សាលាបណ្ដែតទឹកដាច់ស្រយាលមួយកំពុងរឹតបន្តឹងការលក់គ្រឿងកំប៉ុង និងបង្អែមកញ្ចប់

ថ្មីៗនេះសាលាបឋមសិក្សាបណ្ដែតទឹកមួយដែលនៅដាច់សង្វែងឆ្ងាយពីទីប្រជុំជន គឺសាលាបឋមសិក្សាពាមផ្សោត ដែលស្ថិតនៅក្បែរព្រៃរនាម ក្នុងឃុំ បឹងទឹម ស្រុកសង្កែ ខេត្តបាត់ដំបងកំពុងធ្វើការរឹតបន្តឹងទៅលើការលក់គ្រឿងកំប៉ុងភេសជ្ជៈដែលមានជាតិផ្អែម និងមានជាតិហ្គាស ដល់អាជីវករលក់ដូរក៏ដូចជាការផ្សព្វផ្សាយទៅលើសិស្សានុសិស្សនៅក្នុងសាលាផងដែរដោយមិនអនុញ្ញាតឲ្យមានលក់នៅក្នុងសាលាបន្តទៀតនោះទេ។

លោកគ្រូ ទឹម ទិត្យ តំណាងនាយកសាលាបណ្ដែទឹកពាមផ្សោតបានលើកឡើងថា ក្រោយពីបានទទួលលិខិតរបស់មន្ទីរអប់រំខេត្តលេខ ១៦៦ ចុះថ្ងៃទី ២៣ មេសា ឆ្នាំ ២០២៣ នេះ រួចមក លោកក៏បានផ្សព្វផ្សាយទៅតាមលោកគ្រូ អ្នកគ្រូបន្ទុកថ្នាក់ ដើម្បីហាមសិស្សទាំងអស់មិនឲ្យបរិភោគគ្រឿងកំប៉ុង នំកញ្ចប់ ភេសជ្ជៈដែលមានជាតិស្ករ និងជាតិហ្គាស ព្រមទាំងចំណីដូចជា ម្ជូរ ប្រហិត ហតដក (Hot Dog) ដាច់ខាត ដែលអាហារទាំងនេះវានាំឲ្យប៉ះពាល់ដល់សុខភាពយ៉ាងសំខាន់ ដោយឡែកសម្រាប់អាជីវករលក់ដូរនៅក្នុងសាលារៀនក៏លោកគ្រូបានណែនាំអំពីបញ្ហានេះដែរដើម្បីបញ្ឈប់រាល់សកម្មភាពលក់ដូរចំណីអាហារទាំងនេះនៅក្នុងសាលា ដោយបច្ចុប្បន្នគឺអាជីវករបានអនុវត្តតាម 80% ហើយ។

កុមារី បូរ សំណាង ជាសិស្សនៅក្នុងសាលាបឋមសិក្សាពាមផ្សោតនេះដែរក៏បានរៀបរាប់ថា នាងមិនហ៊ានបរិភោគចំណីអាហារដែលលោកគ្រូអ្នកគ្រូបានហាមនោះទៀតឡើយព្រោះដើម្បីការពារសុខភាពរបស់នាងព្រោះពេលខ្លះនាងមានការខកខានក្នុងការមកសិក្សាដោយសារតែការទទួលទានចំណីអាហារទាំងនេះដែលធ្វើឲ្យនាងមានការចុកពោះ និងរាគរូសជាដើម។

បើតាមការផ្សព្វផ្សាយរបស់មន្ទីរសុខាភិបាលគឺចំណីអាហារទាំងនេះអាចបង្កឲ្យកើតជំងឺម្យ៉ាងដែលគេហៅថា ជំងឺមិនឆ្លង ដូចជាទឹកនោមផ្អែម និងឡើងអាស៊ីតជាដើមដូច្នេះលោកគ្រូអ្នកគ្រូទាំងអស់ត្រូវមានកាតព្វកិច្ចណែនាំដល់អ្នកលក់ និង ណែ​​នាំដល់សិស្សតាមបណ្ដាសាលារៀនផងដើម្បីគេចចេញពីចំណីអាហារទាំងនេះក្នុងការថែទាំសុខភាពរបស់ពួកគេ៕

អត្ថបទ៖ សោ និយមរ័ត្ន