាល និងទាក់ទាញអ្នកវិនិយោគពីខាងក្រៅ ក៏ដូចជាវិនិយោគក្នុងស្រុក។ ទន្ទឹមនឹង​នេះ លោកបណ្ឌិត ជំរុញដល់រដ្ឋាភិបាលលើកទឹកចិត្តបន្ថែមទៀត ដល់អ្នកវិនិយោគក្នុងស្រុកឱ្យធ្វើការកែច្នៃ ដើម្បីគាំ​ទ្រផលិត​ផលកសិកម្មដែលកសិករផលិតបាន ស្មើនឹងការជួយបង្កើតទីផ្សារក្នុងស្រុក។

ជាមួយគ្នានេះ អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បាលើកឡើងដែរថា ក្នុងនាមសភាពាណិជ្ជកម្ម​តំណាងឱ្យវិស័យឯកជនភាគច្រើន អ្នករកស៊ី ឧស្សាហកម្មកែច្នៃរោងចក្រផ្សេងៗ អបអរសាទរនៃការបញ្ចុះតម្លៃអគ្គិសនី ក្រោមការយកចិត្តទុកដាក់ខ្ពស់ពីសំណាក់សម្តេច ហ៊ុន ម៉ាណែត នាយករដ្ឋមន្រ្តី ក្នុងការអភិវឌ្ឍវិស័យកែច្នៃផ្សេងៗ ជាពិសេសវិស័យកសិកម្ម។

អ្នកឧកញ្ញា លឹម ហេង បានបន្តថា« ជាការពិតណាស់ កន្លងមកថ្លៃអគ្គិសនីកម្ពុជា ថ្លៃជាងប្រទេសជិតខាង ដូច្នេះថ្លៃដើម​នៃការផលិតអាចថ្លៃជាគេមួយចំនួន»។ ចំពោះការបញ្ចុះថ្លៃអគ្គិសនីនាពេលនេះ អ្នកឧកញ៉ា មើលឃើញថា បានជួយកាត់​បន្ថយថ្លៃដើមនៃការផលិត ជាពិសេសផលិតផលកែច្នៃពីកសិកម្ម អាចឱ្យអ្នកវិនិយោគទទួលបានប្រាក់​ចំណេញ។ អនុប្រធាន​សភាពាណិជ្ជកម្មកម្ពុជា សង្ឃឹមថា រាជរដ្ឋាភិបាល នឹងបញ្ចុះតម្លៃអគ្គិសនីបន្ថែមទៀត នៅថ្ងៃ​ខាងមុខ ក្រោយពីសាកល្បងរយៈពេល ៣ខែនេះ។

កញ្ញា សឿន សុទ្ធនីតា សហស្ថាបនិកសិប្បកម្មកែច្នៃស្វាយចន្ធីស្ទឹងត្រែង ជាសិប្បកម្ម ដែលទទួលបានការបញ្ចុះ​តម្លៃអគ្គិសនីដែរ បានអបអរសាទរដែលប្រមុខរាជរដ្ឋាភិបាល បានគិតគូរលើកស្ទួយវិស័យឧស្សាហកម្មកសិកម្មកម្ពុជា ឱ្យកាន់តែមានសន្ទុះឡើង និងគាំទ្រអ្នកកែច្នៃក្នុងស្រុក។

ស្ថាបនិកសិប្បកម្មកែច្នៃស្វាយចន្ធីស្ទឹងត្រែង បានគូសបញ្ជាក់ដូច្នេះថា «នាងខ្ញុំមិនទាន់បានធ្វើការសិក្សាអំពីប្រាក់​ចំណេញទេ ព្រោះនិយាយដោយស្មោះត្រង់សហគ្រាសនាងខ្ញុំទើបតែបង្កើត នៅក្នុងដំណាក់កាល​ចំណាយច្រើន​ជាងចំណូល តែទោះយ៉ាងណា ច្បាស់ណាស់ការបញ្ចុះតម្លៃនេះនឹងជួយកាត់ថ្លៃដើមនៃការផលិត»។

សូមបញ្ជាក់ថា កាលពីថ្ងៃទី ២០ កញ្ញា ក្រសួងរ៉ែ និងថាមពល បានចេញប្រកាសពីការបញ្ចុះថ្លៃអគ្គិសនី ចំពោះអ្នកប្រើ​ប្រាស់​ប្រភេទឧស្សាហកម្ម និងកសិកម្ម ក្នុងគោលដៅជំរុញការពង្រីកផលិតកម្មរោងចក្រ និងសហគ្រាស ផ្នែកឧស្សា​ហកម្ម និងផ្នែកកសិកម្ម ដើម្បីបង្កើតការងារ និងប្រាក់ចំណូលជូនប្រជាពលរដ្ឋ។

ការបញ្ចុះតម្លៃអគ្គិសនីនេះ អនុវត្តតាមការណែនាំរបស់សម្តេចធិបតី ហ៊ុន ម៉ាណែត ដែលបានឱ្យអគ្គិសនីកម្ពុជា សិក្សាពីការកាត់បន្ថយ​ថ្លៃភ្លើង​ដល់រោងចក្រសហគ្រាសចំនួន ២១០០ កន្លែង ក្នុងវិស័យឧស្សាហកម្ម និងកសិកម្ម ដើម្បីសម្រួលដល់​និយោជកទទួល​បានប្រាក់ចំណេញ ពង្រីកការវិនិយោគ​បង្កើតការងារបន្ថែមដល់ពលរដ្ឋខ្មែរ។

ថ្លែងនៅក្នុងជំនួបជាមួយកម្មករកម្មការិនីនៅខេត្តតាកែវនាពេលថ្មីៗនេះ សម្តេច ហ៊ុន ម៉ាណែត បានសង្កត់ធ្ងន់ថា ការបញ្ចុះតម្លៃអគ្គិសនីនេះ ដើម្បីឱ្យក្រុមនិយោជកសន្សំបានប្រាក់ខ្លះ​យក មកដំឡើង​ប្រាក់ខែជូនកម្មករ ផងដែរ៕