នាយឧត្តមសេនីយ៍ ដាំ ដារីនី ជំរុញឱ្យកងទ័ពត្រូវខិតខំពង្រឹងសមត្ថភាព​ការពារជាតិ

លោកស្រីនាយឧត្តមសេនីយ៍ ដាំ ដារីនី រដ្ឋលេខាធិការក្រសួងការពារជាតិ បានជំរុញឱ្យកងទ័ពជើងទឹកត្រូវខិតខំពង្រឹងសមត្ថភាព​លើជំនាញការពារជាតិ ជាពិសេសការលើកកម្ពស់ការការពារព្រំដែនទឹក​ និងការបំពេញការងារមូលដ្ឋានឱ្យបានយ៉ាងល្អប្រសើរ។ ការជំរុញរបស់នាយឧត្តមសេនីយ៍បែបនេះ ក្នុងឱកាសជួបសំណេះសំណាលជាមួយថ្នាក់ដឹកនាំ និងកងទ័ព​នៃអង្គភាពចំណុះបញ្ជាការដ្ឋានកងទ័ពជើងទឹក នៅថ្ងៃទី២៥ ខែកញ្ញានេះ។

ថ្លែងចេញពីបញ្ជាការដ្ឋានការពារកោះឆ្នេរ នាថ្ងៃចន្ទនេះ លោកស្រីនាយឧត្តមសេនីយ៍ ដាំ ដារីនី បានវាយតម្លៃខ្ពស់ចំពោះមេបញ្ជាការ មេបញ្ជាការរង ក៏ដូចជាថ្នាក់ដឹកនាំអគ្គលេខាធិការដ្ឋាននៃគណៈកម្មាធិការជាតិសន្តិសុខលម្ហសមុទ្រ​ ​នាយនាវី​ នាយនាវីរង​​ និងពលនាវឹកនៃបញ្ជាការដ្ឋានកងទ័ពជើងទឹកទាំងអស់ ដែលបានអនុវត្តការងារប្រកបដោយការទទួលខុសត្រូវខ្ពស់ ជាពិសេសគឺបានគិតគូរក្នុងការលើកកម្ពស់ការការពារព្រំដែនទឹក​ និងការបំពេញការងារមូលដ្ឋានបានយ៉ាងល្អប្រសើរ។ លោកស្រីនាយឧត្តមសេនីយ៍ បានចាត់ទុកកត្តាសន្តិភាព ដែលបានមកពីកិច្ចការពារជាតិ បូរណភាពទឹកដី ពិតជាមានតម្លៃមិនអាចកាត់ថ្លៃបានឡើយ។

លោកស្រីនាយឧត្តមសេនីយ៍ ដាំ ដារីនី បានជំរុញឱ្យកងទ័ព នៃកងយោធពលខេមរភូមិន្ទទាំងអស់ ត្រូវពង្រឹងសមត្ថភាព​ និងចំណេះជំនាញក្នុងកិច្ចការពារជាតិ​​បន្ថែមទៀត ដោយហ៊ានពុះពារការលំបាកគ្រប់ភារកិច្ច ដើម្បីធានាដល់ចីរភាពនៃការអភិវឌ្ឍវិស័យការពារជាតិកម្ពុជា ហើយប្រែក្លាយកងយោធពលខេមរភូមិន្ទ ជាកម្លាំងស្នូលដ៏រឹងមាំ ប្រកបដោយគុណភាពគ្រប់គ្រាន់ មានវិន័យ ស្មោះត្រង់ចំពោះមាតុភូមិ និងធានាការពារសន្តិសុខជាតិឱ្យបានរឹងមាំយូរអង្វែង។ ទន្ទឹមនេះ កងទ័ពទាំងអស់ ត្រូវបន្តថែរក្សាសមិទ្ធផល ដែលប្រមុខ​​​រាជរដ្ឋាភិបាលកម្ពុជា អាណត្តិទី៦ សម្តេចតេជោ​​ ហ៊ុន សែន​ បានខិតខំកសាងនូវស្នាដៃប្រវត្តិសាស្រ្តជាច្រើន​​រហូតមកដល់បច្ចុប្បន្ន។​​

នាយឧត្តមសេនីយ៍ក្រសួងការពារជាតិរូបនេះ ក៏បានណែនាំដល់កងទ័ពទាំងអស់ ត្រូវបន្តចូលរួមគាំទ្រដោយឥតងាករេ​ និងអនុវត្តឱ្យបានខ្ជាប់ខ្ជួននូវយុទ្ធសាស្ត្របញ្ចកោណ ដំណាក់កាលទី១ នៃរាជរដ្ឋាភិបាល នីតិកាលទី៧នេះ ក្រោមការដឹកនាំរបស់​​សម្តេចធិបតី​​​ ហ៊ុន ម៉ាណែត នាយករដ្ឋមន្ត្រីនៃកម្ពុជា​ ដើម្បីចូលរួមចំណែកអភិវឌ្ឍន៍សេដ្ឋកិច្ចជាតិ​ និងភាពសុខសាន្តរបស់ប្រជាជន។

នាឱកាសនោះ ក្នុងនាម​លោកនាយឧត្តមសេនីយ៍​ ទៀ សីហា ឧបនាយករដ្ឋមន្រ្តី​ រដ្ឋមន្រ្តីក្រសួងការពារជាតិ​ លោកស្រីនាយឧត្តសេនីយ៍ ដាំ ដារីនី ក៏បានបំពាក់ឋានន្តរសក្តិ ប្រគល់បណ្ណសរសើរ​ និងលិខិតសរសើរជូនដល់នាយនាវី​ នាយនាវីរង និងពលនាវឹក​នៃបញ្ជាការដ្ឋានកងទ័ពជើងទឹក ដែលបានបំពេញការងារមានស្នាដៃល្អប្រសើរក្នុងការបំពេញការងារ នាពេលកន្លងមកផងដែរ៕